ໂກໂລຊາຍ
1ໂປໂລ ອັກຄະສາວົກຂອງພຣະເຢຊູຄຣິດຕາມນ້ຳພຣະໄທຂອງພຣະເຈົ້າ ກັບຕີໂມທຽວນ້ອງຊາຍຂອງເຮົາ. ເຖິງ ພວກໄພ່ພົນຂອງພຣະເຈົ້າແລະພວກພີ່ນ້ອງທີ່ເຫລື້ອມໃສສັດທາໃນພຣະຄຣິດທີ່ເມືອງໂກໂລຊາຍ2ຂໍໃຫ້ພຣະຄຸນແລະສັນຕິສຸດຊຶ່ງມາຈາກພຣະບິດາເຈົ້າຂອງເຮົາທັງຫລາຍ ແລະພຣະຄຣິດເຈົ້າ ຈົ່ງສະຖິດຢູ່ນຳເຈົ້າທັງຫລາຍເທີນ.
ຄຳອ້ອນວອນຂອງໂປໂລເພື່ອຄຣິສະຕຽນຊາວໂກໂລຊາຍ
3ເມື່ອເຮົາອ້ອນວອນເພື່ອເຈົ້າທັງຫລາຍ ເຮົາກໍຂອບພຣະຄຸນພຣະບິດາເຈົ້າຂອງພຣະເຢຊູຄຣິດເຈົ້າຂອງເຮົາທັງຫລາຍຢູ່ສະເໝີ.4ເພາະພວກເຮົາໄດ້ຍິນເຖິງຄວາມເຊື່ອຂອງເຈົ້າທັງຫລາຍໃນພຣະເຢຊູຄຣິດ ແລະເລື່ອງຄວາມຮັກຊຶ່ງພວກເຈົ້າມີຕໍ່ໄພ່ພົນທັງປວງຂອງພຣະເຈົ້າ.5ໂດຍເຫດຊຶ່ງມີຄວາມຫວັງທີ່ຊົງຮັກສາໄວ້ສຳລັບເຈົ້າທັງຫລາຍໃນສະຫວັນ ຊຶ່ງເມື່ອກ່ອນພວກເຈົ້າເຄີຍໄດ້ຍິນມາແລ້ວໃນຄຳອັນສັດຈິງ ຄືຂ່າວປະເສີດນັ້ນ.6ຊຶ່ງແຜ່ຜາຍມາເຖິງເຈົ້າທັງຫລາຍຕາມທີ່ກຳລັງເກີດຜົນແລະທະວີຂຶ້ນທົ່ວໂລກ ຢ່າງດຽວກັບກຳລັງເປັນຢູ່ໃນຖ້າມກາງເຈົ້າທັງຫລາຍດ້ວຍ ຕັ້ງແຕ່ວັນທີ່ພວກເຈົ້າໄດ້ຍິນແລະໄດ້ເຂົ້າໃຈໃນພຣະຄຸນຂອງພຣະເຈົ້າຕາມຄວາມຈິງ.
7ດັ່ງທີ່ເຈົ້າທັງຫລາຍໄດ້ຮຽນຮູ້ຈາກເອປາຟາ ຜູ້ເປັນເພື່ອນຮ່ວມງານ
ພາສາເດີມວ່າ “ຜູ້ເປັນຂ້ອຍຂ້າເພື່ອນດ້ວຍກັນ.”
ທີ່ຮັກຂອງພວກເຮົາ ເພິ່ນເປັນຜູ້ປະຕິບັດອົງພຣະຄຣິດແທນເຮົາດ້ວຍໃຈສັດຊື່.8ເພິ່ນໄດ້ເລົ່າໃຫ້ເຮົາຟັງເຖິງຄວາມຮັກ ຊຶ່ງພຣະວິນຍານຊົງປະທານແກ່ເຈົ້າທັງຫລາຍດ້ວຍ.9ເພາະເຫດນີ້, ນັບຕັ້ງແຕ່ວັນທີ່ເຮົາໄດ້ຍິນ ເຮົາກໍບໍ່ໄດ້ຢຸດໃນການອ້ອນວອນເພື່ອພວກເຈົ້າທັງຫລາຍ ທູນຂໍເພື່ອໃຫ້ພວກເຈົ້າປະກອບເຕັມໄປດ້ວຍຄວາມຮູ້ເຖິງນ້ຳພຣະໄທຂອງພຣະອົງ, ໃນສັບພຣະປັນຍາແລະຄວາມເຂົ້າໃຈຊຶ່ງມາຈາກພຣະວິນຍານ.10ເພື່ອເຈົ້າທັງຫລາຍຈະໄດ້ດຳເນີນຊີວິດຢ່າງທີ່ຄວນຕໍ່ອົງພຣະຜູ້ເປັນເຈົ້າ ແລະເປັນທີ່ຊອບພຣະໄທພຣະອົງຢ່າງແທ້ຈິງ, ໃຫ້ເກີດຜົນໃນການດີທຸກຢ່າງ ແລະຈະເລີນຂຶ້ນໃນຄວາມຮູ້ເຖິງພຣະເຈົ້າ.11ຂໍໃຫ້ເຈົ້າທັງຫລາຍມີກຳລັງແຂງແຮງຂຶ້ນທຸກຢ່າງ ໂດຍລິດເດດອັນຮຸ່ງເຮືອງຂອງພຣະອົງ ເພື່ອຈະສາມາດອົດທົນທຸກສິ່ງ ແລະມີຄວາມໝັ່ນພຽນດ້ວຍຄວາມຍິນດີ.12ຈົ່ງຂອບພຣະຄຸນພຣະບິດາ ຜູ້ຊົງບັນດານໃຫ້ເຈົ້າທັງຫລາຍສົມກັບທີ່ຈະເຂົ້າສ່ວນ ໄດ້ຮັບມໍລະດົກດ້ວຍກັນກັບໄພ່ພົນໃນຄວາມສະຫວ່າງ.13ພຣະອົງໄດ້ຊົງໂຜດດຶງເຮົາທັງຫລາຍໃຫ້ພົ້ນຈາກອຳນາດຂອງຄວາມມືດ ແລະໄດ້ຊົງໂຍກຍ້າຍພວກເຮົາໄປຕັ້ງໄວ້ໃນລາຊະອານາຈັກແຫ່ງພຣະບຸດ ທີ່ຮັກຂອງພຣະອົງ.14ໃນພຣະບຸດນັ້ນເຮົາທັງຫລາຍຈຶ່ງໄດ້ຮັບການໄຖ່ໃຫ້ພົ້ນ ຄືຊົງໂຜດຍົກຜິດບາບທັງຫລາຍຂອງພວກເຮົາ.
ຄວາມສົມບູນຂອງພຣະຄຣິດ
15ພຣະອົງຊົງເປັນແບບລັກສະນະຂອງພຣະເຈົ້າ ຜູ້ຊຶ່ງຕາເຫັນບໍ່ໄດ້,
ຊົງເປັນບຸດແຮກເໜືອສາລະພັດທີ່ໄດ້ຊົງນິລະມິດສ້າງຂຶ້ນນັ້ນ.
16ເພາະວ່າໃນພຣະອົງ ພຣະເຈົ້າໄດ້ຊົງສ້າງສັບພະທຸກສິ່ງຂຶ້ນ
ທັງໃນທ້ອງຟ້າແລະເທິງແຜ່ນດິນໂລກ, ສິ່ງທີ່ຕາເຫັນໄດ້ແລະທີ່ເຫັນບໍ່ໄດ້,
ຈະເປັນພຣະທີ່ນັ່ງຫລືລິດທານຸພາບ, ເປັນຜູ້ປົກຄອງຫລືຜູ້ມີອຳນາດ,
ສິ່ງທັງປວງເຫລົ່ານີ້ແມ່ນພຣະເຈົ້າໄດ້ສ້າງໂດຍທາງພຣະອົງແລະສຳລັບພຣະອົງ.
17ພຣະອົງຊົງເປັນຢູ່ກ່ອນສິ່ງສາລະພັດ
ແລະສິ່ງສາລະພັດນັ້ນເປັນລະບຽບຢູ່ໂດຍພຣະອົງ.
18ພຣະອົງຊົງເປັນສີສະຂອງພຣະກາຍ ຄື ຄຣິສຕະຈັກ ພຣະອົງຊົງເປັນປະຖົມ,
ເປັນຜູ້ແຮກທີ່ຖືກຊົງບັນດານໃຫ້ຄືນມາຈາກຕາຍ
ເພື່ອພຣະອົງຈະຊົງເປັນເອກໃນສັບພະສິ່ງທັງປວງ.
19ເພາະວ່າພຣະບິດາຊົງພໍພຣະໄທ
ທີ່ຈະໃຫ້ສະພາບຂອງພຣະເຈົ້າສະຖິດຢູ່ໃນພຣະບຸດຢ່າງເຕັມບໍລິບູນ.
20ແລະໂດຍພຣະບຸດນັ້ນຈະຊົງເຮັດໃຫ້ສິ່ງສາລະພັດກັບຄືນດີກັບພຣະເຈົ້າ
ບໍ່ວ່າສິ່ງນັ້ນຈະຢູ່ໃນແຜ່ນດິນໂລກຫລືໃນສະຫວັນ
ພຣະອົງໄດ້ບັນດານໃຫ້ເກີດສັນຕິພາບດ້ວຍພຣະໂລຫິດ
ຊຶ່ງໄຫລທີ່ໄມ້ກາງແຂນຂອງພຣະອົງ.
21ແລະເຈົ້າທັງຫລາຍ, ຊຶ່ງເມື່ອກ່ອນນັ້ນບໍ່ແມ່ນພົນລະເມືອງຂອງພຣະເຈົ້າ ແຕ່ເປັນສັດຕູທາງດ້ານຈິດໃຈດ້ວຍການຊົ່ວຮ້າຍຕ່າງໆ.22ບັດນີ້ພຣະອົງຊົງໂຜດໃຫ້ຄືນດີກັບພຣະອົງ ໂດຍການສິ້ນພຣະຊົນແຫ່ງພຣະກາຍ ຄືເນື້ອໜັງຂອງພຣະອົງ ເພື່ອຈະໄດ້ຊົງຖວາຍພວກເຈົ້າຕໍ່ພຣະພັກພຣະເຈົ້າໃຫ້ເປັນຄົນບໍລິສຸດທີ່ບໍ່ມີຕຳໜິຕິຕຽນໄດ້.23ແຕ່ເຈົ້າທັງຫລາຍຕ້ອງຕັ້ງໝັ້ນຢູ່ໃນຄວາມເຊື່ອ ຊຶ່ງໄດ້ວາງຮາກລົງຢ່າງແໜ້ນໜາຖາວອນແລ້ວ ແລະຢ່າໄດ້ໜີຈາກຄວາມໄວ້ວາງໃຈໃນຂ່າວປະເສີດທີ່ພວກເຈົ້າໄດ້ຍິນແລ້ວ, ແລະໄດ້ປະກາດແລ້ວແກ່ມະນຸດທຸກຄົນທີ່ຢູ່ທົ່ວໃຕ້ຟ້າ ຊຶ່ງເຮົາ, ໂປໂລ, ເປັນຜູ້ຮັບໃຊ້ໃນການປະກາດຂ່າວປະເສີດນັ້ນ.
ການຮັບໃຊ້ຂອງໂປໂລຕໍ່ຄຣິສຕະຈັກ
24ບັດນີ້ເຮົາມີຄວາມຍິນດີໃນການທີ່ໄດ້ຮັບຄວາມທຸກເພື່ອເຈົ້າທັງຫລາຍ ສ່ວນການທົນທຸກຂອງພຣະຄຣິດທີ່ຍັງຂາດຢູ່ນັ້ນ ເຮົາກໍຮັບທົນຈົນສຳເລັດໃນເນື້ອກາຍຂອງເຮົາ ເພາະເຫັນແກ່ພຣະກາຍຂອງພຣະອົງ ຄື ຄຣິສຕະຈັກ.25ເຮົາໄດ້ມາເປັນຜູ້ຮັບໃຊ້ຄຣິສຕະຈັກນັ້ນ ຕາມທີ່ພຣະເຈົ້າໄດ້ຊົງໂຜດມອບພາລະໃຫ້ເຮົາເພື່ອເຈົ້າທັງຫລາຍ ເພື່ອຈະໄດ້ກ່າວຂ່າວພຣະທຳຂອງພຣະເຈົ້າຢ່າງຄົບຖ້ວນ.26ຄືຂໍ້ຄວາມອັນລັບເລິກທີ່ໄດ້ຊົງບັງໄວ້ແຕ່ຫລາຍເຊັ່ນແລະຫລາຍຊົ່ວອາຍຸນັ້ນ ມາບັດນີ້ໄດ້ຊົງໂຜດປະກົດແຈ້ງແກ່ໄພ່ພົນຂອງພຣະອົງແລ້ວ.27ພຣະເຈົ້າຊົງມີພຣະປະສົງທີ່ຈະສະແດງໃຫ້ແກ່ໄພ່ພົນເຫລົ່ານັ້ນຮູ້ວ່າ ໃນຖ້າມກາງຄົນຕ່າງຊາດອັນໃດເປັນຄວາມສົມບູນອັນປະກອບດ້ວຍສະຫງ່າລາສີແຫ່ງຂໍ້ເລິກລັບ ຄືທີ່ພຣະຄຣິດໄດ້ຊົງສະຖິດຢູ່ໃນເຈົ້າທັງຫລາຍ ຊຶ່ງເປັນເຫດໃຫ້ຫວັງວ່າຈະໄດ້ເຖິງສະຫງ່າລາສີນັ້ນ.28ພຣະອົງນັ້ນແຫລະ, ທີ່ພວກເຮົາປະກາດຢູ່ ໂດຍເຕືອນສະຕິແລະສັ່ງສອນທຸກຄົນດ້ວຍປັນຍາທຸກຢ່າງ ເພື່ອຈະໄດ້ຖວາຍທຸກຄົນຕໍ່ພຣະພັກພຣະເຈົ້າເໝືອນເປັນຄົນໃຫຍ່ຖ້ວນແລ້ວໃນພຣະຄຣິດ.29ເພື່ອການນີ້ແຫລະ, ເຮົາຈຶ່ງທົນການໜັກໜ່ວງດ້ວຍການອົດສາສູ້ ຕາມພຣະກຳລັງຂອງພຣະອົງຜູ້ຊົງໂຜດກະທຳດ້ວຍລິດອຳນາດໃນຕົວເຮົາຢູ່.