1ພຣະຜູ້ເປັນເຈົ້າຊົງກ່າວວ່າ,
“ປະຊາຊົນອິສຣາເອນເອີຍ ຖ້າພວກເຈົ້າຢາກຈະກັບຄືນມາ
ກໍຈົ່ງກັບມາຫາເຮົາເທີ້ນ
ໃຫ້ຖິ້ມຮູບເຄົາລົບທີ່ເຮົາກຽດຊັງນັ້ນເສຍ
ແລະຢ່າໜີຫ່າງຈາກເຮົາໄປ.
2ຖ້າພວກເຈົ້າສາບານໃນນາມຂອງພຣະເຈົ້າຜູ້ມີຊີວິດຢູ່ດ້ວຍຄວາມຈິງ
ຄວາມຍຸດຕິທຳ ແລະຄວາມສັດຊື່
ຊາດທັງປວງກໍຈະອ້ອນວອນໃຫ້ເຮົາອວຍພອນພວກເຂົາ
ແລະພວກເຂົາທັງຫລາຍກໍຈະສັນລະເສີນເຮົາ.”
3ພຣະຜູ້ເປັນເຈົ້າຊົງກ່າວຕໍ່ຊາວຢູດາ ແລະຊາວເຢຣູຊາເລັມວ່າ,
“ຈົ່ງໄຖນາເຮື້ອຂອງເຈົ້າ ຢ່າຫວ່ານເມັດເຂົ້າລົງໃນກໍໜາມ.
4ຊາວຢູດາ ແລະເຢຣູຊາເລັມເອີຍ
ຈົ່ງຮັກສາຄຳໝັ້ນສັນຍາທີ່ເຈົ້າມີຕໍ່ເຮົາພຣະຜູ້ເປັນເຈົ້າຂອງເຈົ້າ
ແລະຈົ່ງມອບຈິດໃຈຂອງເຈົ້າໃຫ້ແກ່ເຮົາ
ຢ້ານວ່າຄວາມຄຽດຮ້າຍຂອງເຮົາຈະເຜົາໄໝ້ເໝືອນໄຟ
ເນື່ອງຈາກຄວາມຊົ່ວທີ່ພວກເຈົ້າໄດ້ເຮັດ
ໄຟນັ້ນຈະເຜົາໄໝ້ແລະຈະບໍ່ມີໃຜມອດໄດ້.
5ຈົ່ງເປົ່າແກໃຫ້ດັງໄປທົ່ວປະເທດ
ໃຫ້ຮ້ອງສຽງດັງຊັດແຈ້ງ
ເພື່ອບອກປະຊາຊົນຢູດາ ແລະເຢຣູຊາເລັມ
ແລ່ນເຂົ້າໄປໃນເມືອງທີ່ມີປ້ອມປ້ອງກັນ.
6ໃຫ້ຍົກທຸງມຸ່ງໜ້າໄປຍັງເມືອງຊີໂອນ
ຈົ່ງແລ່ນໄປໃຫ້ພົ້ນ ຢ່າຊ້າຢູ່
ພຣະຜູ້ເປັນເຈົ້າຈະນຳເອົາຄວາມຮ້າຍ
ແລະການທຳລາຍອັນຍິ່ງໃຫຍ່ມາຈາກທາງເໜືອ.
7ສິງໂຕໄດ້ອອກມາຈາກບ່ອນລີ້ຊ້ອນຂອງມັນແລ້ວ
ຜູ້ທຳລາຍນາໆ ຊາດໄດ້ຍ່າງອອກມາຈາກບ່ອນຂອງມັນ
ເພື່ອທຳລາຍຊາວຢູດາໃຫ້ໝົດສິ້ນໄປ
ຫົວເມືອງທັງຫລາຍຂອງຊາວຢູດາຈະເພພັງຮ້າງເປົ່າ
ແລະຈະບໍ່ມີໃຜອາໄສຢູ່ໃນເມືອງເຫລົ່ານັ້ນ.
8ດ້ວຍເຫດນີ້ ຈົ່ງນຸ່ງເຄື່ອງໄວ້ທຸກ ແລະຮ້ອງໄຫ້ຄວນຄາງ
ເພາະວ່າພຣະພິໂລດອັນຮຸນແຮງຂອງພຣະຜູ້ເປັນເຈົ້າ
ບໍ່ໄດ້ຫັນໜີໄປຈາກຊາວຢູດາເລີຍ.”
9ພຣະຜູ້ເປັນເຈົ້າກ່າວວ່າ “ຕໍ່ມາໃນມື້ນັ້ນທັງກະສັດແລະພວກເຈົ້ານາຍຈະໝົດກຳລັງໃຈ ບັນດາປະໂລຫິດຈະຕົກອົກຕົກໃຈ ແລະຜູ້ປະກາດພຣະທຳກໍຈະອັດສະຈັນໃຈ”
10ແລ້ວຂ້າພະເຈົ້າຈຶ່ງທູນວ່າ “ຂ້າແຕ່ອົງພຣະຜູ້ເປັນເຈົ້າ ພຣະອົງຊົງຫລອກລວງຊົນຊາດນີ້ ແລະກຸງເຢຣູຊາເລັມວ່າ ‘ເຈົ້າທັງຫລາຍຈະຢູ່ເຢັນເປັນສຸກ’ ແຕ່ທີ່ຈິງດາບໄດ້ມາເຖິງຊີວິດຂອງພວກເຂົາທັງຫລາຍ”
11“ໃນເທື່ອນັ້ນ ພວກເຂົາຈະກ່າວແກ່ຊົນຊາດນີ້ ແລະແກ່ກຸງເຢຣູຊາເລັມວ່າ ‘ລົມຮ້ອນຈາກບ່ອນສູງໃນຖິ່ນແຫ້ງແລ້ງທຸລະກັນດານພັດມາສູ່ບຸດສາວປະຊາຊົນຂອງເຮົາ ບໍ່ແມ່ນຈະມາຝັດ ຫລືມາຊຳລະ12ກະແສລົມທີ່ແຮງຈະພັດມາຈາກທີ່ເຫລົ່ານັ້ນມາສູ່ເຮົາ ບັດນີ້ເຮົາຈະກ່າວຄຳຕັດສິນຕໍ່ພວກເຂົາ’13ເບິ່ງແມ ພວກເຂົາຈະຂຶ້ນມາເໝືອນເມກ ລົດຮົບຂອງພວກເຂົາຈະເໝືອນລົມບ້າໝູ ມ້າທັງຫລາຍຂອງພວກເຂົາໄວຍິ່ງກວ່ານົກອິນຊີ ວິບັດແກ່ເຮົາທັງຫລາຍ ເພາະວ່າເຮົາຈະຕ້ອງຈິບຫາຍ14ກຸງເຢຣູຊາເລັມເອີຍ ຈົ່ງລ້າງຈິດໃຈຂອງເຈົ້າໃຫ້ພົ້ນຈາກຄວາມຊົ່ວຮ້າຍ ເພື່ອເຈົ້າຈະລອດພົ້ນໄດ້ ຄວາມຄິດຊົ່ວຮ້າຍຂອງເຈົ້ານັ້ນຈະສິງຢູ່ໃນໃຈຂອງເຈົ້າດົນຈັກເທົ່າໃດ15ເພາະວ່າມີສຽງປະກາດມາຈາກເມືອງດານ ແລະໂຄສະນາຄວາມຊົ່ວຮ້າຍຈາກພູເຂົາເອຟຣາຢິມ16ຈົ່ງກ່າວແກ່ບັນດາປະຊາຊາດ ເບິ່ງແມ ຈົ່ງໂຄສະນາແກ່ກຸງເຢຣູຊາເລັມວ່າ ບັນດາຜູ້ອ້ອມມາຈາກແຜ່ນດິນໄກ ພວກເຂົາທັງຫລາຍໂຫ່ຮ້ອງເຂົ້າໃສ່ຫົວເມືອງຢູດາ17ພວກເຂົາທັງຫລາຍອ້ອມຢູດາໄວ້ເໝືອນກັບຜູ້ເບິ່ງແຍງເຝົ້ານາ ເພາະວ່າຢູດາໄດ້ກະບົດຕໍ່ເຮົາ” ພຣະຜູ້ເປັນເຈົ້າກ່າວດັ່ງນີ້ແຫລະ18“ການດຳເນີນຊີວິດ ແລະການກະທຳທັງຫລາຍຂອງເຈົ້າໄດ້ນຳເລື່ອງນີ້ມາເໜືອເຈົ້າ ນີ້ແຫລະເປັນຜົນແຫ່ງຄວາມຊົ່ວຮ້າຍຂອງເຈົ້າ ເພາະມັນຂົມຂື່ນ ເພາະມັນມາເຖິງຈິດໃຈຂອງເຈົ້າທັນທີທັນໃດ”
19ແສນລະທົມ ແສນລະທົມ ຂ້ອຍກໍບິດຕົວດ້ວຍຄວາມເຈັບປວດ ໂອ ຝາດວງໃຈຂອງຂ້ອຍເອີຍ ຈິດໃຈຂອງຂ້ອຍກໍວຸ້ນວາຍ ຂ້ອຍຈະຢູ່ເສີຍໆບໍ່ໄດ້ ເພາະຈິດໃຈຂ້ອຍໄດ້ຍິນສຽງເຂົາສັດ ສຽງປຸກຂອງສົງຄາມ20ການປະກາດເລື່ອງຄວາມຈິບຫາຍໄລ່ຕິດຕາມຄວາມຈິບຫາຍ ແຜ່ນດິນທັງໝົດກໍຖືກຖິ້ມຮ້າງ ບັນດາເຕັນຂອງຂ້ອຍກໍຖືກທຳລາຍໄປໂດຍໄວ ມ່ານທັງຫລາຍຂອງຂ້ອຍກໍໝົດໄປໃນບັດດຽວ21ຂ້ອຍຈະຕ້ອງເບິ່ງທຸງ ແລະຟັງສຽງເຂົາສັດດົນຈັກເທົ່າໃດ
22“ເພາະປະຊາຊົນຂອງເຮົາໂງ່ຈ້າ ພວກເຂົາທັງຫລາຍບໍ່ຮູ້ຈັກເຮົາ ພວກເຂົາເປັນລູກຫລານທີ່ໂງ່ຈ້າ ພວກເຂົາບໍ່ມີຄວາມເຂົ້າໃຈ ພວກເຂົາເຮັດຄວາມຊົ່ວເກັ່ງ ແຕ່ບໍ່ເຂົ້າໃຈທີ່ຈະເຮັດດີ”23ຂ້າພະເຈົ້າເບິ່ງພື້ນທີ່ໂລກ ແລະເບິ່ງແມ ເປັນທີ່ຮ້າງແລະວ່າງເປົ່າເສຍ ແລະເບິ່ງຟ້າສະຫວັນ ໃນນັ້ນກໍບໍ່ມີຄວາມສະຫວ່າງ24ຂ້າພະເຈົ້າເບິ່ງພູເຂົາ ເບິ່ງແມ ມັນກຳລັງສັ່ນຢູ່ ບັນດາໂນນພູກໍແກວ່ງໄປແກວ່ງມາ25ຂ້າພະເຈົ້າເບິ່ງ ແລະເບິ່ງແມ ບໍ່ມີມະນຸດເລີຍ ນົກທັງປວງແຫ່ງທ້ອງຟ້າອາກາດໄດ້ໜີໄປແລ້ວ26ຂ້າພະເຈົ້າເບິ່ງ ແລະເບິ່ງແມ ຮົ້ວສວນ ຫລືໄຮ່ນາຕາກ້າກໍເປັນຖິ່ນແຫ້ງແລ້ງກັນດານ ແລະຫົວເມືອງທັງໝົດກໍຫັກພັງໄປຕໍ່ພຣະພັກພຣະຜູ້ເປັນເຈົ້າ ຕໍ່ພຣະພິໂລດອັນຮ້ອນແຮງຂອງພຣະອົງ27ເພາະພຣະຜູ້ເປັນເຈົ້າກ່າວດັ່ງນີ້ວ່າ “ແຜ່ນດິນທັງໝົດຈະເປັນບ່ອນຮ້າງ ເຖິງປານນັ້ນ ເຮົາກໍຍັງບໍ່ໄດ້ເຮັດໃຫ້ເຖິງອະວະສານເທື່ອ28ເພາະເລື່ອງນີ້ໂລກຈະໄວ້ທຸກ ແລະຟ້າສະຫວັນເບື້ອງເທິງຈະດຳມືດ ເພາະເຮົາໄດ້ໃຫ້ຄຳເວົ້າແລ້ວ ເຮົາໄດ້ໝາຍໃຈໄວ້ແລ້ວ ເຮົາຈະບໍ່ປ່ຽນໃຈ ຫລືຖອຍຫລັງກັບ29ເມື່ອໄດ້ຍິນສຽງທະຫານມ້າ ແລະນັກທະນູ ຊາວເມືອງທັງໝົດກໍຈະໜີໄປ ພວກເຂົາເຂົ້າໄປຢູ່ໃນພຸ່ມໄມ້ ແລະໄຕ່ປີນໄປທ່າມກາງສີລາ ຫົວເມືອງທຸກແຫ່ງກໍຖືກປະຖິ້ມ ແລະບໍ່ມີມະນຸດອາໄສຢູ່ໃນເມືອງເຫລົ່ານັ້ນເລີຍ30ເຈົ້າຜູ້ທີ່ຖືກຖິ້ມຮ້າງເອີຍ ທີ່ເຈົ້າແຕ່ງຕົວສີແດງນັ້ນເຈົ້າເຮັດຫຍັງກັນ ແລະທີ່ເຈົ້າປະດັບຕົວດ້ວຍເຄື່ອງເອ້ທອງຄຳ ທີ່ເຈົ້າຂະຫຍາຍດວງຕາໃຫ້ກວ້າງດ້ວຍແຕ້ມສີ ເຈົ້າແຕ່ງຕົວໃຫ້ງາມເຮັດຫຍັງ ຄົນຮັກຂອງເຈົ້າຈະໝິ່ນປະໝາດເຈົ້າ ພວກເຂົາທັງຫລາຍຈະສະແຫວງຫາຊີວິດຂອງເຈົ້າ31ເພາະເຮົາໄດ້ຍິນສຽງຄືກັບສຽງຜູ້ຍິງເກີດລູກຮ້ອງແສນເຈັບປວດຄືກັບຈະເກີດລູກຫົວປີ ສຽງຮ້ອງແຫ່ງບຸດສາວຊີໂອນນັ້ນ ແທບຈະຂາດໃຈ ຢຽດມືຂອງນາງອອກຮ້ອງວ່າ ‘ວິບັດແກ່ຂ້ອຍ ຈິດໃຈຂ້ອຍກໍອ່ອນເພຍຢູ່ເພາະເຫດຜູ້ຂ້າຄົນ’”