1ຖ້ອຍຄຳຂອງປັນຍາຈານ ຜູ້ເປັນລູກຊາຍຂອງດາວິດ ກະສັດໃນເຢຣູຊາເລັມ.
2ປັນຍາຈານກ່າວວ່າ ບໍ່ເປັນປະໂຫຍດ ບໍ່ໄດ້ຜົນ
ສາລະພັດລ້ວນແຕ່ບໍ່ໄດ້ຜົນ.
3ມະນຸດເຮັດວຽກໜັກຈົນໝົດເຫື່ອແຮງພາຍໃຕ້ດວງຕາເວັນ
ລາວໄດ້ປະໂຫຍດຫຍັງຈາກງານທັງໝົດທີ່ລາວເຮັດນັ້ນ?
4ຊົ່ວອາຍຸໜຶ່ງລ່ວງໄປ ແລະອີກຊົ່ວອາຍຸໜຶ່ງກໍມາ
ແຕ່ແຜ່ນດິນໂລກຍັງຄົງເດີມຢູ່ເປັນນິດ.
5ດວງຕາເວັນຂຶ້ນ ແລະດວງຕາເວັນຕົກ
ແລ້ວຮີບໄປເຖິງບ່ອນ ຊຶ່ງມັນຂຶ້ນມານັ້ນ.
6ລົມພັດໄປທາງໃຕ້ ແລ້ວວຽນກັບໄປທາງເໜືອ ລົມພັດວຽນໄປວຽນມາ
ແລ້ວລົມກໍພັດກັບຕາມທາງວຽນຂອງມັນ.
7ແມ່ນ້ຳທັງຫລາຍໄຫລໄປສູ່ທະເລ ແຕ່ທະເລກໍບໍ່ເຕັມ
ແມ່ນ້ຳໄຫລໄປສູ່ບ່ອນໃດກໍໄຫລໄປສູ່ບ່ອນນັ້ນອີກ.
8ສາລະພັດນຳໄປສູ່ຄວາມເບື່ອໜ່າຍ ແມ່ນໃຜກໍເວົ້າບໍ່ອອກ
ຕາກໍເບິ່ງບໍ່ອີ່ມ ຫລືຫູກໍຟັງບໍ່ເຕັມ.
9ສິ່ງທີ່ເປັນຂຶ້ນແລ້ວຄືສິ່ງທີ່ຈະເປັນຂຶ້ນອີກ ສິ່ງທີ່ເຮັດແລ້ວຄືສິ່ງທີ່ຈະຕ້ອງເຮັດອີກ
ແລະບໍ່ມີສິ່ງໃດໃໝ່ພາຍໃຕ້ດວງຕາເວັນ.
10ມີອັນໃດແດ່ທີ່ເຂົາຈະເວົ້າໄດ້ວ່າ “ເບິ່ງແມ ສິ່ງນີ້ໃໝ່”
ສິ່ງນັ້ນມີຢູ່ແລ້ວໃນສະໄໝກ່ອນເຮົາທັງຫລາຍ.
11ບໍ່ມີການຈື່ຈຳເຖິງສະໄໝກ່ອນ
ແລະຈະບໍ່ມີການຈົດຈຳສິ່ງຫລັງໆທີ່ຈະເກີດມາທ່າມກາງບັນດາຜູ້ທີ່ມາພາຍຫລັງ.
12ຂ້າພະເຈົ້າ ປັນຍາຈານ ເຄີຍເປັນກະສັດເໜືອອິສຣາເອນໃນກຸງເຢຣູຊາເລັມ.13ຂ້າພະເຈົ້າຕັ້ງໃຈຊອກ ແລະສະແຫວງຫາໂດຍສະຕິປັນຍາ ເຖິງສິ່ງສາລະພັດທີ່ເຮັດພາຍໃຕ້ຟ້າສະຫວັນ ເປັນເລື່ອງຍາກລຳບາກຊຶ່ງພຣະເຈົ້າປະທານໃຫ້ລູກຂອງມະນຸດເຮັດຢູ່ນັ້ນ.14ຂ້າພະເຈົ້າເຄີຍເຫັນການທັງປວງ ຊຶ່ງເຂົາເຮັດພາຍໃຕ້ດວງຕາເວັນ ແລະເບິ່ງແມ ສາລະພັດກໍບໍ່ໄດ້ຜົນ ຄືກິນລົມກິນແລ້ງ.
15ແມ່ນຫຍັງທີ່ຄົດແລ້ວຈະເຮັດໃຫ້ຊື່ບໍ່ໄດ້
ແລະແມ່ນຫຍັງທີ່ຂາດຢູ່ຈະນັບໃຫ້ຄົບກໍບໍ່ໄດ້.
16ຂ້າພະເຈົ້າຄຶດໃນໃຈວ່າ “ເບິ່ງແມ ຂ້າພະເຈົ້າມີຖານະສູງ ແລະໄດ້ສະຕິປັນຍາຫລາຍກວ່າທຸກຄົນທີ່ຢູ່ໃນເມືອງເຢຣູຊາເລັມກ່ອນຂ້າພະເຈົ້າ ເອີ ໃຈຂ້າພະເຈົ້າກໍໄດ້ເຫັນໃນສະຕິປັນຍາ ແລະຄວາມຮູ້ຢ່າງຫລວງຫລາຍ”.17ຂ້າພະເຈົ້າຕັ້ງໃຈຈະໄດ້ຮູ້ສະຕິປັນຍາ ຮູ້ຄວາມບ້າ ແລະຄວາມໂງ່ຈ້າ ຂ້າພະເຈົ້າສັງເກດເຫັນວ່າເລື່ອງນີ້ກໍເປັນພຽງແຕ່ການໄລ່ຕາມລົມ.
18ເພາະໃນສະຕິປັນຍາຫລວງຫລາຍກໍມີຄວາມທຸກລະທົມຫລາຍ
ແລະບຸກຄົນທີ່ເພີ່ມຄວາມຮູ້ ກໍເພີ່ມຄວາມເສົ້າໂສກ.