1ຫົວໜ້າຄອບຄົວຄົນກິເລອາດ ລູກຊາຍຂອງມາກີ ຜູ້ເປັນລູກຊາຍມານາເຊ ຄອບຄົວຕ່າງໆຂອງລູກຊາຍໂຢເຊັບ ເຂົ້າມາໃກ້ ແລະເວົ້າຕໍ່ໜ້າໂມເຊ ແລະຕໍ່ໜ້າຫົວໜ້າ ຄືບັນດາຫົວໜ້າຄົນອິສຣາເອນ2ພວກເຂົາເວົ້າວ່າ “ພຣະຜູ້ເປັນເຈົ້າໄດ້ບອກເຈົ້ານາຍຂອງຂ້ານ້ອຍໃຫ້ຈັບສະຫລາກຍົກແຜ່ນດິນ ໃຫ້ເປັນມໍລະດົກແກ່ຄົນອິສຣາເອນ ແລະເຈົ້ານາຍຂອງຂ້ານ້ອຍໄດ້ຮັບບັນຊາຈາກພຣະຜູ້ເປັນເຈົ້າໃຫ້ຍົກມໍລະດົກຂອງເຊໂລເຟຂາດພີ່ນ້ອງຂອງພວກເຮົາແກ່ລູກສາວຂອງລາວ3ຖ້ານາງທັງຫລາຍແຕ່ງງານກັບລູກຊາຍທັງຫລາຍຂອງຄົນອິສຣາເອນຕະກູນອື່ນແລ້ວ ສ່ວນມໍລະດົກຂອງ ບັນພະບູລຸດຂອງພວກເຮົາຈະເພີ່ມໃຫ້ກັບມໍລະດົກຂອງຄົນຕະກູນທີ່ນາງໄປຢູ່ນຳ ເພາະສະນັ້ນຈຶ່ງເປັນການນຳມໍລະດົກໄປຈາກສ່ວນທີ່ເປັນຂອງພວກເຮົາ4ແລະເມື່ອເຖິງປີແຫ່ງສຽງເຂົາສັດຂອງຄົນອິສຣາເອນ ມໍລະດົກທີ່ເປັນສ່ວນຂອງນາງກໍຈະຖືກຍົກໄປເພີ່ມເຂົ້າກັບສ່ວນຂອງຕະກູນທີ່ນາງໄປຢູ່ນຳ ຈຶ່ງເປັນການນຳເອົາສ່ວນມໍລະດົກຂອງນາງໄປຈາກສ່ວນມໍລະດົກຂອງຕະກູນພໍ່ຂອງພວກເຮົາ”
5ແລະໂມເຊບອກຄົນອິສຣາເອນຕາມພຣະຄຳສັ່ງຂອງພຣະຜູ້ເປັນເຈົ້າວ່າ “ຕະກູນຄົນໂຢເຊັບ ເວົ້າຖືກຕ້ອງແລ້ວ6ນີ້ຄືສິ່ງທີ່ພຣະຜູ້ເປັນເຈົ້າໄດ້ບັນຊາກ່ຽວກັບລູກສາວຂອງເຊໂລເຟຂາດ ວ່າ ‘ຈົ່ງໃຫ້ນາງແຕ່ງງານກັບໃຜກໍໄດ້ທີ່ນາງພໍໃຈ ແຕ່ນາງຕ້ອງແຕ່ງງານກັບຄົນພາຍໃນຄອບຄົວຕະກູນພໍ່ຂອງນາງເທົ່ານັ້ນ7ດັ່ງນີ້ແຫລະ ສ່ວນມໍລະດົກຂອງຄົນອິສຣາເອນຈະບໍ່ຖືກຍົກຍ້າຍຈາກຕະກູນໜຶ່ງໄປໃຫ້ອີກຕະກູນໜຶ່ງຄົນອິສຣາເອນທຸກຄົນຕ້ອງຢູ່ໃນມໍລະດົກຂອງຕະກູນບັນພະບູລຸດຂອງຕົນ8ແລະລູກສາວທຸກຄົນ ຜູ້ທີ່ຮັບກຳມະສິດມໍລະດົກໃນຕະກູນອິສຣາເອນຕະກູນໃດ ກໍໃຫ້ເປັນເມຍຂອງຄົນໃດຄົນໜຶ່ງໃນຄອບຄົວໃນຕະກູນພໍ່ຂອງຕົນ ເພື່ອຄົນອິສຣາເອນທຸກຄົນຈະໄດ້ຖືກຳມະສິດມໍລະດົກຂອງພໍ່ຂອງພວກເຂົາ9ດັ່ງນັ້ນ ຈະບໍ່ມີມໍລະດົກທີ່ຖືກໂຍກຍ້າຍຈາກຕະກູນໜຶ່ງໄປອີກຕະກູນໜຶ່ງ ເພາະວ່າຄົນ ອິສຣາເອນແຕ່ລະຕະກູນຄວນຢູ່ໃນທີ່ມໍລະດົກຂອງຕົນ’”
10ພຣະຜູ້ເປັນເຈົ້າຊົງບອກໂມເຊຢ່າງໃດ ລູກສາວທັງຫລາຍຂອງເຊໂລເຟຂາດກໍປະຕິບັດຢ່າງນັ້ນ11ເພາະວ່າມາລາ ຕີຣະຊາ ໂຮກລາ ມີລະກາ ແລະໂນອາ ລູກສາວຂອງເຊໂລເຟຂາດໄດ້ແຕ່ງງານກັບລູກຊາຍທັງຫລາຍຂອງພີ່ນ້ອງພໍ່ຂອງຕົນ12ນາງໄດ້ແຕ່ງງານກັບຄອບຄົວມານາເຊລູກຊາຍຂອງໂຢເຊັບແລະສ່ວນມໍລະດົກຂອງນາງກໍຍັງຢູ່ໃນຕະກູນພໍ່ຂອງນາງ
13ຂໍ້ຄວາມເຫລົ່ານີ້ເປັນບົດບັນຍັດ ແລະຄຳຕັດສິນຊຶ່ງພຣະຜູ້ເປັນເຈົ້າໄດ້ຊົງສັ່ງຜ່ານທາງ ໂມເຊແກ່ຄົນອິສຣາເອນ ໃນທົ່ງພຽງໂມອາບແຄມແມ່ນ້ຳຢໍແດນໃກ້ກັບເມືອງເຢຣິໂກ