1ໜັງສືລຳດັບເຊື້ອວົງຂອງພຣະເຢຊູຄຣິດ ຜູ້ເປັນເຊື້ອສາຍຂອງດາວິດ ຜູ້ສືບກະກູນເນື່ອງມາຈາກອັບຣາຮາມ.
2ອັບຣາຮາມມີບຸດຊາຍຊື່ອີຊາກ ອີຊາກມີບຸດຊາຍຊື່ຢາໂຄບ ຢາໂຄບມີບຸດຊາຍຊື່ຢູດາ ແລະອ້າຍນ້ອງຂອງຕົນ.3ຢູດາມີບຸດຊາຍຊື່ເປເຣັດແລະເຊຣາ ເກີດຈາກນາງຕາມາ ເປເຣັດມີບຸດຊາຍຊື່ເຮດຊະໂຣນ, ເຮດຊະໂຣນມີບຸດຊາຍຊື່ຣາມ.4ຣາມມີບຸດຊາຍຊື່ອຳມີນາດາບ ອຳມີນາດາບມີບຸດຊາຍຊື່ນາໂຊນ ນາໂຊນມີບຸດຊາຍຊື່ຊັນໂມນ.5ຊັນໂມນມີບຸດຊາຍຊື່ໂບອາດ ເກີດຈາກນາງຣາຮາບ ໂບອາດມີບຸດຊາຍຊື່ໂອເບັດ ເກີດຈາກນາງຣຸດ ໂອເບັດມີບຸດຊາຍຊື່ເຢຊີ.6ເຢຊີມີບຸດຊາຍຊື່ດາວິດ ຜູ້ຊົງເປັນກະສັດ.
ກະສັດດາວິດຊົງມີບຸດຊາຍຊື່ໂຊໂລໂມນ ຊົງເກີດຈາກນາງຊຶ່ງແຕ່ກ່ອນເປັນພັນລະຍາຂອງອູຣີຢາ.7ກະສັດໂຊໂລໂມນຊົງມີບຸດຊາຍຊື່ເຣໂຮໂບອາມ ເຣໂຮໂບອາມມີບຸດຊາຍຊື່ອະບີຢາ ອະບີຢາມີບຸດຊາຍຊື່ອາຊາ.8ອາຊາມີບຸດຊາຍຊື່ເຢໂຮຊາຟັດ ເຢໂຮຊາຟັດມີບຸດຊາຍຊື່ໂຢຣາມ ໂຢຣາມມີບຸດຊາຍຊື່ອຸດຊີຢາ.9ອຸດຊີຢາມີບຸດຊາຍຊື່ໂຢທາມ ໂຢທາມມີບຸດຊາຍຊື່ອາຮາດ ອາຮາດມີບຸດຊາຍຊື່ເຮເຊກີຢາ.10ເຮເຊກີຢາມີບຸດຊາຍຊື່ມານາເຊ ມານາເຊມີບຸດຊາຍຊື່ອາໂມນ ອາໂມນມີບຸດຊາຍຊື່ໂຢສີຢາ.11ໂຢສີຢາມີບຸດຊາຍຊື່ເຢໂຮຢາກິນ ກັບພວກອ້າຍນ້ອງຂອງຕົນ ເກີດໃນເວລາຖືກກວາດໄປຍັງກຸງບາບີໂລນ.
12ຄັນຖືກກວາດໄປຍັງກຸງບາບີໂລນແລ້ວ ເຢໂຮຢາກິນກໍມີບຸດຊາຍຊື່ເຊອານຕີເອນ ເຊອານຕີເອນມີບຸດຊາຍຊື່ເຊຣູບາເບນ.13ເຊຣູບາເບນມີບຸດຊາຍຊື່ອາບີອຸດ ອາບີອຸດມີບຸດຊາຍຊື່ເອລີຢາກີມ ເອລີຢາກີມມີບຸດຊາຍຊື່ອາໂຊ.14ອາໂຊມີບຸດຊາຍຊື່ຊາໂດກ ຊາໂດກມີບຸດຊາຍຊື່ອາຂີມ ອາຂີມມີບຸດຊາຍຊື່ເອລີອຸດ.15ເອລີອຸດມີບຸດຊາຍຊື່ເອເລອາຊາ ເອເລອາຊາມີບຸດຊາຍຊື່ມັດທານ ມັດທານມີບຸດຊາຍຊື່ຢາໂຄບ.16ຢາໂຄບມີບຸດຊາຍຊື່ໂຢເຊັບ ຜູ້ເປັນສາມີຂອງນາງມາຣິອາ ພຣະເຢຊູຜູ້ທີ່ເອີ້ນວ່າພຣະຄຣິດ ກໍຊົງບັງເກີດມາຈາກນາງມາຣິອາຜູ້ນີ້.
17ດັ່ງນັ້ນນັບຕັ້ງແຕ່ອັບຣາຮາມລົງມາຈົນເຖິງກະສັດດາວິດຈິ່ງເປັນສິບສີ່ຊົ່ວຄົນ ນັບຕັ້ງແຕ່ກະສັດດາວິດຈົນເຖິງຄາວຖືກກວາດໄປຍັງກຸງບາບີໂລນ ເປັນເວລາສິບສີ່ຊົ່ວຄົນ ແລະນັບຕັ້ງແຕ່ຄາວຖືກກວາດໄປຍັງກຸງບາບີໂລນຈົນເຖິງພຣະຄຣິດ ເປັນເວລາສິບສີ່ຊົ່ວຄົນ.
18ເລື່ອງພຣະກຳເນີດຂອງພຣະເຢຊູຄຣິດເປັນດັ່ງນີ້: ຄືນາງມາຣິອາຜູ້ເປັນມານດາຂອງພຣະເຢຊູນັ້ນ ໄດ້ເປັນຄູ່ໝັ້ນກັບໂຢເຊັບແລ້ວ ກ່ອນເວລາເຂົາໄດ້ເປັນຄູ່ຜົວເມຍກັນກໍປະກົດວ່າ ນາງມີທ້ອງແລ້ວດ້ວຍລິດເດດພຣະວິນຍານບໍລິສຸດ.19ຝ່າຍໂຢເຊັບຜູ້ເປັນຄູ່ໝັ້ນຂອງນາງເປັນຄົນມີສິນທຳ ແຕ່ປານນັ້ນເພິ່ນບໍ່ຢາກໃຫ້ເລື່ອງນີ້ເປັນທີ່ອັບອາຍຂາຍໜ້າແກ່ນາງ ຈິ່ງຕັດສີນໃຈວ່າຈະຖອນໝັ້ນເສຍຢ່າງລັບໆ.20ແຕ່ເມື່ອໂຢເຊັບຍັງຄຶດໃນເລື່ອງນີ້ຢູ່ ກໍມີເທວະດາຕົນໜຶ່ງຂອງພຣະຜູ້ເປັນເຈົ້າມາປະກົດແກ່ໂຢເຊັບໃນຄວາມຝັນວ່າ, “ໂຢເຊັບບຸດດາວິດເອີຍ, ຢ່າຊູ່ຢ້ານທີ່ຈະຮັບນາງມາຣິອາມາເປັນເມຍຂອງເຈົ້າ ເພາະວ່າຜູ້ຊຶ່ງປະຕິສົນທິໃນທ້ອງຂອງນາງກໍເປັນໂດຍເດດພຣະວິນຍານບໍລິສຸດ.21ນາງຈະປະສູດບຸດ ແລ້ວເຈົ້າຈົ່ງຖວາຍນາມທ່ານວ່າ ‘ເຢຊູ’ ເພາະວ່າທ່ານຜູ້ນີ້ແຫລະ, ຈະເປັນຜູ້ໂຜດໄພ່ພົນຂອງຕົນໃຫ້ລອດພົ້ນຈາກຄວາມຜິດບາບຂອງເຂົາ.”22ການທັງປວງນີ້ເກີດຂຶ້ນເພື່ອຈະໃຫ້ສຳເລັດ ຕາມທີ່ພຣະຜູ້ເປັນເຈົ້າໄດ້ຊົງກ່າວໄວ້ດ້ວຍຜູ້ປະກາດພຣະທຳວ່າ.23“ເບິ່ງແມ, ຍິງພົມຈະລີນັ້ນຈະມີທ້ອງແລະປະສູດບຸດຄົນໜຶ່ງ, ແລະເຂົາຈະເອີ້ນຊື່ບຸດນັ້ນວ່າ ‘ເອມານູເອນ’” (ແປວ່າ “ພຣະເຈົ້າຊົງສະຖິດຢູ່ກັບເຮົາທັງຫລາຍ”).24ເມື່ອໂຢເຊັບຕື່ນຂຶ້ນກໍເຮັດຕາມຄຳທີ່ເທວະດາຂອງພຣະຜູ້ເປັນເຈົ້າສັ່ງນັ້ນ ຄືຮັບເອົານາງມາຣິອາມາເປັນພັນລະຍາຂອງຕົນ.25ແຕ່ບໍ່ໄດ້ສົມສູ່ຢູ່ກັບນາງຈົນປະສູດບຸດຊາຍແລ້ວ ແລະໂຢເຊັບໄດ້ເອີ້ນຊື່ບຸດນັ້ນວ່າ “ເຢຊູ”.