1“ຖ້າຜູ້ໃດເຮັດຄວາມຜິດບາບຍ້ອນໄດ້ຍິນສຽງຄຳສາບານ ແລະເປັນພະຍານ ຈຶ່ງປິດບັງສິ່ງເຫລົ່ານັ້ນທີ່ຕົນໄດ້ເຫັນ ຫລືຮູ້ຈັກ ແລະເຖິງວ່າລາວຈະເປັນພະຍານໂດຍທີ່ລາວເຫັນ ຫລືຮູ້ເລື່ອງກໍຕາມ ແຕ່ລາວບໍ່ຍອມໃຫ້ການເປັນພະຍານ ລາວຕ້ອງຮັບໂທດຕາມຄວາມຊົ່ວຊ້າຂອງລາວ2ຫລືຜູ້ໜຶ່ງຜູ້ໃດແຕະຕ້ອງສິ່ງທີ່ເປັນມົນທິນ ຈະເປັນຊາກສັດປ່າທີ່ເປັນມົນທິນ ຫລືຊາກສັດລ້ຽງທີ່ເປັນມົນທິນ ຫລືຊາກສັດເລືອຄານທີ່ເປັນມົນທິນ ໂດຍບໍ່ທັນຮູ້ຕົວ ລາວຈຶ່ງເປັນຄົນມີມົນທິນ ລາວກໍມີຄວາມຜິດ3ຫລືຖ້າລາວແຕະຕ້ອງສິ່ງອັນເປັນມົນທິນຂອງຄົນຈະເປັນສິ່ງໃດໆກໍຕາມ ຊຶ່ງເປັນມົນທິນ ອັນເປັນສິ່ງທີ່ເຮັດໃຫ້ຄົນນັ້ນເປັນມົນທິນ ໂດຍລາວບໍ່ຮູ້ຕົວ ເມື່ອລາວຮູ້ແລ້ວ ລາວກໍມີຄວາມຜິດ4ຫລືຖ້າຄົນໜຶ່ງຄົນໃດໄດ້ກ່າວຄຳສາບານໂລໆເລໆວ່າຈະເຮັດຊົ່ວ ຫລືດີ ໄດ້ກ່າວຄຳສາບານໃດໆກໍຕາມ ແລະລາວເຮັດໂດຍບໍ່ທັນຮູ້ຕົວ ເມື່ອລາວຮູ້ສຶກແລ້ວ ລາວກໍມີຄວາມຜິດ5ເມື່ອຜູ້ໜຶ່ງຜູ້ໃດເຮັດຄວາມຜິດໃດໆທີ່ກ່າວມານີ້ ກໍໃຫ້ລາວສາລະພາບຄວາມຜິດທີ່ລາວໄດ້ເຮັດ6ແລະໃຫ້ລາວເອົາເຄື່ອງບູຊາໄຖ່ຄວາມຜິດບາບມາຖວາຍແດ່ພຣະຜູ້ເປັນເຈົ້າ ເພາະບາບຊຶ່ງລາວໄດ້ເຮັດນັ້ນ ເຄື່ອງບູຊາຈະເປັນສັດໂຕແມ່ຈາກຝູງ ຄືລູກແກະ ຫລືລູກແບ້ ກໍເປັນເຄື່ອງບູຊາໄຖ່ບາບໄດ້ ແລະປະໂລຫິດຈະເຮັດການໄຖ່ບາບແທນຜູ້ທີ່ເຮັດຜິດນັ້ນ
7ຖ້າລາວບໍ່ສາມາດຖວາຍລູກແກະໂຕໜຶ່ງ ກໍໃຫ້ລາວເອົານົກເຂົາສອງໂຕ ຫລືນົກກາງແກໜຸ່ມສອງໂຕ ມາເປັນເຄື່ອງຖວາຍພຣະຜູ້ເປັນເຈົ້າ ໄຖ່ຄວາມຜິດບາບທີ່ຕົນໄດ້ເຮັດ ນົກໂຕໜຶ່ງເປັນເຄື່ອງບູຊາໄຖ່ບາບ ແລະນົກອີກໂຕໜຶ່ງເປັນເຄື່ອງເຜົາບູຊາດ້ວຍໄຟ8ໃຫ້ລາວເອົານົກທັງສອງໂຕມາໃຫ້ປະໂລຫິດ ປະໂລຫິດຈະຖວາຍນົກໂຕໜຶ່ງເປັນເຄື່ອງບູຊາໄຖ່ບາບກ່ອນ ໃຫ້ລາວບິດຫົວນົກຫລຸດອອກຈາກຄໍແຕ່ຢ່າໃຫ້ຂາດ.9ແລະປະໂລຫິດຈະເອົາເລືອດຂອງເຄື່ອງບູຊາໄຖ່ບາບມາຊິດໃສ່ຂ້າງແທ່ນບູຊາ ສ່ວນເລືອດທີ່ເຫລືອຢູ່ນັ້ນ ໃຫ້ໄຫລອອກຈາກຫີນແທ່ນ ນີ້ແມ່ນເຄື່ອງບູຊາໄຖ່ບາບ10ແລ້ວລາວຈະຖວາຍນົກໂຕທີສອງເປັນເຄື່ອງເຜົາບູຊາຕາມກົດໝາຍ ແລະປະໂລຫິດຈະເຮັດການໄຖ່ໂທດທີ່ລາວໄດ້ເຮັດໄປ ແລະລາວຈະໄດ້ຮັບການອະໄພໂທດ
11ແຕ່ຖ້າລາວບໍ່ສາມາດທີ່ຈະເອົານົກເຂົາສອງໂຕ ຫລືນົກກາງແກໜຸ່ມສອງໂຕມາ ກໍໃຫ້ລາວເອົາເຄື່ອງບູຊາໄຖ່ບາບ ຊຶ່ງລາວໄດ້ເຮັດນັ້ນມາ ຄືຍອດແປ້ງໜຶ່ງໃນສິບເອຟາເອົາມາເປັນເຄື່ອງບູຊາໄຖ່ບາບ ຢ່າໃສ່ນ້ຳມັນ ຫລືໃສ່ເຄື່ອງກຳຍານໃນແປ້ງ ເພາະເປັນເຄື່ອງບູຊາໄຖ່ບາບ12ໃຫ້ລາວເອົາແປ້ງເຂົ້າມາໃຫ້ປະໂລຫິດ ແລະປະໂລຫິດຈະເອົາແປ້ງເຂົ້າກຳມືໜຶ່ງເປັນສ່ວນທີ່ລະນຶກ ແລະເຜົາ ເທິງແທ່ນບູຊາຄືກັບເຄື່ອງເຜົາບູຊາດ້ວຍໄຟຖວາຍແດ່ພຣະຜູ້ເປັນເຈົ້າ ເປັນເຄື່ອງບູຊາໄຖ່ບາບ13ແລະປະໂລຫິດຈະເຮັດການໄຖ່ບາບຂອງລາວເພາະບາບທີ່ລາວໄດ້ເຮັດໃນເລື່ອງໃດເລື່ອງໜຶ່ງທີ່ກ່າວມານີ້ ແລະລາວຈະໄດ້ຮັບການອະໄພ ແລະສ່ວນທີ່ເຫລືອນັ້ນຈະເປັນຂອງປະໂລຫິດ ເຊັ່ນດຽວກັບເຄື່ອງຖວາຍເພື່ອຄວາມສາມັກຄີທຳ”
14ພຣະຜູ້ເປັນເຈົ້າກ່າວກັບໂມເຊວ່າ:15“ຖ້າຜູ້ໃດເຮັດການບໍ່ສັດຊື່ ແລະເຮັດບາບໂດຍບໍ່ຮູ້ຕົວໃນເລື່ອງຂອງຄວາມບໍລິສຸດແຫ່ງພຣະຜູ້ເປັນເຈົ້າ ໃຫ້ຜູ້ນັ້ນເອົາແກະໂຕຜູ້ທີ່ດີທີ່ສຸດຈາກຝູງເປັນເຄື່ອງບູຊາໄຖ່ຄວາມຜິດບາບຖວາຍແດ່ພຣະຜູ້ເປັນເຈົ້າ ໃຫ້ເຈົ້າຕີລາຄາເປັນເງິນເຊເຂຕາມເຊເຂຂອງສະຖານທີ່ບໍລິສຸດ ເປັນເຄື່ອງບູຊາໄຖ່ຄວາມຜິດບາບ16ແລະໃຫ້ຜູ້ນັ້ນເອົາມາໃຊ້ແທນຂອງບໍລິສຸດທີ່ຂາດໄປ ແລະເພີ່ມອີກໜຶ່ງໃນຫ້າຂອງລາຄາສິ່ງທີ່ຂາດໄປນັ້ນມາມອບໃຫ້ແກ່ປະໂລຫິດ ແລະ ປະໂລຫິດຈະເຮັດການໄຖ່ໂທດຂອງລາວດ້ວຍແກະຜູ້ທີ່ຖວາຍເປັນເຄື່ອງ ບູຊາໄຖ່ຄວາມຜິດບາບ ແລະລາວຈະໄດ້ຮັບການອະໄພໂທດ
17ຖ້າຜູ້ໃດເຮັດຜິດ ຄືເຮັດສິ່ງທີ່ພຣະຜູ້ເປັນເຈົ້າໄດ້ບັນຊາບໍ່ໃຫ້ເຮັດ ເຖິງແມ່ນວ່າລາວເຮັດໂດຍບໍ່ຮູ້ຕົວ ລາວກໍມີຄວາມຜິດ ຈະຕ້ອງຮັບໂທດຕາມຄວາມຊົ່ວຊ້າຂອງລາວ18ໃຫ້ຜູ້ນັ້ນເອົາແກະໂຕຜູ້ທີ່ດີທີ່ສຸດຈາກຝູງມາໃຫ້ປະໂລຫິດ ໃຫ້ເຈົ້າຕີລາຄາເປັນລາຄາເຄື່ອງບູຊາໄຖ່ຄວາມຜິດບາບ ແລະໃຫ້ປະໂລຫິດເຮັດການໄຖ່ໂທດຂອງລາວຕາມຄວາມຜິດທີ່ລາວໄດ້ເຮັດໂດຍບໍ່ໄດ້ເຈດຕະນາ ແລະລາວຈະໄດ້ຮັບການອະໄພໂທດ19ເປັນເຄື່ອງບູຊາໄຖ່ຄວາມຜິດ ເພາະລາວໄດ້ເຮັດຄວາມຜິດຕໍ່ພຣະຜູ້ເປັນເຈົ້າ”