ເກີດການອົນລະຫົນວຸ້ນວາຍທີ່ເມືອງເທຊະໂລນິກ
1ເມື່ອທ່ານທັງສອງໄດ້ຜ່ານເມືອງອຳຟີໂປລີແລະເມືອງອາໂປໂລເນຍ ກໍມາເຖິງເມືອງເທຊະໂລນິກ ທີ່ນັ້ນມີໂຮງທຳມະເທດສະໜາຂອງຊາວຢິວ.2ໂປໂລໄດ້ເຂົ້າໄປຫາເຂົາໃນໂຮງທຳຕາມເຄີຍ ແລະໄດ້ອ້າງຂໍ້ຄວາມໃນພຣະຄຳພີໂຕ້ຕອບກັບເຂົາໄດ້ສາມວັນຊະບາໂຕ.3ແລະໄຂຂໍ້ຄວາມຊີ້ແຈ້ງໃຫ້ເຫັນວ່າ ຈຳເປັນທີ່ອົງພຣະຄຣິດ ຕ້ອງຊົງທົນທຸກທໍລະມານ ແລະຖືກຊົງບັນດານໃຫ້ເປັນຄືນມາ ແລະກ່າວຕໍ່ໄປວ່າ, “ພຣະເຢຊູຜູ້ທີ່ເຮົາປະກາດແກ່ທ່ານທັງຫລາຍ ຜູ້ນີ້ແຫລະ, ເປັນພຣະຄຣິດ.”4ບາງຄົນໃນພວກເຂົາໄດ້ຍອມເຊື່ອຈິ່ງສະໝັກເຂົ້າເປັນພັກພວກຂອງໂປໂລກັບຊີລາ ຮ່ວມທັງຊາດກຣີກຜູ້ຢຳເກງພຣະເຈົ້າແລະຍິງຜູ້ສຳຄັນບໍ່ໃຊ້ໜ້ອຍຄົນ.5ແຕ່ພວກຢິວໄດ້ຄິດເຫິງສາ ໄປຄົບຄິດກັບຄົນພານຕາມຕະຫລາດ ຮວບຮວມກັນມາຢ່າງຫລວງຫລາຍກໍ່ການອົນລະຫົນວຸ້ນວາຍຂຶ້ນໃນເມືອງ ແລ້ວເຂົ້າບຸກລຸກເຮືອນຂອງຢາໂຊນ ພະຍາຍາມຈະນຳເອົາທັງສອງອອກມາໃຫ້ປະຊາຊົນ.6ເມື່ອບໍ່ພົບເຂົາຈິ່ງລາກເອົາຢາໂຊນກັບພີ່ນ້ອງລາງຄົນໄປຫາຜູ້ປົກຄອງເມືອງນັ້ນແລະຮ້ອງຂຶ້ນວ່າ, “ຄົນເຫລົ່ານີ້ເປັນພວກຂວ້ຳໂລກມະນຸດໄດ້ມາທີ່ນີ້.7ແລ້ວຢາໂຊນໄດ້ຮັບຕ້ອນເຂົາໄວ້ ແລະບັນດາຄົນເຫລົ່ານີ້ໄດ້ເຮັດຜິດຕໍ່ຂໍ້ດຳລັດຂອງກາຍຊາ ໂດຍກ່າວວ່າ, “ມີກະສັດອີກອົງໜຶ່ງຄືເຢຊູ.”8ດ້ວຍຂໍ້ຄວາມນັ້ນພວກຢິວໄດ້ເຮັດໃຫ້ປະຊາຊົນກັບພວກຜູ້ປົກຄອງຮ້ອນໃຈຂຶ້ນ.9ແລະເມື່ອມີຜູ້ຮັບປະກັນຕົວຂອງຢາໂຊນແລະຄົນອື່ນໆ ແລ້ວກໍປ່ອຍເຂົາໄປ.
ໂປໂລກັບຊີລາທີ່ເມືອງເບເຣຍ
10ໃນບັດດຽວນັ້ນພວກພີ່ນ້ອງຈິ່ງໃຫ້ໂປໂລກັບຊີລາອອກໄປຍັງເມືອງເບເຣຍໃນເວລາກາງຄືນ ເມື່ອເຖິງແລ້ວທ່ານທັງສອງໄດ້ເຂົ້າໄປໃນໂຮງທຳມະເທດສະໜາຂອງຊາວຢິວ.11ພວກຢິວເຫລົ່ານີ້ມີຈິດໃຈສູງສົ່ງກວ່າຊາວເມືອງເທຊະໂລນິກ ເພາະເຂົາມີຈິດໃຈເຫລື້ອມໃສຮັບເອົາພຣະທຳແລະຄົ້ນເບິ່ງພຣະຄຳພີທຸກວັນ ເພື່ອຢາກຮູ້ວ່າຂໍ້ຄວາມນັ້ນເປັນຈິງດັ່ງກ່າວໄວ້ຫລືບໍ່.12ເຫດສັນນັ້ນໃນພວກເຂົາມີຫລາຍຄົນໄດ້ຮັບເຊື່ອ ແລະພວກຜູ້ຍິງທີ່ມີກຽດຕິຍົດກັບຜູ້ຊາຍຊາວກຣີກບໍ່ໃຊ່ໜ້ອຍຄົນໄດ້ຮັບເຊື່ອເໝືອນກັນ.13ແຕ່ເມື່ອພວກຢິວໃນເມືອງເທຊະໂລນິກຊາບຂ່າວວ່າ ໂປໂລໄດ້ປະກາດພຣະທຳໃນເມືອງເບເຣຍເໝືອນກັນ ເຂົາກໍພາກັນມາທີ່ນັ້ນຍົວະຍົງປະຊາຊົນໃຫ້ວຸ້ນວາຍຂຶ້ນ.14ໃນທັນໃດນັ້ນພວກພີ່ນ້ອງໄດ້ໃຫ້ໂປໂລອອກໄປເຖິງແຄມທະເລ ສ່ວນຊີລາກັບຕີໂມທຽວຍັງພັກຢູ່ທີ່ນັ້ນ.15ຄົນທີ່ໄດ້ສົ່ງໂປໂລໄປນັ້ນກໍໄດ້ນຳທ່ານໄປເຖິງກຸງອາແຖນ ແລະເມື່ອໄດ້ຮັບຄຳສັ່ງຈາກທ່ານບອກຊີລາກັບຕີໂມທຽວໃຫ້ມາຫາທ່ານໄວທີ່ສຸດເທົ່າທີ່ຈະໄວໄດ້ ເຂົາກໍຈາກໄປ.
ໂປໂລທີ່ກຸງອາແຖນ
16ຂະນະທີ່ໂປໂລຍັງລໍຖ້າຊີລາກັບຕີໂມທຽວຢູ່ກຸງອາແຖນນັ້ນ ທ່ານກໍມີຄວາມເດືອດຮ້ອນເຄືອງໃຈ ເພາະໄດ້ເຫັນເມືອງນັ້ນເຕັມໄປດ້ວຍພຣະທຽມ.17ເຫດສັນນັ້ນທ່ານຈິ່ງໄດ້ໂຕ້ຖຽງກັນພວກຢິວ ແລະຜູ້ທີ່ຢຳເກງພຣະເຈົ້າໃນໂຮງທຳ ແລະກັບບຸກຄົນທີ່ພົບໃນບ່ອນປະຊຸມຊົນທຸກວັນ.18ມີນັກປາດລາງຄົນໃນພວກເອປີກູຣຽວແລະໃນພວກສະໂຕອີໂກໄດ້ມາພົບທ່ານ ລາງຄົນກ່າວວ່າ, “ຄົນເກັບເລັມຄວາມຮູ້ຜູ້ນີ້ຢາກ ເວົ້າອັນໃດ” ລາງຄົນກ່າວວ່າ “ເໝືອນເປັນຜູ້ປະກາດພຣະຕ່າງດ້າວ” ເພາະໂປໂລປະກາດຂ່າວປະເສີດ ເລື່ອງພຣະເຢຊູແລະການຄືນມາຈາກຕາຍ.19ດັ່ງນັ້ນເຂົາຈຶ່ງຈັບໂປໂລພາໄປຍັງສະພາອາເຣໂອປາໂຄ ແລ້ວຖາມວ່າ “ເຮົາຂໍຮູ້ໄດ້ຫລືບໍ່ວ່າ ຄວາມສອນອັນໃໝ່ທີ່ທ່ານກ່າວນັ້ນເປັນຢ່າງໃດ.20ດ້ວຍວ່າທ່ານນຳເລື່ອງແປກປະຫລາດເຖິງຫູຂອງພວກເຮົາ ເຫດສັນນັ້ນ ພວກເຮົາຢາກຊາບວ່າເລື່ອງເຫລົ່ານີ້ມີຄວາມໝາຍຢ່າງໃດ.”21ເພາະຊາວອາແຖນທັງປວງກັບພວກຕ່າງປະເທດຊຶ່ງອາໃສຢູ່ທີ່ນັ້ນ ບໍ່ເຄີຍເສຍເວລາກ່ຽວກັບສິ່ງອື່ນໃດ ນອກຈາກຈະກ່າວຫລືຟັງສິ່ງໃໝ່ໆ.
22ຝ່າຍໂປໂລຈິ່ງຢືນຂຶ້ນຖ້າມກາງສະພາອາເຣໂອປາໂຄ ແລ້ວກ່າວວ່າ, “ທ່ານຊາວກຸງອາແຖນເອີຍ, ໃນທຸກສິ່ງທຸກປະການຂ້າພະເຈົ້າເຫັນວ່າພວກທ່ານເປັນຜູ້ປະຕິບັດພະຕ່າງໆ ຢ່າງເຄັງຄັດ.23ເພາະວ່າເມື່ອຂ້າພະເຈົ້າຜ່ານມາສັ່ງເກດເບິ່ງສິ່ງທັງປວງທີ່ພວກທ່ານນະມັດສະການ ກໍໄດ້ເຫັນແທ່ນອັນໜຶ່ງມີຄຳຈາລຶກໄວ້ວ່າ ‘ແດ່ພຣະເຈົ້າທີ່ເຮົາບໍ່ຮູ້ຈັກ’ ເຫດສັນນັ້ນພະທີ່ທ່ານທັງຫລາຍນະມັດສະການເມື່ອຍັງບໍ່ຮູ້ຈັກ ພຣະເຈົ້າອົງນັ້ນແຫລະ, ຂ້າພະເຈົ້າມາປະກາດແກ່ພວກທ່ານ.24ພຣະເຈົ້າຜູ້ຊົງສ້າງໂລກກັບສິ່ງທັງປວງທີ່ຢູ່ໃນໂລກນັ້ນ ຄືຜູ້ຊົງເປັນເຈົ້າສະຫວັນແລະແຜ່ນດິນໂລກ ພຣະອົງນັ້ນແຫລະ, ບໍ່ໄດ້ຊົງສະຖິດຢູ່ໃນວິຫານທີ່ມືມະນຸດສ້າງໄວ້.25ພຣະອົງບໍ່ຈຳເປັນໃຫ້ມະນຸດປະຕິບັດພຣະອົງ ເໝືອນວ່າຊົງມີພຣະປະສົງສິ່ງໜຶ່ງສິ່ງໃດ ເພາະພຣະອົງນີ້ແຫລະ, ຊົງເປັນຜູ້ປະທານຊີວິດ, ລົມຫັນໃຈ, ແລະສິ່ງສາລະພັດແກ່ຄົນທັງປວງ.
26ພຣະອົງໄດ້ຊົງສ້າງມະນຸດທຸກຊາດ ໃຫ້ເກີດມາຈາກມະນຸດຄົນດຽວ
ຫລື “ໃຫ້ເກີດມາຈາກສາຍເລືອດອັນດຽວ.”
ແລະໃຫ້ເຂົາຢູ່ທົ່ວພີພົບໂລກ ພຣະອົງໄດ້ຊົງກຳນົດເວລາອາດຈະໝາຍເຖິງເວລາຕ່າງໆ ຄື ວັນ, ອາທິດ, ເດືອນ, ປີ, ສັດຕະວັດ ຯລຯ ຫລືສະໄໝຕ່າງ ໆ.
ແລະກຳນົດເຂດທີ່ເຂົາຢູ່ນັ້ນ.27ເພື່ອເຂົາຈະໄດ້ສະແຫວງຫາພຣະເຈົ້າ ຫວັງວ່າເຂົາຈະງົມຫາຈົນພົບພຣະອົງ ແຕ່ທີ່ຈິງພຣະອົງບໍ່ໄດ້ຊົງຢູ່ໄກຈາກເຮົາທຸກຄົນ.28ເພາະວ່າ ‘ໃນພຣະອົງນັ້ນພວກເຮົາມີຊີວິດ, ເຄື່ອນໄຫວໄປມາ, ແລະເປັນຢູ່’ ດັ່ງນັກແຕ່ງກາບກອນໃນພວກທ່ານລາງຄົນໄດ້ກ່າວວ່າ, ‘ພວກເຮົາເປັນເຊື້ອສາຍຂອງພຣະອົງເໝືອນກັນ.’29ເຫດສັນນັ້ນເມື່ອເຮົາເປັນເຊື້ອສາຍຂອງພຣະເຈົ້າ ແລ້ວພວກເຮົາກໍບໍ່ຄວນຖືວ່າພຣະເຈົ້າຊົງເປັນຄຳ, ເງິນ, ຫລືຫີນ ທີ່ສະຫລັກຄວັດຫລືແຕ້ມດ້ວຍສິລະປະແລະຄວາມນຶກຄຶດຂອງມະນຸດ.30ໃນສະໄໝທີ່ມະນຸດຍັງໂງ່ບໍ່ຮູ້ຈັກພຣະເຈົ້າ ພຣະອົງກໍບໍ່ຊົງຖືໂທດຫລື “ຊົງທຳເສີຍຄືບໍ່ຊົງເຫັນ.”
ແຕ່ບັດນີ້ພຣະອົງຊົງສັ່ງແກ່ມະນຸດທັງປວງໃນທົ່ວທຸກບ່ອນ ໃຫ້ຖິ້ມໃຈເກົ່າເອົາໃຈໃໝ່.31ເພາະວ່າພຣະອົງໄດ້ຊົງກຳນົດວັນໜຶ່ງໄວ້ ໃນວັນນັ້ນພຣະອົງຈະຊົງພິພາກສາໂລກຕາມຍຸດຕິທຳ ໂດຍມະນຸດຜູ້ໜຶ່ງຊຶ່ງພຣະອົງໄດ້ຊົງຕັ້ງໄວ້ ແລະພຣະເຈົ້າໄດ້ຊົງໂຜດໃຫ້ຄົນທັງປວງມີຄວາມແນ່ໃຈໃນເລື່ອງນີ້ ໂດຍຊົງບັນດານໃຫ້ມະນຸດຜູ້ນັ້ນເປັນຄືນມາຈາກຕາຍ.”32ເມື່ອເຂົາໄດ້ຍິນຄຳຊຶ່ງວ່າ “ເປັນຄືນມາຈາກຕາຍ” ລາງຄົນກໍເຍາະເຍີ້ຍແຕ່ລາງຄົນກໍເວົ້າວ່າ, “ພວກເຮົາຈະຄອຍຟັງທ່ານກ່າວເລື່ອງນີ້ອີກ.”33ດັ່ງນັ້ນໂປໂລຈິ່ງໄດ້ອອກຈາກຖ້າມກາງເຂົາໄປ.34ແຕ່ມີຊາຍລາງຄົນໄດ້ຕິດພັນຢູ່ກັບໂປໂລແລະໄດ້ຮັບເຊື່ອ ໃນຄົນເຫລົ່ານັ້ນມີດີໂອນີຊີໂອ ຜູ້ເປັນສະມາຊິກສະພາອາເຣໂອປາໂຄ ກັບຍິງຄົນໜຶ່ງຊື່ດາມາຣີ ແລະຄົນອື່ນໆ ດ້ວຍ.