1ຂ້ານ້ອຍຈະຮ້ອງເພງເຖິງຄວາມເມດຕາຂອງພຣະຜູ້ເປັນເຈົ້າເປັນນິດ
ດ້ວຍປາກຂອງຂ້ານ້ອຍ
ຂ້ານ້ອຍຈະປະກາດຄວາມສັດຊື່ຂອງພຣະອົງ
ຕະຫລອດທຸກຊົ່ວອາຍຸ
2ດ້ວຍຂ້ານ້ອຍໄດ້ກ່າວແລ້ວວ່າ “ຄວາມເມດຕາຈະຕັ້ງຢູ່ເປັນນິດ
ພຣະອົງຈະສະຖາປະນາຄວາມສັດຊື່ຂອງພຣະອົງໃນຟ້າສະຫວັນ”
3“ເຮົາໄດ້ກະທຳຄຳໝັ້ນສັນຍາກັບຜູ້ທີ່ຖືກເລືອກຂອງເຮົາ
ເຮົາໄດ້ປະຕິຍານກັບດາວິດຜູ້ຮັບໃຊ້ຂອງເຮົາ
4ວ່າ ‘ເຮົາຈະສະຖາປະນາເຊື້ອສາຍຂອງເຈົ້າໄວ້ເປັນນິດ
ແລະຈະສ້າງບັນລັງຂອງເຈົ້າໄວ້ທຸກຊົ່ວອາຍຸ’”
5ຂ້າແດ່ພຣະຜູ້ເປັນເຈົ້າ ຟ້າສະຫວັນຈະສັນລະເສີນ
ການອັດສະຈັນຂອງພຣະອົງ
ແລະສັນລະເສີນຄວາມສັດຊື່ຂອງພຣະອົງ
ໃນທີ່ປະຊຸມຂອງບັນດາຜູ້ບໍລິສຸດດ້ວຍ
6ເພາະຜູ້ໃດໃນຟ້າສະຫວັນຈະປຽບກັບພຣະຜູ້ເປັນເຈົ້າໄດ້
ໃນບັນດາລູກຫລານຂອງຜູ້ມີອຳນາດ ຜູ້ໃດຈະເໝືອນພຣະຜູ້ເປັນເຈົ້າ
7ຄືອົງພຣະເຈົ້າຜູ້ເປັນທີ່ຢຳເກງຢ່າງຍິ່ງໃນສະພາຂອງບັນດາຜູ້ບໍລິສຸດ
ແລະບັນດາຜູ້ທີ່ຢູ່ຮອບພຣະອົງກໍຢຳເກງພຣະອົງ
8ຂ້າແດ່ພຣະຜູ້ເປັນເຈົ້າພຣະເຈົ້າຈອມໂຍທາ ຂ້າແດ່ພຣະຜູ້ເປັນເຈົ້າ
ຜູ້ໃດຈະລິດທານຸພາບເທົ່າທຽມພຣະອົງ
ດ້ວຍຄວາມສັດຊື່ຂອງພຣະອົງຮອບພຣະອົງ
9ພຣະອົງປົກຄອງການຮຸນແຮງຂອງທະເລ ເມື່ອຄື້ນສູງຂຶ້ນພຣະອົງໃຫ້ສະຫງົບລົງ
10ພຣະອົງຕີເອຢິບເປັນທ່ອນໆເໝືອນຜູ້ຖືກຂ້າ
ພຣະອົງພັດສັດຕູຂອງພຣະອົງດ້ວຍລິດພຣະກອນຂອງພຣະອົງ
11ຟ້າສະຫວັນເປັນຂອງພຣະອົງ ແຜ່ນດິນໂລກເປັນຂອງພຣະອົງດ້ວຍ
ພຣະອົງໄດ້ຕັ້ງໂລກ ແລະບັນດາສິ່ງທີ່ຢູ່ໃນນັ້ນ
12ທິດເໜືອ ແລະທິດໃຕ້ ພຣະອົງກໍໄດ້ສ້າງ
ພູເຂົາຕາໂບກັບພູເຂົາເຮີໂມນ
ຈະສັນລະເສີນພຣະນາມຂອງພຣະອົງຢ່າງຊື່ນບານ
13ພຣະອົງມີພຣະກອນອັນຊົງລິດ ພຣະຫັດຂອງພຣະອົງກໍແຂງແຮງ
ພຣະຫັດຂວາຂອງພຣະອົງກໍສູງ
14ຄວາມທ່ຽງທຳ ແລະຄວາມຍຸດຕິທຳເປັນຮາກຖານແຫ່ງບັນລັງຂອງພຣະອົງ
ຄວາມເມດຕາ ແລະຄວາມຈິງຍ່າງນຳໜ້າພຣະອົງ
15ຊົນຊາດທີ່ຮູ້ຈັກໂຫ່ຮ້ອງຢ່າງຊື່ນຊົມຍິນດີ ແລະຊື່ນບານກໍເປັນສຸກ
ຂ້າແດ່ພຣະຜູ້ເປັນເຈົ້າ
ພວກເຂົາຈະຍ່າງໃນຄວາມສະຫວ່າງແຫ່ງພຣະພັກຂອງພຣະອົງ
16ພວກເຂົາຈະຊົມຊື່ນຍິນດີໃນພຣະນາມພຣະອົງແຕ່ເຊົ້າຮອດຄ່ຳ
ແລະໄດ້ຮັບການເຊີດຊູໂດຍຄວາມຊອບທຳຂອງພຣະອົງ
17ເພາະພຣະອົງເປັນສະຫງ່າລາສີແຫ່ງກຳລັງຂອງພວກເຂົາທັງຫລາຍ
ແຕ່ໂດຍຄວາມຍິນດີຂອງພຣະອົງ
ເຂົາຂອງຂ້ານ້ອຍທັງຫລາຍຈະຖືກເຊີດຊູຂຶ້ນ
18ເພາະຜູ້ປ້ອງກັນເຮົາທັງຫລາຍເປັນພຣະຜູ້ເປັນເຈົ້າ
ກະສັດຂອງເຮົາເປັນອົງບໍລິສຸດແຫ່ງອິສຣາເອນ
19ໃນເວລາກ່ອນ ພຣະອົງກ່າວດ້ວຍນິມິດແກ່ຜູ້ບໍລິສຸດຂອງພຣະອົງ
ແລະກ່າວວ່າ “ເຮົາໄດ້ຊ່ວຍເຫລືອຊາຍໜຸ່ມຄົນໜຶ່ງ
ເຮົາໄດ້ເຊີດຊູຄົນທີ່ຖືກເລືອກຄົນໜຶ່ງເໜືອປະຊາຊົນ
20ເຮົາໄດ້ພົບດາວິດຜູ້ຮັບໃຊ້ຂອງເຮົາ ດ້ວຍນ້ຳມັນບໍລິສຸດຂອງເຮົາ
ເຮົາໄດ້ເຈີມລາວໄວ້ແລ້ວ
21ເພື່ອວ່າມືຂອງເຮົາຈະຢູ່ກັບລາວເປັນນິດ
ແລະແຂນຂອງເຮົາຈະເສີມກຳລັງຂອງລາວ
22ສັດຕູຈະຮຽກຫຍັງຈາກລາວບໍ່ໄດ້ ບຸດແຫ່ງຄວາມຊົ່ວຮ້າຍຈະກົດຂີ່ລາວບໍ່ໄດ້
23ເຮົາຈະຢຽບຢ່ຳສັດຕູຂອງລາວຕໍ່ໜ້າລາວ ແລະຕີຜູ້ທີ່ກຽດຊັງລາວໃຫ້ລົ້ມລົງ
24ຄວາມສັດຊື່ ແລະຄວາມເມດຕາຂອງເຮົາຈະຢູ່ກັບລາວ
ແລະເຂົາຂອງລາວຈະເປັນທີ່ເຊີດຊູໂດຍນາມຂອງເຮົາ
25ເຮົາຈະເອົາມືຂອງລາວວາງໄວ້ເທິງທະເລ
ແລະມືຂວາຂອງລາວເທິງແມ່ນ້ຳທັງຫລາຍ
26ລາວຈະຮ້ອງຕໍ່ເຮົາວ່າ ‘ພຣະອົງເປັນພຣະບິດາຂອງຂ້ານ້ອຍ
ພຣະເຈົ້າຂອງຂ້ານ້ອຍ ແລະເປັນສີລາແຫ່ງຄວາມພົ້ນຂອງຂ້ານ້ອຍ’
27ແລະເຮົາຈະໃຫ້ລາວເປັນບຸດຫົວປີຂອງເຮົາດ້ວຍ
ສູງກວ່າບັນດາກະສັດແຫ່ງແຜ່ນດິນໂລກ
28ເຮົາຈະເກັບຄວາມເມດຕາຂອງເຮົາໄວ້ໃຫ້ລາວເປັນນິດ
ແລະຄຳໝັ້ນສັນຍາຂອງເຮົາຈະຕັ້ງໝັ້ນຄົງຢູ່ເພື່ອລາວ
29ເຮົາຈະສະຖາປະນາເຊື້ອສາຍຂອງລາວໄວ້ເປັນນິດ
ທັງບັນລັງຂອງລາວໃຫ້ດຳລົງຕາບເທົ່າເວລາຂອງຟ້າສະຫວັນ
30ຖ້າລູກຫລານຂອງລາວຖິ້ມບັນຍັດຂອງເຮົາ
ແລະບໍ່ດຳເນີນຕາມຄຳຕັດສິນຂອງເຮົາ
31ຖ້າພວກເຂົາທັງຫລາຍຝ່າຝືນກົດເກນຂອງເຮົາ
ແລະບໍ່ໄດ້ຮັກສາບັນຍັດຂອງເຮົາ
32ແລ້ວເຮົາຈະລົງໂທດການລະເມີດຂອງພວກເຂົາດ້ວຍໄມ້ແສ້
ແລະຄວາມຊົ່ວຊ້າຂອງພວກເຂົາດ້ວຍການຂ້ຽນຕີ
33ແຕ່ຈະບໍ່ຖອນຄວາມເມດຕາຂອງເຮົາໄປຈາກລາວ
ຫລືລະເມີດຕໍ່ຄວາມສັດຊື່ຂອງເຮົາ
34ເຮົາຈະບໍ່ຝ່າຝືນຄຳໝັ້ນສັນຍາຂອງເຮົາ
ຫລືພິກປີ້ນຖ້ອຍຄຳທີ່ອອກໄປຈາກຮີມປາກຂອງເຮົາ
35ເຮົາປະຕິຍານດ້ວຍຄວາມບໍລິສຸດຂອງເຮົາເດັດຂາດວ່າ
ເຮົາຈະບໍ່ຂີ້ຕົວະຕໍ່ດາວິດ
36ເຊື້ອສາຍຂອງລາວຈະດຳລົງຢູ່ເປັນນິດ
ບັນລັງຂອງລາວຈະຢືນຍາວເໝືອນຢ່າງດວງອາທິດຕໍ່ໜ້າເຮົາ
37ຈະສະຖາປະນາໄວ້ເໝືອນດັ່ງດວງຈັນເປັນນິດ
ແລະເປັນຊັກຂີພະຍານອັນສັດຊື່ໃນທ້ອງຟ້າ”
38ແຕ່ພຣະອົງໄດ້ຖິ້ມອອກໄປ ແລະກຽດຊັງ
ພຣະອົງຊົງພຣະພິໂລດຕໍ່ຜູ້ທີ່ເຈີມໄວ້ຂອງພຣະອົງ
39ພຣະອົງໄດ້ບອກເລີກຄຳໝັ້ນສັນຍາກັບຜູ້ຮັບໃຊ້ຂອງພຣະອົງ
ພຣະອົງຊົງເຮັດໃຫ້ມົງກຸດຂອງເພິ່ນເປັນມົນທິນໂດຍຖິ້ມລົງສູ່ພື້ນດິນ
40ພຣະອົງໄດ້ພັງຮົ້ວຂອງເພິ່ນທັງໝົດ
ພຣະອົງເຮັດໃຫ້ທີ່ກຳບັງເຂັ້ມແຂງຂອງເພິ່ນຫັກເພພັງ
41ຄົນທັງປວງທີ່ຜ່ານໄປກໍປຸ້ນເພິ່ນ ເພິ່ນກາຍເປັນທີ່ນິນທາຂອງເພື່ອນບ້ານ
42ພຣະອົງຍົກຍ້ອງມືຂວາຂອງສັດຕູຂອງເພິ່ນ
ພຣະອົງເຮັດໃຫ້ສັດຕູທັງໝົດຂອງເພິ່ນຊົມຊື່ນຍິນດີ
43ຈິງແທ້ ພຣະອົງຫັນຄົມດາບຂອງເພິ່ນ
ແລະພຣະອົງບໍ່ໄດ້ເຮັດໃຫ້ເພິ່ນຕັ້ງໝັ້ນຢູ່ໃນສົງຄາມ
44ພຣະອົງໄດ້ເຮັດໃຫ້ສະຫງ່າຂອງເພິ່ນເສື່ອມສູນໄປ
ແລະຖິ້ມບັນລັງຂອງເພິ່ນລົງສູ່ພື້ນດິນ
45ພຣະອົງຕັດໄວໜຸ່ມຂອງເພິ່ນໃຫ້ສັ້ນເຂົ້າ ແລະຄຸມເພິ່ນໄວ້ດ້ວຍຄວາມອັບອາຍ
46ຂ້າແດ່ພຣະຜູ້ເປັນເຈົ້າ ພຣະອົງຈະເຊື່ອງພຣະອົງເອງຢູ່ດົນເທົ່າໃດ ເປັນນິດຫລື
ພຣະພິໂລດຂອງພຣະອົງຈະໄໝ້ຢູ່ດົນເທົ່າໃດ
47ຂໍລະນຶກວ່າ ຊ່ວງຊີວິດຂອງຂ້ານ້ອຍສັ້ນເທົ່າໃດ
ເຫດໃດພຣະອົງເນລະມິດສ້າງບັນດາມະນຸດມາຢ່າງໄຮ້ປະໂຫຍດ
48ມະນຸດຄົນໃດມີຊີວິດຢູ່ໄດ້ໂດຍບໍ່ຕ້ອງເຫັນຄວາມຕາຍ
ລາວຈະຊ່ວຍຈິດວິນຍານຂອງຕົນໃຫ້ພົ້ນຈາກມືຂອງຄວາມຕາຍໄດ້ຫລື
49ຂ້າແດ່ອົງພຣະຜູ້ເປັນເຈົ້າ ຄວາມເມດຕາໃນເວລາກ່ອນຂອງພຣະອົງຢູ່ທີ່ໃດ
ຊຶ່ງພຣະອົງປະຕິຍານຕໍ່ດາວິດໂດຍຄວາມຈິງຂອງພຣະອົງ
50ຂ້າແດ່ອົງພຣະຜູ້ເປັນເຈົ້າ ຂໍລະນຶກວ່າຜູ້ຮັບໃຊ້ຂອງພຣະອົງຖືກປ້ອຍດ່າຢ່າງໃດ
ແລະຂ້ານ້ອຍຮັບການໝິ່ນປະໝາດຂອງບັນດາຊົນຊາດ
ທີ່ມີອຳນາດໃຫຍ່ໄວ້ໃນເອິກຂອງຂ້ານ້ອຍຢ່າງໃດ
51ຂ້າແດ່ພຣະຜູ້ເປັນເຈົ້າ ນັ້ນແຫລະ ສັດຕູຂອງພຣະອົງໄດ້ເຍາະເຍີ້ຍ
ນັ້ນແຫລະ ພວກເຂົາເຍາະເຍີ້ຍຮອຍຕີນຂອງຜູ້ທີ່ເຈີມໄວ້ຂອງພຣະອົງ
52ສາທຸການແດ່ພຣະຜູ້ເປັນເຈົ້າເປັນນິດ ອາແມນ ແລະອາແມນ