ຄົນຮັກຂອງນາງ:
1ໂອຍິງທີ່ງາມເລີດ ຕີນນ້ອງທີ່ສຸບໃສ່ເກີບຢູ່ນັ້ນງາມຫລາຍ
ທ້າຍຂອງນ້ອງງາມເໝືອນນັກສິນລະປິນແຕ້ມ.
2ສະບືນ້ອງເໝືອນກັບຂັນນ້ຳ
ຊຶ່ງເກັບຮັກສາກິ່ນເຫລົ້າອະງຸ່ນບໍ່ໃຫ້ເຫີຍໄປ
ທ້ອງນ້ອງເໝືອນກອງເຂົ້າ
ທີ່ມີດອກຊ້ອນອ້ອມຮອບໄວ້.
3ນົມຂອງນ້ອງງາມເໝືອນລູກກວາງຝາແຝດ.
4ລຳຄໍຂອງນ້ອງເໝືອນຫໍຄອຍສູງທີ່ເຮັດດ້ວຍງາຊ້າງ
ຕາຂອງນ້ອງເໝືອນໜອງນ້ຳຢູ່ໃນເມືອງເຮັດຊະໂບນ
ຊຶ່ງໜອງນີ້ຢູ່ໃກ້ປະຕູກຳແພງເມືອງ
ດັງນ້ອງງາມດັ່ງຫໍຄອຍສູງທີ່ເລບານອນ
ຊຶ່ງເປັນບ່ອນເຝົ້າຍາມຢູ່ກົງກັບຂ້າມກັບເມືອງດາມາເຊ.
5ຫົວຂອງນ້ອງສູງດັ່ງພູກາເມນ
ຜົມເປຍຂອງນ້ອງສະງ່າງາມດັ່ງສີມ່ວງ
ຄວາມງາມຂອງມັນເຮັດໃຫ້ພະລາຊາກາຍເປັນຈຳເລີຍຮັກ.
6ທີ່ຮັກຂອງອ້າຍ ນ້ອງງາມທີ່ສຸດ
ຄວາມຍິນດີຢ່າງພາກພູມໃຈທີ່ນ້ອງມອບໃຫ້ອ້າຍນັ້ນມີລົ້ນເຫລືອ.
7ນ້ອງເຕັມໄປດ້ວຍຄວາມງົດງາມເໝືອນດັ່ງຕົ້ນຕານ
ນົມນ້ອງເໝືອນແຊງໝາກຕານ.
8ອ້າຍຈະປີນຂຶ້ນຕົ້ນຕານ
ແລະປິດເອົາໝາກຂອງມັນມາ
ນົມນ້ອງປຽບເໝືອນພົ້ວໝາກອະງຸ່ນສຳລັບອ້າຍ
ລົມຫາຍໃຈຂອງນ້ອງເໝືອນກິ່ນຫອມຂອງໝາກໂປມ.
9ແລະປາກຂອງນ້ອງເໝືອນດັ່ງເຫລົ້າອະງຸ່ນຊັ້ນດີ.
ຍິງສາວ:
ຂໍໃຫ້ເຫລົ້າອະງຸ່ນໄຫລຊື່ໄປຫາຄົນຮັກຂອງຂ້ອຍ
ຂໍໃຫ້ໄຫລໄປຜ່ານສົບ ແລະແຂ້ວຂອງລາວ.
10ຂ້ອຍເປັນຂອງຄົນຮັກຂອງຂ້ອຍ ແລະລາວກໍຕ້ອງການຂ້ອຍ.
11ທີ່ຮັກ ຈົ່ງມາພີ້ ໃຫ້ພວກເຮົາອອກໄປທົ່ງນານຳກັນ
ແລະໄປນອນຄ້າງຄືນຢູ່ຕາມບ້ານ.
12ພວກເຮົາຈະລຸກແຕ່ເຊົ້າໄປເບິ່ງຕົ້ນໝາກອະງຸ່ນ
ເພື່ອຢາກຮູ້ວ່າມັນປົ່ງຍອດແລ້ວຫລືຍັງ
ດອກຂອງມັນບານແລ້ວບໍ
ແລະເພື່ອເບິ່ງວ່າຕົ້ນພິລາມີດອກແລ້ວຫລືບໍ
ຢູ່ບ່ອນນັ້ນ ນ້ອງຈະມອບຄວາມຮັກໃຫ້ແກ່ອ້າຍ.
13ອ້າຍຈະດົມກິ່ນຫອມຂອງໝາກເຂືອ
ແລະພວກເຮົາຈະມີໝາກໄມ້ດີໆ ທຸກຢ່າງຢູ່ຕໍ່ໜ້າເຮືອນ
ທີ່ຮັກ ໝາກໄມ້ຫອມຫວານທີ່ເກັບໄວ້ແຕ່ດົນ ແລະເກັບດຽວນີ້
ນ້ອງໄດ້ຮັກສາໄວ້ໃຫ້ອ້າຍສະເໝີ.