1ຢູ່ຕໍ່ມາ ອັບຣາຮາມກໍເຖົ້າແກ່ຫລາຍແລ້ວ ແລະພຣະຜູ້ເປັນເຈົ້າໄດ້ອວຍພອນໃຫ້ທຸກສິ່ງທຸກຢ່າງທີ່ໄດ້ເຮັດມານັ້ນຈະເລີນຂຶ້ນ.2–3ອັບຣາຮາມ ເວົ້າກັບຄົນໃຊ້ຜູ້ອາວຸໂສຊຶ່ງຮັບຜິດຊອບໃນຊັບສົມບັດວ່າ, “ຈົ່ງວາງມືລົງຫວ່າງກົກຂາຂ້ອຍແລ້ວສາບານຕໍ່ພຣະພັກຂອງພຣະຜູ້ເປັນເຈົ້າແຫ່ງສະຫວັນແລະແຜ່ນດິນໂລກວ່າເຈົ້າຈະບໍ່ເອົາຜູ້ສາວໃນປະເທດການາອານບ່ອນທີ່ຂ້ອຍອາໄສຢູ່ທີ່ນີ້ມາເປັນເມຍຂອງລູກຊາຍຂ້ອຍ.4ແຕ່ວ່າເຈົ້າຈົ່ງກັບເມືອປະເທດຂອງຂ້ອຍ ແລ້ວຊອກຫາເອົາຜູ້ສາວໃນທ່າມກາງພວກຍາດພີ່ນ້ອງມາເປັນເມຍຂອງອີຊາກ.”
5ຄົນໃຊ້ຈຶ່ງຖາມວ່າ, “ຈະເຮັດແນວໃດ ເມື່ອຍິງສາວຜູ້ທີ່ຈະເປັນລູກໃພ້ນັ້ນບໍ່ຍອມຈາກບ້ານມາຢູ່ນຳເຮົາໃນປະເທດນີ້ ຈະໃຫ້ຂ້ານ້ອຍເອົາລູກຊາຍຂອງທ່ານໄປສູ່ນາງຫລື?”
6ອັບຣາຮາມຈຶ່ງຕອບວ່າ, “ບໍ່ ເຈົ້າຈົ່ງລະວັງຢ່າພາລູກຊາຍຂ້ອຍກັບໄປປະເທດຂອງຂ້ອຍອີກ.7ເຫດວ່າ ພຣະຜູ້ເປັນເຈົ້າເທິງສະຫວັນໄດ້ພາຂ້ອຍໜີອອກຈາກເຮືອນບິດາ ແລະຈາກບ້ານເກີດເມືອງນອນ ມາຍັງດິນດອນຕອນນີ້ທີ່ພຣະອົງຈະຊົງປະທານໃຫ້ເຊື້ອສາຍຂອງຂ້ອຍຕາມພຣະສັນຍາ ພຣະອົງຈະໃຊ້ທູດຂອງພຣະອົງໄປກ່ອນເຈົ້າເພື່ອເຈົ້າຈະຫາເມຍຢູ່ທີ່ນັ້ນໃຫ້ແກ່ລູກຊາຍຂອງຂ້ອຍໄດ້.8ແຕ່ວ່າ ຖ້າຫາກຍິງນັ້ນບໍ່ຍອມມານຳເຈົ້າ ເຈົ້າຈະຫວິດຈາກຄຳສາບານ ເຖິງຢ່າງໃດເຈົ້າກໍຢ່າພາລູກຊາຍຂອງຂ້ອຍກັບໄປທີ່ນັ້ນເດັດຂາດ.9ດັ່ງນັ້ນ ຄົນໃຊ້ຈຶ່ງວາງມືລົງວ່າງກົກຂາຂອງອັບຣາຮາມ ແລະສາບານວ່າຈະເຮັດທຸກສິ່ງຕາມທີ່ນາຍຂໍຮ້ອງ.
10ຄັນແລ້ວ ຄົນໃຊ້ຈຶ່ງເອົາອູດສິບໂຕຂອງນາຍພ້ອມທັງຂອງຂວັນທີ່ມີຄ່າຫລາຍຢ່າງ ອອກເດີນທາງມຸ້ງໜ້າໄປສູ່ເມືອງຂອງນາໂຮຢູ່ໃນປະເທດເມໂຊໂປຕາເມຍ.11ລາວມາຮອດເມືອງນີ້ເວລາແລງ ພໍດີແມ່ນຍາມທີ່ຍິງສາວຊາວເມືອງລົງມາຕັກນ້ຳ ເມື່ອມາຮອດນ້ຳສ້າງທີ່ຢູ່ນອກເມືອງລາວຈຶ່ງໃຫ້ອູດຄຸເຂົ່າລົງ.12ສ່ວນລາວເອງກໍອະທິຖານພຣະເຈົ້າວ່າ, “ໂອ ອົງພຣະຜູ້ເປັນເຈົ້າຂອງອັບຣາຮາມນາຍຂອງຂ້ານ້ອຍ ຂໍໂຜດປະທານຄວາມສຳເລັດໃນມື້ນີ້ໃຫ້ແກ່ຂ້ານ້ອຍ ແລະໂຜດສຳແດງຄວາມຮັກອັນໝັ້ນຄົງຂອງພຣະອົງຕໍ່ນາຍຂອງຂ້ານ້ອຍເທີ້ນ.13ຂ້ານ້ອຍກຳລັງຢູ່ແຄມນ້ຳສ້າງບ່ອນທີ່ບັນດາຍິງສາວຊາວເມືອງກຳລັງອອກມາຕັກນ້ຳ.14ຖ້າຂ້ານ້ອຍເວົ້າຕໍ່ຍິງສາວຜູ້ໃດຜູ້ໜຶ່ງວ່າ, “ຂ້ອຍຂໍກິນນ້ຳໃນໄຫຂອງເຈົ້າແດ່” ແລ້ວຖ້ານາງຕອບວ່າ, “ເຊີນກິນແມ ຂ້ອຍຈະເອົາໃຫ້ຝູງອູດເຈົ້າກິນດ້ວຍ” ຂໍໃຫ້ຍິງສາວຜູ້ນັ້ນເປັນຜູ້ຊຶ່ງພຣະອົງຊົງເລືອກໃຫ້ເປັນເມຍອີຊາກຜູ້ຮັບໃຊ້ຂອງພຣະອົງ ດ້ວຍວິທີນີ້ ຂ້ານ້ອຍກໍຈະຮູ້ໄດ້ວ່າ ພຣະອົງຊົງສະແດງຄວາມຮັກອັນໝັ້ນຄົງຕໍ່ນາຍຂອງຂ້ານ້ອຍ.”
15ກ່ອນລາວອະທິຖານແລ້ວນາງເຣເບກາ ລູກສາວເບທູເອນກໍແບກໄຫນ້ຳຍ່າງມາທີ່ນ້ຳສ້າງ (ເບທູເອນເປັນລູກນາງມີລະກາແລະນາໂຮຜູ້ເປັນນ້ອງຊາຍຂອງອັບຣາຮາມ).16ນາງເປັນສາວໂສດ ແລະງາມຫລາຍ ນາງລົງໄປທີ່ນ້ຳສ້າງແລ້ວຕັກນ້ຳຈົນເຕັມໄຫ.17ໃນຂະນະທີ່ກຳລັງຈະກັບຄືນເມືອ ຄົນໃຊ້ຂອງອັບຣາຮາມຈຶ່ງຟ້າວແລ່ນໄປຫານາງແລ້ວເວົ້າວ່າ, “ຂ້ອຍຂໍກິນນ້ຳໃນໄຫຂອງເຈົ້າແດ່.”18ນາງຕອບວ່າ, “ເຊີນໂລດຍາລຸງ” ນາງຈຶ່ງປົງໄຫລົງຈາກບ່າແລ້ວເອົານ້ຳໃຫ້ລາວກິນ.19ຫລັງຈາກລາວອີ່ມແລ້ວນາງກໍເວົ້າວ່າ, “ຂ້ານ້ອຍກໍຈະຕັກນ້ຳໃຫ້ອູດຂອງຍາລຸງກິນຈົນອີ່ມໝົດທຸກໂຕ.”20ນາງຈຶ່ງຟ້າວຖອກນ້ຳໃນໄຫໃສ່ຮາງແລ້ວກໍແລ່ນໄປຕັກມາຖອກໃສ່ອີກ ຈົນອູດທຸກໂຕກິນອີ່ມ.21ຊາຍຄົນນັ້ນກໍຢືນເບິ່ງນາງຢ່າງງຽບໆ ເພື່ອຈະໄດ້ຮູ້ວ່າພຣະເຈົ້າປະທານຄວາມສຳເລັດໃຫ້ລາວແທ້ຫລືບໍ່.
22ເມື່ອນາງເອົານ້ຳໃຫ້ອູດກິນອີ່ມໝົດທຸກໂຕແລ້ວ ຄົນໃຊ້ຂອງອັບຣາຮາມ ກໍເອົາປອກຄຳເຄິ່ງບາດເກາະໃສ່ດັງນາງ ແລະເອົາສາຍແຂນສິບບາດສອງເສັ້ນໃສ່ໃຫ້ນາງ.23ແລ້ວລາວຖາມນາງຕື່ມອີກວ່າ, “ບອກຂ້ອຍແດ່ໄດ້ບໍ່ວ່າພໍ່ຂອງເຈົ້າແມ່ນໃຜ? ໃນເຮືອນຂອງພໍ່ເຈົ້າຍັງມີບ່ອນພັກເຊົາສຳລັບຂ້ອຍ ແລະສັດຂອງຂ້ອຍບໍ?
24ນາງຕອບວ່າ, “ຂ້ານ້ອຍເປັນລູກສາວຂອງເບທູເອນຫລານສາວຂອງນາໂຮແລະນາງມີລະກາ.25ຢູ່ບ້ານຂ້ານ້ອຍມີເຟືອງ ແລະຫຍ້າສຳລັບສັດ ແລະມີບ່ອນພັກສຳລັບຍາລຸງດ້ວຍ.”
26ເມື່ອໄດ້ຍິນນາງເວົ້າດັ່ງນັ້ນ ຄົນໃຊ້ຂອງອັບຣາຮາມຈຶ່ງຂາບລົງນະມັດສະການພຣະເຈົ້າ.27ແລະເວົ້າວ່າ “ຂໍສັນລະເສີນອົງພຣະຜູ້ເປັນເຈົ້າຂອງອັບຣາຮາມ ພຣະອົງຊົງສະແດງຄວາມຮັກອັນໝັ້ນຄົງແລະທ່ຽງທຳແທ້ ຕໍ່ນາຍຂອງຂ້ານ້ອຍ ແລະຍັງຊົງພາຂ້ານ້ອຍມາເຖິງບ້ານນ້ອງຊາຍຂອງເພິ່ນ.”
28ຍິງສາວຈຶ່ງແລ່ນໄປຫາແມ່ຢູ່ເຮືອນ ແລ້ວເລົ່າເລື່ອງທັງໝົດສູ່ຟັງ.29–30ເມື່ອລາບານອ້າຍນາງເຣເບກາເຫັນປອກຄຳເກາະດັງ ແລະສາຍແຂນຄຳນຳນາງທັງໄດ້ຍິນເລື່ອງຂອງຊາຍຄົນນັ້ນທີ່ມາເລົ່າສູ່ແມ່ຟັງ ກໍຟ້າວແລ່ນອອກໄປພົບຄົນໃຊ້ຂອງອັບຣາຮາມທີ່ຢືນລໍຢູ່ກັບຝູງອູດຂອງລາວໃກ້ນ້ຳສ້າງ.31ແລ້ວເວົ້າຕໍ່ລາວວ່າ, “ທ່ານຜູ້ມີພຣະພອນຂອງພຣະເຈົ້າ ເຊີນເຂົ້າໄປໃນເຮືອນເທາະ ເປັນຫຍັງທ່ານຈຶ່ງລໍຖ້າຢູ່ຂ້າງນອກ ຂ້ານ້ອຍໄດ້ຈັດບ່ອນສຳລັບທ່ານ ແລະສຳລັບຝູງອູດຂອງທ່ານແລ້ວ.”
32ເມື່ອໄດ້ຍິນເຊັ່ນນັ້ນຄົນໃຊ້ອັບຣາຮາມກໍເຂົ້າໄປໃນເຮືອນ ສ່ວນລາບານກໍຂົນເຄື່ອງລົງຈາກຫລັງອູດເອົາເຟືອງ ແລະຫຍ້າໃຫ້ອູດກິນແລ້ວເອົານ້ຳໃຫ້ຄົນໃຊ້ຂອງອັບຣາຮາມແລະຄົນທີ່ມານຳລາວລ້າງຕີນ.33ເມື່ອເຈົ້າຂອງບ້ານຈັດໂຕະອາຫານຮຽບຮ້ອຍແລ້ວ ຄົນໃຊ້ຂອງອັບຣາຮາມຈຶ່ງເວົ້າວ່າ, “ຂ້ອຍຈະບໍ່ຮັບປະທານອາຫານຈົນກວ່າຂ້ອຍຈະເວົ້າເລື່ອງທີ່ຂ້ອຍຢາກເວົ້າເສຍກ່ອນ” ລາບານຈຶ່ງຕອບວ່າ, “ເຊີນເວົ້າສາ.”
34–35ລາວຈຶ່ງເວົ້າຂຶ້ນວ່າ, “ຂ້ອຍເປັນຄົນໃຊ້ຂອງອັບຣາຮາມ ອົງພຣະຜູ້ເປັນເຈົ້າໄດ້ຊົງໂຜດປະທານໃຫ້ທ່ານມີຝູງແກະ ຝູງແບ້ ຝູງງົວ ຝູງລາ ແລະຝູງອູດ ມີເງິນມີຄຳ ແລະຂ້າໃຊ້ຊາຍຍິງ.36ນາງຊາຣາ ເມຍຂອງນາຍຂ້ອຍໄດ້ມີລູກຊາຍຜູ້ໜຶ່ງເວລາເຖົ້າແລ້ວ ເພິ່ນໄດ້ມອບຊັບສົມບັດທຸກສິ່ງທຸກຢ່າງໃຫ້ລາວ.37ເພິ່ນຍັງໄດ້ໃຫ້ຂ້ອຍສາບານວ່າຈະຍອມຟັງຄຳສັ່ງນີ້ ຄືບໍ່ໃຫ້ຂ້ອຍເລືອກເອົາຍິງສາວຊາວການາອານ ໃນບ່ອນທີ່ເພິ່ນຢູ່ນັ້ນມາເປັນລູກໃພ້.38ເພິ່ນຈະສາບແຊ່ງຖ້າຫາກຂ້ອຍບໍ່ມາຊອກຫາເອົາຍິງສາວຂອງຍາດພີ່ນ້ອງຂອງເພິ່ນທີ່ເມືອງນີ້ ໃຫ້ມາເປັນເມຍຂອງລູກຊາຍເພິ່ນ.39ແລ້ວຂ້ອຍໄດ້ເວົ້າຕໍ່ນາຍວ່າ ຈະເຮັດແນວໃດຖ້າຫາກຍິງສາວຄົນນັ້ນບໍ່ມານຳ.40ເພິ່ນໄດ້ຕອບວ່າ ອົງພຣະຜູ້ເປັນເຈົ້າຜູ້ຂ້ອຍເຊື່ອຟັງມາຕະຫລອດຈະສົ່ງທູດຂອງພຣະອົງໄປກັບເຈົ້າ ແລະປະທານຄວາມສຳເລັດໃຫ້ ເຈົ້າຈະໄດ້ຍິງສາວຜູ້ໜຶ່ງຈາກຄອບຄົວຍາດຕິພີ່ນ້ອງຂອງພໍ່ຂ້ອຍມາໃຫ້ອີຊາກ.41ຖ້າເຈົ້າເຮັດຕາມຂ້ອຍສັ່ງ ເຈົ້າກໍຈະຫວິດຈາກຄຳສາບແຊ່ງ ແລະຖ້າເຈົ້າໄດ້ຮັບຄຳປະຕິເສດຈາກຍາດພີ່ນ້ອງຈາກຄອບຄົວຂ້ອຍ ເຈົ້າກໍຈະຫວິດຈາກຄຳສາບແຊ່ງນີ້ເຊັ່ນດຽວກັນ.42ເມື່ອຂ້ອຍໄດ້ເດີນທາງມາຮອດນ້ຳສ້າງທີ່ນີ້ ຂ້ອຍໄດ້ອ້ອນວອນທູນຂໍນຳພຣະເຈົ້າວ່າ ຂ້າແດ່ອົງພຣະຜູ້ເປັນເຈົ້າຂອງອັບຣາຮາມຂໍຊົງໂຜດໃຫ້ສິ່ງທີ່ຂ້ານ້ອຍເຮັດນີ້ສຳເລັດເທີ້ນ.43ເວລານີ້ຂ້ານ້ອຍກຳລັງຢືນຢູ່ໃກ້ນ້ຳສ້າງ ຖ້າຍິງສາວຜູ້ໜຶ່ງອອກມາຕັກນ້ຳ ແລະຂ້ານ້ອຍຈະເວົ້າກັບນາງວ່າ ຂໍດື່ມນ້ຳແດ່.44ຄັນນາງຕອບວ່າ ເຊີນດື່ມແມ ແລະຂ້ອຍຈະເອົານ້ຳໃຫ້ອູດຂອງເຈົ້າກິນດ້ວຍ ຂໍໃຫ້ຜູ້ນີ້ເປັນຍິງສາວ ຜູ້ທີ່ພຣະຜູ້ເປັນເຈົ້າຊົງເລືອກໃຫ້ເປັນເມຍລູກຊາຍນາຍຂອງຂ້ານ້ອຍແດ່ທ້ອນ.
45ກ່ອນຂ້ອຍອະທິຖານຈົບ ກໍພໍດີນາງເຣເບກາແບກໄຫລົງໄປຕັກນ້ຳ ຂ້ອຍຈຶ່ງເວົ້າຕໍ່ນາງວ່າ ຂ້ອຍຂໍດື່ມນ້ຳແດ່.46ນາງຈຶ່ງຟ້າວເອົາໄຫລົງຈາກບ່າແລ້ວເວົ້າວ່າ ເຊີນດື່ມແມ ແລ້ວຂ້ານ້ອຍຈະເອົານ້ຳໃຫ້ຝູງອູດທ່ານກິນດ້ວຍ ຂ້ອຍຈຶ່ງດື່ມ ແລ້ວນາງກໍຕັກນ້ຳໃຫ້ອູດກິນຄືກັນ.47ຂ້ອຍຈຶ່ງຖາມນາງວ່າ ພໍ່ຂອງເຈົ້າແມ່ນໃຜ? ນາງຕອບວ່າ ພໍ່ຂອງຂ້ານ້ອຍແມ່ນເບທູເອນ ຂ້ານ້ອຍເປັນຫລານສາວນາໂຮແລະນາງມີລະກາ ດັ່ງນັ້ນ ຂ້ອຍຈຶ່ງເອົາປອກຄຳເກາະໃສ່ດັງ ແລະເອົາສາຍແຂນໃສ່ໃຫ້ນາງ.48ຄັນແລ້ວ ຂ້ອຍກໍຂາບລົງນະມັດສະການ ແລະສັນລະເສີນພຣະຜູ້ເປັນເຈົ້າຂອງອັບຣາຮາມ ຜູ້ຊົງພາຂ້ອຍມາຖືກບ່ອນທີ່ຂ້ອຍພົບຫລານສາວຂອງນາຍຂ້ອຍ ຜູ້ທີ່ຈະເປັນເມຍລູກຊາຍຂອງເພິ່ນ.49ບັດນີ້ຖ້າພວກເຈົ້າຍອມສະແດງຄວາມສັດຊື່ ແລະຄວາມຈິງໃຈຕໍ່ນາຍຂ້ອຍ ກໍຂໍບອກໃຫ້ຂ້ອຍຮູ້ ຫລືຖ້າຫາກບໍ່ເປັນດັ່ງນັ້ນ ກໍຂໍບອກມາເພື່ອຂ້ອຍຈະໄດ້ຕັດສິນໃຈວ່າຈະຄວນເຮັດແນວໃດ.”
50ເບທູເອນແລະລາບານຈຶ່ງຕອບວ່າ, “ດ້ວຍວ່າເລື່ອງນີ້ເປັນນ້ຳພຣະໄທຂອງພຣະຜູ້ເປັນເຈົ້າແລ້ວ ບໍ່ແມ່ນພວກເຮົາທີ່ຈະຕັດສິນໃຈແນວໃດແນວໜຶ່ງໄດ້.51ນາງເຣເບກາກໍຢູ່ນີ້ ຈົ່ງເອົານາງໄປເປັນເມຍຂອງລູກຊາຍນາຍເຈົ້າສາຕາມທີ່ພຣະອົງຊົງກ່າວໄວ້.”
52ເມື່ອຂ້າໃຊ້ອັບຣາຮາມໄດ້ຍິນເຊັ່ນນັ້ນ ລາວຈຶ່ງຂາບລົງນະມັດສະການພຣະຜູ້ເປັນເຈົ້າ.53ແລ້ວລາວກໍເອົາເຄື່ອງເງິນຄຳ ເພັດພອຍ ແລະເສື້ອຜ້າອັນງາມໆໃຫ້ນາງເຣເບກາ ລາວຍັງໄດ້ເອົາຂອງຂວັນລາຄາແພງໃຫ້ແມ່ ແລະອ້າຍຂອງນາງອີກດ້ວຍ.54ຄັນແລ້ວ ຄົນໃຊ້ຂອງອັບຣາຮາມແລະຄົນທີ່ມາກັບລາວກໍຮັບປະທານອາຫານແລ້ວຄ້າງຄືນຢູ່ທີ່ນັ້ນ ຕອນເຊົ້າເມື່ອພວກເຂົາຕື່ນຂຶ້ນ ຄົນໃຊ້ນັ້ນໄດ້ເວົ້າວ່າ, “ຈົ່ງໃຫ້ຂ້ອຍກັບເມືອຫານາຍຂອງຂ້ອຍສາ.”55ແຕ່ແມ່ ແລະອ້າຍຂອງເຣເບກາເວົ້າວ່າ, “ຂໍໃຫ້ນາງຢູ່ກັບພວກເຮົາກ່ອນຈັກອາທິດໜຶ່ງຫລືຈັກສິບມື້ ແລ້ວຈຶ່ງຄ່ອຍໄປບໍ່ໄດ້ບໍ?”56ແຕ່ລາວຕອບວ່າ, “ຢ່າຖ່ວງດຶງຂ້ອຍໄວ້ເລີຍ ອົງພຣະຜູ້ເປັນເຈົ້າຊົງໃຫ້ການເດີນທາງຂອງຂ້ອຍບັງເກີດຜົນແລ້ວ ຈົ່ງໃຫ້ຂ້ອຍກັບເມືອຫານາຍຂ້ອຍສາ.”57ພວກເຂົາຈຶ່ງຕອບວ່າ, “ຄັນຊັ້ນໃຫ້ເອີ້ນນາງມາຖາມເບິ່ງວ່າ ນາງຈະເວົ້າວ່າຈັ່ງໃດ.”58ພວກເຂົາຈຶ່ງໄດ້ເອີ້ນນາງເຣເບກາມາຖາມວ່າ, “ເຈົ້າຈະໄປກັບເພິ່ນບໍ?” ນາງຈຶ່ງຕອບວ່າ, “ໂດຍ ຂ້ານ້ອຍຈະໄປ.”
59ດ້ວຍເຫດນີ້ພວກເຂົາຈຶ່ງມອບນາງເຣເບກາພ້ອມກັບແມ່ນົມຂອງນາງ ໃຫ້ໄປກັບຄົນໃຊ້ຂອງອັບຣາຮາມແລະຄົນຂອງລາວ.60ກ່ອນຈະຈາກໄປພວກເຂົາໄດ້ອວຍພອນໃຫ້ແກ່ນາງເຣເບກາມີຂໍ້ຄວາມດັ່ງນີ້: “ນ້ອງເອີຍ ຂໍໃຫ້ເຈົ້າເປັນແມ່ຂອງຄົນຫລາຍແສນ ຂໍໃຫ້ເຊື້ອສາຍຂອງເຈົ້າ ຜາບແພ້ສັດຕູ.”
61ຄັນແລ້ວ ນາງເຣເບກາແລະສາວໃຊ້ກໍຂຶ້ນຫລັງອູດອອກເດີນທາງໄປກັບຄົນໃຊ້ຂອງອັບຣາຮາມ.
62ຝ່າຍອີຊາກພວມຫາກໍກັບມາແຕ່ນ້ຳສ້າງທີ່ຊື່ວ່າ, “ນ້ຳສ້າງຂອງພຣະເຈົ້າຜູ້ຊົງເຫັນຂ້ອຍ” ຢູ່ໃນແຄວ້ນເນເກັບ.63ໃນຕອນແລງລາວໄດ້ອອກໄປຍ່າງຫລິ້ນໃນທົ່ງນາ ເລີຍເຫັນຂະບວນອູດກຳລັງມາ.64ເມື່ອນາງເຣເບກາເຫັນອີຊາກ ນາງຈຶ່ງລົງຈາກຫລັງອູດ.65ແລ້ວຖາມຄົນໃຊ້ຂອງອັບຣາຮາມວ່າ, “ຜູ້ຊາຍທີ່ກຳລັງຍ່າງມານັ້ນແມ່ນໃຜ?” ລາວຈຶ່ງຕອບນາງວ່າ, “ແມ່ນນາຍຂອງຂ້ອຍ.” ເມື່ອໄດ້ຍິນດັ່ງນັ້ນນາງຈຶ່ງເອົາຜ້າອັດໜ້າໄວ
66ຄົນໃຊ້ຈຶ່ງໄດ້ເລົ່າທຸກສິ່ງທຸກຢ່າງທີ່ໄດ້ເຮັດມາສູ່ອີຊາກຟັງ.67ຄັນແລ້ວອີຊາກກໍພານາງເຣເບກາເຂົ້າມາໃນເຕັນຂອງແມ່ ແລະຮັບເອົານາງເປັນເມຍ ອີຊາກກໍຮັກນາງເຣເບກາ ດັ່ງນັ້ນລາວຈຶ່ງມີຄວາມສະບາຍໃຈຂຶ້ນ ຫລັງຈາກໄດ້ສູນເສຍແມ່ສຸດທີ່ຮັກໄປແລ້ວ.