1ໃຜນໍທີ່ມາຈາກເມືອງເອໂດມ ສວມເສື້ອຜ້າຍ້ອມສີຈາກເມືອງໂບຊະຣາ
ພຣະອົງຜູ້ຊົງສະຫງ່າງາມໃນເຄື່ອງນຸ່ງຂອງພຣະອົງ
ສະເດັດມາດ້ວຍກຳລັງຍິ່ງໃຫຍ່ຂອງພຣະອົງ
“ເຮົາເອງ ຮ້ອງປະກາດໃນຄວາມຊອບທຳ
ແລະມີລິດທານຸພາບທີ່ຈະຊ່ວຍໃຫ້ລອດພົ້ນ”
2ເປັນຫຍັງເຄື່ອງນຸ່ງຂອງພຣະອົງຈຶ່ງສີແດງ
ແລະເສື້ອຜ້າຂອງພຣະອົງຄືກັນກັບຂອງຄົນທີ່ຢຽບໃນອ່າງຢຽບອະງຸ່ນ
3“ເຮົາໄດ້ຢຽບອະງຸ່ນແຕ່ຜູ້ດຽວ ແລະບໍ່ມີໃຜຈາກຊົນຊາດທັງຫລາຍຢູ່ກັບເຮົາເລີຍ
ເຮົາຈະຢຽບມັນດ້ວຍຄວາມຄຽດຮ້າຍຂອງເຮົາ
ເຮົາຢຽບມັນດ້ວຍຄວາມພິໂລດຂອງເຮົາ
ເລືອດຂອງພວກເຂົາຈະຕິດຢູ່ເທິງເສື້ອຜ້າຂອງເຮົາ
ແລະເຮົາຈະເຮັດໃຫ້ເສື້ອຜ້າຂອງເຮົາເປື້ອນໝົດ
4ເພາະວ່າມື້ແກ້ແຄ້ນຢູ່ໃນໃຈຂອງເຮົາ ແລະປີແຫ່ງການໄຖ່ຂອງເຮົາໄດ້ມາເຖິງ
5ເຮົາເບິ່ງ ແຕ່ບໍ່ມີຜູ້ໃດຊ່ວຍເຫລືອ ເຮົາປະຫລາດໃຈວ່າບໍ່ມີຜູ້ຍົກໄວ້
ເຫດສັນນັ້ນ ແຂນຂອງເຮົາເອງຈຶ່ງນຳຄວາມພົ້ນມາໃຫ້ເຮົາ
ແລະຄວາມພິໂລດຂອງເຮົາ ຄ້ຳຊູເຮົາໄວ້
6ເຮົາຈະຢຽບຊົນຊາດທັງຫລາຍລົງດ້ວຍຄວາມຄຽດຮ້າຍຂອງເຮົາ
ເຮົາເຮັດໃຫ້ພວກເຂົາເມົາດ້ວຍຄວາມພິໂລດຂອງເຮົາ
ແລະເຮົາຈະເຮັດໃຫ້ກຳລັງຂອງພວກເຂົາຫລຸດນ້ອຍລົງເທິງແຜ່ນດິນໂລກ”
7ຂ້າພະເຈົ້າຈະກ່າວເຖິງຄວາມເມດຕາແຫ່ງພຣະຜູ້ເປັນເຈົ້າ
ແລະການສັນລະເສີນຂອງພຣະຜູ້ເປັນເຈົ້າ
ຕາມບັນດາຊຶ່ງພຣະຜູ້ເປັນເຈົ້າປະທານແກ່ພວກເຮົາ
ແລະຄວາມດີຍິ່ງໃຫຍ່ຕໍ່ວົງວານຂອງອິສຣາເອນ
ຊຶ່ງພຣະອົງອະນຸຍາດໃຫ້ຕາມພຣະກະລຸນາຂອງພຣະອົງ
ຕາມຄວາມເມດຕາອັນອຸດົມສົມບູນຂອງພຣະອົງ
8ເພາະວ່າພຣະອົງບອກວ່າ “ແນ່ນອນ ພວກເຂົາເປັນຊົນຊາດຂອງເຮົາ
ລູກ ຜູ້ຈະບໍ່ເວົ້າຕົວະ”
ແລະພຣະອົງໄດ້ເປັນພຣະຜູ້ຊ່ອຍໃຫ້ລອດພົ້ນຂອງເຮົາ
9ພຣະອົງທຸກພຣະໄທໃນຄວາມທຸກໃຈທັງໝົດຂອງພວກເຂົາ
ແລະທູດສະຫວັນທີ່ຢູ່ຕໍ່ພຣະພັກພຣະອົງ
ພຣະອົງຊ່ວຍພວກເຂົາທັງຫລາຍໃຫ້ລອດພົ້ນ
ພຣະອົງໄຖ່ພວກເຂົາດ້ວຍຄວາມຮັກຂອງພຣະອົງ
ແລະດ້ວຍຄວາມສົງສານຂອງພຣະອົງ ພຣະອົງຍົກພວກເຂົາຂຶ້ນ
ແລະຫອບພວກເຂົາໄປຕະຫລອດການ
10ແຕ່ພວກເຂົາທັງຫລາຍໄດ້ກະບົດ
ແລະເຮັດໃຫ້ພຣະວິນຍານບໍລິສຸດຂອງພຣະອົງເສຍພຣະໄທ
ສະນັ້ນ ພຣະອົງຈຶ່ງຫັນເປັນສັດຕູຂອງພວກເຂົາທັງຫລາຍ
ແລະພຣະອົງຕໍ່ສູ້ກັບພວກເຂົາທັງຫລາຍເອງ
11ແລ້ວພຣະອົງລະນຶກເຖິງສະໄໝເກົ່າກ່ອນ ເຖິງໂມເຊ ເຖິງຊົນຊາດຂອງພຣະອົງວ່າ
“ພຣະອົງຜູ້ນຳພວກເຂົາທັງຫລາຍຂຶ້ນມາຈາກທະເລ
ພ້ອມກັບຜູ້ລ້ຽງແບ້ແກະຂອງພຣະອົງຢູ່ໃສ ພຣະອົງຢູ່ໃສ
ຜູ້ຊຶ່ງບັນຈຸພຣະວິນຍານບໍລິສຸດຂອງພຣະອົງທ່າມກາງພວກເຂົາ
12ຜູ້ນຳພວກເຂົາທັງຫລາຍທາງມືຂວາຂອງໂມເຊ
ດ້ວຍພຣະກອນອັນຮຸ່ງເຮືອງຂອງພຣະອົງ
ຜູ້ແຍກນ້ຳອອກຕໍ່ໜ້າພວກເຂົາ ເພື່ອສ້າງພຣະນາມນິລັນດອນໃຫ້ພຣະອົງເອງ
13ຜູ້ໄດ້ນຳພວກເຂົາຂ້າມທະເລນັ້ນຄືມ້າໃນຖິ່ນແຫ້ງແລ້ງກັນດານ
ເພື່ອພວກເຂົາທັງຫລາຍຈະບໍ່ໄດ້ສະດຸດ
14ເໝືອນຢ່າງສັດລ້ຽງໄປຍັງຮ່ອມພູເຂົາສັນໃດ
ພຣະວິນຍານຂອງພຣະຜູ້ເປັນເຈົ້າປະທານໃຫ້ພວກເຂົາຢຸດພັກສັນນັ້ນ”
ພຣະອົງຈຶ່ງນຳຊົນຊາດຂອງພຣະອົງ
ເພື່ອຈະສ້າງພຣະນາມອັນຮຸ່ງເຮືອງແດ່ພຣະອົງເອງ
15ຂໍທອດພຣະເນດລົງມາຈາກຟ້າສະຫວັນ
ແລະເບິ່ງຈາກສະຖານທີ່ບໍລິສຸດ ແລະຮຸ່ງເຮືອງຂອງພຣະອົງ
ຄວາມກະຕືລືລົ້ນ ແລະລິດທານຸພາບຂອງພຣະອົງຢູ່ໃສ
ພຣະໄທກະລຸນາ ແລະພຣະເມດຕາຂອງພຣະອົງ
ຕໍ່ຂ້າພຣະອົງຢູ່ໃສ ໄດ້ຖືກຍຶດໄວ້ແລ້ວບໍ
16ແນ່ນອນ ພຣະອົງເປັນພໍ່ຂອງຂ້າພະອົງທັງຫລາຍ
ເຖິງແມ່ນອັບຣາຮາມບໍ່ໄດ້ຮູ້ຈັກຂ້າພະອົງ
ແລະອິສຣາເອນບໍ່ຈື່ຂ້າພະອົງໄດ້ ຂ້າແດ່ພຣະຜູ້ເປັນເຈົ້າ
ພຣະອົງເປັນພໍ່ ແລະພຣະຜູ້ໄຖ່ຂອງຂ້າພະອົງທັງຫລາຍ
ພຣະນາມຂອງພຣະອົງດຳລົງຢູ່ຕັ້ງແຕ່ຊົ່ວອາຍຸທັງປວງ
17ຂ້າແດ່ພຣະຜູ້ເປັນເຈົ້າ
ເຫດໃດພຣະອົງຈຶ່ງໃຫ້ຂ້າພະອົງທັງຫລາຍຜິດໄປຈາກທາງທັງຫລາຍຂອງພຣະອົງ
ແລະເຮັດໃຫ້ໃຈຂອງຂ້າພະອົງແຂງກະດ້າງຈົນຂ້າພະອົງບໍ່ຢຳເກງພຣະອົງ
ຂໍພຣະອົງກັບມາເພາະເຫັນແກ່ບັນດາຜູ້ຮັບໃຊ້ຂອງພຣະອົງຄື
ຕະກູນທັງຫລາຍອັນເປັນມໍລະດົກຂອງພຣະອົງ
18ຊົນຊາດແຫ່ງຄວາມບໍລິສຸດຂອງພຣະອົງໄດ້ອາໄສຢູ່ຫັ້ນເວລາໜ້ອຍດຽວໜຶ່ງ
ສັດຕູຂອງຂ້າພະອົງທັງຫລາຍໄດ້ຢຽບຢ່ຳສະຖານທີ່ບໍລິສຸດຂອງພຣະອົງລົງ
19ຂ້າພະອົງທັງຫລາຍເປັນຂອງພຣະອົງ ພຣະອົງບໍ່ເຄີຍປົກຄອງພວກເຂົາເລີຍ
ພວກເຂົາບໍ່ໄດ້ຖືກເອີ້ນໂດຍພຣະນາມຂອງພຣະອົງ