1ດ້ວຍວ່າພຣະບັນຍັດເປັນພຽງແຕ່ເງົາຂອງສິ່ງປະເສີດທີ່ຈະມາພາຍໜ້ານັ້ນ ແລະບໍ່ແມ່ນຕົວຈິງຂອງສິ່ງເຫລົ່ານັ້ນ ເຄື່ອງບູຊາທີ່ເຂົາຖວາຍທຸກປີສະເໝີມາຕາມພຣະບັນຍັດ ກໍບໍ່ອາດຈະເຮັດໃຫ້ຜູ້ທີ່ເຂົ້າເຝົ້ານັ້ນເຖິງທີ່ສຳເລັດໄດ້ຈັກເທື່ອ.2ເພາະຖ້າເປັນຢ່າງນັ້ນໄດ້ ເຂົາຄົງໄດ້ຢຸດການຖວາຍເຄື່ອງບູຊາແລ້ວ ບໍ່ແມ່ນຫລື ຖ້າຜູ້ນະມັດສະການນັ້ນໄດ້ຮັບການຊຳລະລ້າງເທື່ອດຽວເປັນການສິ້ນສຸດແລ້ວ ຄົນເຫລົ່ານັ້ນຄົງຈະບໍ່ຮູ້ສຶກວ່າມີບາບອີກຕໍ່ໄປ.3ແຕ່ການຖວາຍເຄື່ອງບູຊານັ້ນເປັນການເຕືອນໃຫ້ລະນຶກເຖິງບາບທຸກປີ.4ເຫດວ່າເລືອດງົວເຖິກແລະເລືອດແບ້ບໍ່ສາມາດຊຳລະບາບໃຫ້ໝົດສິ້ນໄປໄດ້ຈັກເທື່ອ.5ດັ່ງນັ້ນ, ເມື່ອພຣະຄຣິດສະເດັດເຂົ້າມາໃນໂລກ ພຣະອົງຊົງທູນວ່າ,
“ເຄື່ອງບູຊາແລະຂອງທານ ພຣະອົງເຈົ້າບໍ່ຊົງປະສົງ
ແຕ່ພຣະອົງໄດ້ຈັດຕຽມຮ່າງກາຍສຳລັບຂ້າພຣະອົງ.
6ເຄື່ອງເຜົາບູຊາແລະເຄື່ອງບູຊາລົບລ້າງບາບນັ້ນ
ພຣະອົງເຈົ້າບໍ່ຊົງພໍພຣະໄທ.
7ເມື່ອນັ້ນຂ້າພຣະອົງຈິ່ງທູນວ່າ ‘ຂ້າແດ່ພຣະເຈົ້າ,
ຂ້າພຣະອົງໄດ້ມາເພື່ອຈະເຮັດຕາມນ້ຳພຣະໄທຂອງພຣະອົງ
ຕາມທີ່ມີເລື່ອງຂອງຂ້າພຣະອົງຂຽນໄວ້ໃນໜັງສືມ້ວນນັ້ນ.”
8ເມື່ອພຣະອົງຊົງກ່າວແລ້ວວ່າ “ເຄື່ອງບູຊາແລະຂອງທານ” ກັບ “ເຄື່ອງເຜົາບູຊາແລະເຄື່ອງບູຊາລົບລ້າງບາບ ທີ່ເຂົາໄດ້ບູຊາຕາມພຣະບັນຍັດນັ້ນ ພຣະອົງເຈົ້າບໍ່ຊົງປະສົງແລະບໍ່ຊົງພໍພຣະໄທ.”9ຕໍ່ນັ້ນມາພຣະອົງຊົງກ່າວວ່າ, “ຂ້າແດ່ພຣະເຈົ້າ, ຂ້າພຣະອົງໄດ້ມາເພື່ອຈະເຮັດຕາມນ້ຳພຣະໄທຂອງພຣະອົງ” ພຣະອົງຊົງເລີກລະບົບເດີມນັ້ນເສຍ ເພື່ອຈະຊົງຕັ້ງລະບົບທີສອງໄວ້.10ແລະໂດຍນ້ຳພຣະໄທນັ້ນແຫລະ, ທີ່ເຮົາທັງຫລາຍໄດ້ຮັບການຊົງຊຳລະໃຫ້ບໍລິສຸດ ດ້ວຍການຖວາຍພຣະກາຍຂອງພຣະເຢຊູຄຣິດເທື່ອດຽວເທົ່ານັ້ນ ເປັນການສິ້ນສຸດ.11ຝ່າຍປະໂລຫິດທຸກຕົນກໍຢືນບົວລະບັດຢູ່ທຸກວັນ ໂດຍການນຳເຄື່ອງບູຊາຢ່າງດຽວກັນມາຖວາຍເລື້ອຍໆ ເຄື່ອງບູຊານັ້ນບໍ່ສາມາດຊຳລະລ້າງບາບໄດ້ຈັກເທື່ອ.12ແຕ່ເມື່ອປະໂລຫິດຕົນນີ້ໄດ້ຖວາຍເຄື່ອງບູຊາອັນດຽວ ເປັນເຄື່ອງບູຊາລົບລ້າງບາບໄດ້ຕະຫລອດໄປ “ພຣະອົງກໍສະເດັດປະທັບເບື້ອງຂວາຂອງພຣະເຈົ້າ.”13ເພື່ອຊົງຄອຍຢູ່ “ຈົນບັນດາສັດຕູຂອງພຣະອົງຖືກປາບລົງໃຕ້ພຣະບາດຂອງພຣະອົງ.”14ເພາະວ່າດ້ວຍເຄື່ອງບູຊາອັນດຽວ ພຣະອົງໄດ້ຊົງໂຜດຄົນທັງຫລາຍທີ່ຊົງຊຳລະເປັນບໍລິສຸດນັ້ນໃຫ້ເຖິງທີ່ສຳເລັດເປັນນິດ.
15ແລະພຣະວິນຍານບໍລິສຸດຊົງເປັນພະຍານໃຫ້ແກ່ພວກເຮົາເໝືອນກັນ ເພາະວ່າພຣະອົງໄດ້ຊົງກ່າວໄວ້ແລ້ວວ່າ,
16“ອົງພຣະຜູ້ເປັນເຈົ້າຊົງກ່າວວ່າ:
ນີ້ແມ່ນຄຳສັນຍາທີ່ເຮົາຈະສັນຍາໄວ້ກັບເຂົາພາຍຫລັງສະໄໝນັ້ນ
ຄືເຮົາຈະບັນຈຸຂໍ້ບັນຍັດຂອງເຮົາໄວ້ໃນຈິດໃຈຂອງເຂົາ
ເຮົາຈະຈາລຶກຂໍ້ບັນຍັດນັ້ນໄວ້ໃນຫົວໃຈຂອງເຂົາ.”
17ແລ້ວຊົງກ່າວຕໍ່ໄປວ່າ
“ແລະການຜິດບາບກັບການອະທຳຂອງເຂົາເຮົາຈະບໍ່ຈົດຈຳຕໍ່ໄປອີກຈັກເທື່ອ.”
18ເພາະວ່າເມື່ອມີການໃຫ້ອະໄພແລ້ວ ກໍບໍ່ມີເຄື່ອງບູຊາລົບລ້າງບາບຕໍ່ໄປ.
ໃຫ້ພວກເຮົາເຂົ້າມາໃກ້ຍຶດໝັ້ນໃນຄວາມຫວັງ
19ດັ່ງນັ້ນພີ່ນ້ອງທັງຫລາຍເອີຍ, ເຮົາທັງຫລາຍມີໃຈກ້າຈະເຂົ້າໄປໃນສະຖານສັກສິດທີ່ສຸດດ້ວຍຄວາມຕາຍ
ພາສາເດີມວ່າ “ໂດຍພຣະໂລຫິດ.”
ຂອງພຣະເຢຊູ.20ຕາມທາງໃໝ່ຊຶ່ງມີຊີວິດ ທີ່ພຣະອົງໄດ້ຊົງໄຂອອກໃຫ້ພວກເຮົາ ຜ່ານເຂົ້າໄປທາງຜ້າກັ້ງນັ້ນ ຄືທາງພຣະກາຍຂອງພຣະອົງ.21ອີກປະການໜຶ່ງ, ພວກເຮົາມີປະໂລຫິດຕົນໃຫຍ່ເໜືອຄົວເຮືອນຂອງພຣະເຈົ້າແລ້ວ.22ໂດຍເຫດນີ້, ຈົ່ງໃຫ້ພວກເຮົາເຂົ້າໄປໃກ້ດ້ວຍຈິງໃຈ, ດ້ວຍຄວາມເຊື່ອອັນເຕັມບໍລິບູນ, ມີໃຈທີ່ໄດ້ຮັບການຊົງຊຳລະຈາກການຮູ້ສຶກຕົວວ່າມີບາບ, ແລະມີຮ່າງກາຍທີ່ຊຳລະລ້າງດ້ວຍນ້ຳບໍລິສຸດ.23ຈົ່ງຍຶດໝັ້ນໃນຄວາມຫວັງທີ່ພວກເຮົາປະກາດຕົວວ່າໄດ້ຮັບໄວ້ແລ້ວນັ້ນ ຢ່າໃຫ້ເຄື່ອນໄຫວ ເພາະວ່າພຣະອົງຜູ້ຊົງປະທານພຣະສັນຍານັ້ນກໍຊົງສັດຊື່.24ຈົ່ງຄ່ອຍພິລະນາເບິ່ງເຊິ່ງກັນແລະກັນ ເພື່ອປຸກໃຈເຊິ່ງກັນແລະກັນໃຫ້ມີຄວາມຮັກແລະເຮັດການດີງາມ.25ຢ່າປະການປະຊຸມກັນເໝືອນຢ່າງລາງຄົນເຄີຍປະນັ້ນ ແຕ່ຈົ່ງໜຸນໃຈກັນຫລາຍກວ່າເກົ່າອີກ ເພາະທ່ານກໍຮູ້ກໍເຫັນຢູ່ວ່າວັນນັ້ນໃກ້ເຂົ້າມາແລ້ວ.26ດ້ວຍວ່າຖ້າພວກເຮົາໄດ້ຮັບຄວາມຮູ້ເລື່ອງຄວາມຈິງແລ້ວ ແຕ່ຍັງເຈດຕະນາເຮັດບາບຢູ່ ເຄື່ອງບູຊາລົບລ້າງບາບກໍຈະບໍ່ມີເຫລືອຢູ່ຕໍ່ໄປ.27ເຫລືອແຕ່ຄວາມຢ້ານອັນພິລຶກໃນການລໍຖ້າການພິພາກສາລົງໂທດ ແລະໄຟອັນຮ້າຍແຮງທີ່ຈະເຜົາຜານບັນດາຄົນທີ່ຕໍ່ສູ້ພຣະເຈົ້າ.28ຄົນທີ່ລະເມີດບັນຍັດຂອງໂມເຊນັ້ນ ຖ້າມີພະຍານສອງຫລືສາມປາກ ກໍຈະຕ້ອງຕາຍໂດຍບໍ່ມີຄວາມເມດຕາ.29ທ່ານທັງຫລາຍຈົ່ງຄຶດເບິ່ງວ່າ ຄົນທີ່ຢຽບຢ່ຳພຣະບຸດຂອງພຣະເຈົ້າ, ແລະຖືພຣະໂລຫິດອັນກ່ຽວກັບພຣະສັນຍາ ຊຶ່ງຊຳລະຕົວໃຫ້ບໍລິສຸດວ່າເປັນສິ່ງຊົ່ວຊ້າ, ກັບທັງປະໝາດພຣະວິນຍານຜູ້ຊົງພຣະຄຸນນັ້ນ ຄວນຈະຖືກລົງໂທດຫລາຍກວ່າຄົນເຫລົ່ານັ້ນຈັກເທົ່າໃດ.30ເພາະພວກເຮົາໄດ້ຮູ້ຈັກພຣະອົງຜູ້ຊົງກ່າວວ່າ, “ການແກ້ແຄ້ນເປັນທຸລະຂອງເຮົາ ຝ່າຍເຮົາຈະຕອບແທນ” ແລະໄດ້ຊົງກ່າວອີກວ່າ, “ອົງພຣະຜູ້ເປັນເຈົ້າຈະຊົງພິພາກສາພົນລະເມືອງຂອງພຣະອົງ.”31ການຕົກຢູ່ໃນເງື້ອມພຣະຫັດຂອງພຣະເຈົ້າຜູ້ຊົງພຣະຊົນຢູ່ນັ້ນ ກໍເປັນການພິລຶກເພິງກົວ.
32ແຕ່ທ່ານທັງຫລາຍຈົ່ງລະນຶກເຖິງຄາວກ່ອນນັ້ນ ຫລັງຈາກທີ່ທ່ານໄດ້ຮັບຄວາມສະຫວ່າງແລ້ວ ພວກທ່ານໄດ້ສູ້ທົນຕໍ່ຄວາມຍາກລຳບາກອັນໃຫຍ່ຫລວງ.33ລາງເທື່ອພວກທ່ານກໍຖືກການປະຈານອັບອາຍຂາຍໜ້າ ແລະຖືກຂົ່ມເຫງໃຫ້ປະຊາຊົນຊົນ ລາງເທື່ອພວກທ່ານກໍເຂົ້າຮ່ວມທຸກກັບຄົນທີ່ຖືກການຢ່າງດຽວກັນນັ້ນ.34ເພາະວ່າທ່ານທັງຫລາຍມີໃຈເມດຕາຕໍ່ຄົນເຫລົ່ານັ້ນທີ່ຖືກຜູກມັດ ແລະເມື່ອມີຄົນປຸ້ນເອົາຊັບສິ່ງຂອງໆ ພວກທ່ານໄປ ພວກທ່ານກໍຍອມໃຫ້ເຂົາດ້ວຍໃຈຍິນດີ ເພາະພວກທ່ານຮູ້ແລ້ວວ່າ ພວກທ່ານເອງມີຊັບສົມບັດດີກວ່າ ແລະຖາວອນກວ່ານັ້ນອີກ.35ເຫດສັນນັ້ນຢ່າໄດ້ປະຖິ້ມຄວາມໄວ້ວາງໃຈຂອງພວກທ່ານທີ່ຈະມີລາງວັນອັນໃຫຍ່ນັ້ນ.36ທ່ານທັງຫລາຍຈຳເປັນຕ້ອງມີຄວາມອົດທົນ ເພື່ອວ່າ, ເມື່ອໄດ້ເຮັດຕາມນ້ຳພຣະໄທຂອງພຣະເຈົ້າແລ້ວ ກໍຈະໄດ້ຮັບຕາມທີ່ຊົງສັນຍາໄວ້.37“ອີກບໍ່ເຫິງ, ບໍ່ເຫິງເທົ່າໃດພຣະອົງຜູ້ຈະສະເດັດມາກໍຈະສະເດັດມາແລະຈະບໍ່ຊົງຊັກຊ້າ.38ແຕ່ຄົນຊອບທຳຂອງເຮົາຈະມີຊີວິດຢູ່ດ້ວຍຄວາມເຊື່ອຖ້າເຂົາຫາກຫລົບຖອຍຫລັງ ເຮົາຈະບໍ່ພໍໃຈໃນຄົນນັ້ນ.”39ສ່ວນພວກເຮົາ, ບໍ່ຢູ່ຝ່າຍຄົນທີ່ຫລົບຖອຍຫລັງຈົນເຖິງຄວາມຈິບຫາຍເສຍ ແຕ່ຢູ່ຝ່າຍຄົນທີ່ມີຄວາມເຊື່ອ ຈິ່ງຮັກສາຊີວິດແລະຈິດໃຈຂອງຕົນໄວ້ໄດ້.