1ສຸພາສິດຂອງໂຊໂລໂມນ ລູກຊາຍທີ່ສະຫລາດເຮັດໃຫ້ພໍ່ຍິນດີ
ແຕ່ລູກຊາຍທີ່ໂງ່ເປັນຄວາມໂສກເສົ້າຂອງແມ່ລາວ
2ຄັງຊັບຊົ່ວຮ້າຍບໍ່ເປັນກຳໄລ
ແຕ່ຄວາມຊອບທຳຊ່ວຍໃຫ້ພົ້ນຈາກຄວາມຕາຍ
3ພຣະຜູ້ເປັນເຈົ້າຈະບໍ່ຊົງປ່ອຍໃຫ້ຈິດໃຈຄົນຊອບທຳອຶດຫິວ
ແຕ່ພຣະອົງຊົງປະຖິ້ມຊັບສົມບັດຂອງຄົນຊົ່ວຮ້າຍ
4ມືທີ່ຂີ້ຄ້ານເປັນເຫດໃຫ້ເກີດຄວາມຍາກຈົນ
ແຕ່ມືທີ່ຂະຫຍັນໝັ່ນພຽນເຮັດໃຫ້ຮັ່ງມີ
5ຜູ້ທີ່ຮວບຮວມໄວ້ໃນລະດູແລ້ງກໍເປັນລູກຊາຍທີ່ສະຫລາດ
ແຕ່ຜູ້ຫລັບນອນໃນລະດູເກັບກ່ຽວກໍເປັນລູກຊາຍທີ່ນຳຄວາມອັບອາຍມາ
6ພຣະພອນຢູ່ເທິງຫົວຂອງຄົນຍຸດຕິທຳ
ແຕ່ຄວາມທາລຸນປົກຄຸມປາກຄົນຊົ່ວຮ້າຍ
7ການລະນຶກເຖິງຄົນຍຸດຕິທຳເປັນພຣະພອນ
ແຕ່ຊື່ສຽງຂອງຄົນຊົ່ວຮ້າຍຈະເນົ່າເໝັນ
8ຜູ້ທີ່ມີໃຈປະກອບດ້ວຍປັນຍາຈະຍອມຮັບບັນຍັດ
ແຕ່ຄົນທີ່ເວົ້າໂງ່ໆຈະລົ້ມລົງ
9ຜູ້ໃດທີ່ດຳເນີນໃນຄວາມທ່ຽງທຳ ກໍດຳເນີນຢ່າງໝັ້ນຄົງດີ
ແຕ່ຜູ້ທີ່ເຮັດທາງຂອງຕົນໃຫ້ຊົ່ວກໍຈະປາກົດແຈ້ງແກ່ຄົນອື່ນ
10ຜູ້ທີ່ຂະຫຍິບຕາ ກໍກໍ່ຄວາມໂສກເສົ້າ
ແຕ່ຄົນທີ່ເວົ້າໂງ່ໆຈະລົ້ມລົງ
11ປາກຂອງຄົນຊອບທຳເປັນບໍ່ນ້ຳແຫ່ງຊີວິດ
ແຕ່ຄວາມທາລຸນປົກຄຸມປາກຄົນຊົ່ວຮ້າຍ
12ຄວາມກຽດຊັງເຮັດໃຫ້ເກີດຄວາມຜິດກັນ
ແຕ່ຄວາມຮັກປົກຄຸມບັນດາຄວາມຜິດບາບເສຍ
13ຮີມປາກຂອງຜູ້ທີ່ມີຄວາມເຂົ້າໃຈຈະພົບປັນຍາ
ແຕ່ໄມ້ແສ້ ກໍເໝາະສຳລັບຫລັງຂອງຜູ້ທີ່ຂາດຄວາມເຂົ້າໃຈ
14ນັກປາດກໍຮວບຮວມຄວາມຮູ້ໄວ້
ແຕ່ປາກຂອງຄົນໂງ່ນຳຄວາມຈິບຫາຍມາໃກ້
15ຊັບສົມບັດຂອງຄົນຮັ່ງມີຄືເມືອງອັນເຂັ້ມແຂງຂອງພວກເຂົາ
ແຕ່ຄວາມຍາກຈົນຂອງຄົນຈົນຄືຄວາມຈິບຫາຍຂອງພວກເຂົາ
16ຜົນງານຂອງຄົນຊອບທຳນຳໄປເຖິງຊີວິດ
ແຕ່ຜົນຂອງຄົນຊົ່ວຮ້າຍນຳໄປເຖິງຄວາມບາບ
17ຜູ້ທີ່ຮັກສາຄຳສັ່ງສອນກໍຢູ່ໃນການວິຖີທາງແຫ່ງຊີວິດ
ແຕ່ຜູ້ປະຕິເສດຄຳເຕືອນສະຕິ ກໍຫລົງເຮັດບາບເສຍ
18ຜູ້ປິດບັງຄວາມກຽດຊັງດ້ວຍຮີມປາກຂີ້ຕົວະ
ແລະຜູ້ອອກປາກໃສ່ຮ້າຍ ກໍເປັນຄົນໂງ່
19ການເວົ້າຫລາຍ ກໍຈະບໍ່ຂາດຄວາມຜິດບາບ
ແຕ່ຜູ້ຫ້າມຮີມປາກຂອງຕົນ ກໍເປັນຜູ້ທີ່ສະຫລາດ
20ລີ້ນຂອງຄົນຍຸດຕິທຳ ກໍເໝືອນກັບເງິນເນື້ອບໍລິສຸດ
ຄວາມຄິດຂອງຄົນຊົ່ວຮ້າຍມີຄ່າແຕ່ໜ້ອຍດຽວ
21ຮີມປາກຂອງຄົນຊອບທຳລ້ຽງຄົນເປັນຈຳນວນຫລາຍ
ແຕ່ຄົນໂງ່ຕາຍ ເພາະຂາດສະຕິປັນຍາ
22ພຣະພອນຂອງພຣະຜູ້ເປັນເຈົ້າເຮັດໃຫ້ຮັ່ງມີ
ແລະພຣະອົງບໍ່ໄດ້ແຖມຄວາມໂສກເສົ້າໄວ້ດ້ວຍ
23ຄົນໂງ່ເຮັດຄວາມຜິດເໝືອນກັບການຫລິ້ນສະໜຸກ
ແຕ່ຄົນທີ່ມີຄວາມເຂົ້າໃຈກໍປົນດ້ວຍປັນຍາ
24ສິ່ງໃດທີ່ຄົນຊົ່ວຮ້າຍຄິດຢ້ານ ມັນຈະມາເຖິງລາວ
ແຕ່ສິ່ງໃດທີ່ຄົນຊອບທຳປາດຖະໜາຈະຊົງປະທານໃຫ້
25ລົມບ້າໝູຜ່ານໄປສັນໃດ ຄົນຊົ່ວກໍບໍ່ມີອີກສັນນັ້ນ
ແຕ່ຄົນຊອບທຳເປັນຮາກຖານທີ່ຢູ່ເປັນນິດ
26ນ້ຳສົ້ມກັບແຂ້ວ ແລະຄວັນກັບຕາເປັນສັນໃດ
ຄົນຂີ້ຄ້ານກັບຜູ້ທີ່ໃຊ້ລາວໄປ ກໍເປັນຢ່າງນັ້ນ
27ຄວາມຢຳເກງພຣະຜູ້ເປັນເຈົ້ານັ້ນຍືດຊີວິດໃຫ້ຍາວອອກ
ແຕ່ປີເດືອນຂອງຄົນຊົ່ວຮ້າຍນັ້ນຈະສັ້ນເຂົ້າ
28ຄວາມຫວັງຂອງຄົນຊອບທຳຈະຈົບລົງໃນຄວາມຍິນດີ
ແຕ່ຄວາມມຸ້ງຫວັງຂອງຄວາມຊົ່ວຮ້າຍກໍຈະສູນເປົ່າ
29ເສັ້ນທາງຂອງພຣະຜູ້ເປັນເຈົ້າຊົງເປັນກຳລັງແກ່ຜູ້ທ່ຽງທຳ
ແຕ່ຜູ້ເຮັດຄວາມຊົ່ວຊ້າຈະຖືກທຳລາຍ
30ຜູ້ຊອບທຳຈະບໍ່ຖືກກຳຈັດເລີຍ
ແຕ່ຄົນຊົ່ວຮ້າຍຈະບໍ່ໄດ້ຢູ່ໃນແຜ່ນດິນ
31ປາກຂອງຄົນຍຸດຕິທຳນຳປັນຍາອອກມາ
ແຕ່ລີ້ນຂອງຄົນປະຈົບປະແຈງຈະຖືກຕັດອອກ
32ຮີມປາກຂອງຄົນຊອບທຳຮູ້ວ່າອັນໃດເໝາະສົມ
ແຕ່ປາກຂອງຄົນຊົ່ວຮ້າຍຮູ້ວ່າສິ່ງໃດປະຈົບປະແຈງ