1ຂ້າແດ່ພຣະຜູ້ເປັນເຈົ້າ ຂໍພຣະອົງຢ່າຊົງຫລົງລືມກະສັດດາວິດ
ແລະວຽກງານທຸກຢ່າງທີ່ເພິ່ນໄດ້ເຮັດມາ.
2ຂ້າແດ່ພຣະຜູ້ເປັນເຈົ້າ ຂໍພຣະອົງຊົງລະນຶກເຖິງຄຳສັນຍາ ແລະຄຳສາບານ
ທີ່ເພິ່ນມີຕໍ່ພຣະຜູ້ເປັນເຈົ້າອົງຊົງມີອຳນາດຍິ່ງໃຫຍ່
ຂອງພວກອິສຣາເອນດັ່ງນີ້.
3ຂ້ານ້ອຍຈະບໍ່ເຂົ້າໄປໃນເຮືອນ ຫລືເຂົ້າໄປນອນ
4ຂ້ານ້ອຍຈະບໍ່ພັກຜ່ອນ ຫລືຫລັບນອນ.
5ຈົນກວ່າຂ້ານ້ອຍໄດ້ຈັດຕຽມບ່ອນສຳລັບພຣະຜູ້ເປັນເຈົ້າ
ແລະທີ່ປະທັບສຳລັບພຣະເຈົ້າອົງຊົງມີອຳນາດຍິ່ງໃຫຍ່
ຂອງພວກອິສຣາເອນ.
6ພວກຂ້ານ້ອຍໄດ້ຍິນເຖິງເລື່ອງຫີບຄຳສັນຍາຢູ່ເມືອງເອຟຣາທາ
ແລະໄດ້ພົບຫີບນີ້ຢູ່ໃນທົ່ງຫຍ້າຢາອານ.
7ພວກຂ້ານ້ອຍຈຶ່ງໄດ້ເວົ້າວ່າ
ຂໍໃຫ້ພວກເຮົາໄປທີ່ປະທັບຂອງພຣະຜູ້ເປັນເຈົ້າ
ແລະເຂົ້າເຝົ້ານະມັດສະການຕໍ່ໜ້າພຣະທີ່ນັ່ງຂອງພຣະອົງ.
8ຂ້າແດ່ພຣະຜູ້ເປັນເຈົ້າ ຂໍພຣະອົງສະເດັດມາຍັງບ່ອນພັກຜ່ອນຂອງພຣະອົງ
ພ້ອມກັບຫີບຄຳສັນຍາ
ຊຶ່ງເປັນສັນຍາລັກແຫ່ງອຳນາດຂອງພຣະອົງ.
9ຂໍໃຫ້ພວກປະໂລຫິດປະກອບດ້ວຍຄວາມຊອບທຳ
ຂໍໃຫ້ໄພ່ພົນຂອງພຣະອົງທຸກຄົນໂຮຮ້ອງດ້ວຍຄວາມຍິນດີ.
10ຂ້າແດ່ພຣະຜູ້ເປັນເຈົ້າ ພຣະອົງຊົງສັນຍາກັບດາວິດຜູ້ຮັບໃຊ້ຂອງພຣະອົງ
ຂໍພຣະອົງຢ່າຊົງປະຕິເສດເຈົ້າຊີວິດທີ່ພຣະອົງຊົງເລືອກໄວ້.
11ພຣະອົງຊົງສັນຍາຢ່າງໝັ້ນຄົງຕໍ່ດາວິດວ່າ,
“ພາຍຫລັງເຈົ້ານີ້ ເຮົາຈະແຕ່ງຕັ້ງລູກຊາຍຂອງເຈົ້າໃຫ້ຂຶ້ນປົກຄອງ.
12ຖ້າວ່າລູກຫລານຂອງເຈົ້າສັດຊື່ຕໍ່ຄຳໝັ້ນສັນຍາຂອງເຮົາ
ແລະຂໍ້ຄຳສັ່ງທີ່ເຮົາໄດ້ໃຫ້ແກ່ພວກເຂົາ
ບັນດາລູກຊາຍຂອງພວກເຂົາຈະເປັນເຈົ້າຊີວິດປົກຄອງ
ຄືກັບເຈົ້າສືບຕໍ່ກັນໄປ”
ພຣະອົງຈະບໍ່ຖອນຄຳສັນຍານີ້ຄືນ.
13ພຣະຜູ້ເປັນເຈົ້າຊົງເລືອກເມືອງຊີໂອນໄວ້
ພຣະອົງມີພຣະປະສົງສ້າງທີ່ປະທັບຂອງພຣະອົງໄວ້ທີ່ນັ້ນ
ຄືພຣະອົງຊົງກ່າວວ່າ,
14“ນີ້ແມ່ນບ່ອນທີ່ເຮົາຢາກຢູ່
ແລະເປັນບ່ອນທີ່ເຮົາຢາກປົກຄອງຕະຫລອດໄປ.
15ເຮົາຈະຈັດຕຽມເມືອງຊີໂອນນີ້ໄວ້ໃຫ້ອຸດົມສົມບູນ
ເຮົາຈະເອົາສະບຽງອາຫານໃຫ້ຄົນທຸກຍາກໃນເມືອງນີ້.
16ເຮົາຈະໃຫ້ພວກປະໂລຫິດຂອງເມືອງນີ້ປະກາດວ່າ
ເຮົາເປັນຜູ້ຊ່ອຍໃຫ້ພົ້ນໄພ
ແລ້ວປະຊາຊົນຈະຮ້ອງເພງໂຮຮ້ອງດ້ວຍຄວາມຍິນດີ.
17ໃນເມືອງນີ້ເຮົາຈະແຕ່ງຕັ້ງຜູ້ໜຶ່ງໃນເຊື້ອສາຍຂອງດາວິດ
ເປັນເຈົ້າຊີວິດອົງຍິ່ງໃຫຍ່
ແລະເຮົາຈະໃຫ້ເຈົ້າຊີວິດອົງນີ້ເປັນຜູ້ປົກຄອງ.
18ເຮົາຈະເຮັດໃຫ້ສັດຕູຂອງລາວໄດ້ຮັບຄວາມອັບອາຍ
ແຕ່ວ່າລາຊະອານາຈັກຂອງລາວຈະຮຸ່ງເຮືອງ ແລະອຸດົມສົມບູນ.”