ຈົ່ງຈັດຕຽມພ້ອມພຽງກັນເມື່ອພຣະເຢຊູສະເດັດກັບມາ
1ພີ່ນ້ອງທັງຫລາຍເອີຍ, ເລື່ອງເວລາແລະວັນທີ່ຊົງກຳນົດໄວ້ນັ້ນ ບໍ່ຈຳເປັນຕ້ອງຂຽນບອກໃຫ້ພວກເຈົ້າຮູ້.2ເພາະວ່າເຈົ້າເອງຮູ້ດີແລ້ວວ່າ ວັນຂອງອົງພຣະຜູ້ເປັນເຈົ້າຈະມາເໝືອນຂະໂມຍມາໃນເວລາກາງຄືນ.3ເມື່ອໃດເຂົາຫາກເວົ້າວ່າ “ສະຫງົບສຸກແລະປອດໄພຢູ່ແລ້ວ” ເມື່ອນັ້ນແຫລະ, ຄວາມວິນາດຈິບຫາຍກໍຈະມາເຖິງເຂົາໃນທັນທີ ເໝືອນດັ່ງຄວາມເຈັບປວດມາເຖິງຍິງທີ່ມີທ້ອງ ແລະເຂົາຈະໜີບໍ່ພົ້ນເປັນແນ່.4ແຕ່ວ່າພີ່ນ້ອງເອີຍ, ພວກເຈົ້າກໍບໍ່ໄດ້ຢູ່ໃນຄວາມມືດແລ້ວ ເໝືອນວັນນັ້ນຈະມາໂດດໃສ່ເຈົ້າເໝືອນດັ່ງຂະໂມຍມາ.5ເຫດວ່າເຈົ້າທັງປວງເປັນຝ່າຍຄວາມສະຫວ່າງແລະຝ່າຍກາງເວັນ ພວກເຮົາບໍ່ເປັນຝ່າຍກາງຄືນຫລືຝ່າຍຄວາມມືດ.6ສັນນັ້ນແຫລະ, ຢ່າໃຫ້ເຮົາທັງຫລາຍຫລັບຢູ່ເໝືອນດັ່ງຄົນອື່ນ ແຕ່ໃຫ້ເຮົາເຝົ້າລະວັງແລະຢ່າເມົາມົວ.7ເພາະວ່າຄົນທີ່ນອນຫລັບກໍນອນຫລັບໃນກາງຄືນແລະຄົນເມົາເຫລົ້າກໍເມົາໃນກາງຄືນ.8ແຕ່ສ່ວນພວກເຮົາຜູ້ເປັນຝ່າຍກາງເວັນຢ່າໃຫ້ເຮົາເມົາມົວຢູ່ ຈົ່ງສຸບເອົາຄວາມເຊື່ອແລະຄວາມຮັກເປັນເຄື່ອງປ້ອງກັນໜ້າເອິກໄວ້ ແລະເອົາຄວາມໄວ້ໃຈວ່າຈະໄດ້ພົ້ນເປັນເຄື່ອງຄຽນປ້ອງຫົວໄວ້.9ເຫດວ່າພຣະເຈົ້າບໍ່ໄດ້ຊົງຕັ້ງແຕ່ງເຮົາທັງຫລາຍໄວ້ສຳລັບພຣະພິໂລດ ແຕ່ວ່າເພື່ອຈະໄດ້ຮັບຄວາມພົ້ນດ້ວຍທາງພຣະເຢຊູຄຣິດເຈົ້າຂອງພວກເຮົາ.10ຜູ້ໄດ້ຊົງສະຫລະພຣະຊົນເພື່ອພວກເຮົາທັງຫລາຍ ເພື່ອວ່າເຖິງແມ່ນເຮົາຈະຕື່ນຫລືຫລັບຢູ່ກໍດີ ເຮົາທັງຫລາຍຈະໄດ້ມີຊີວິດດ້ວຍກັນກັບພຣະອົງ.
11ດ້ວຍເຫດນັ້ນຈົ່ງເລົ້າໂລມອອຍໃຈກັນແລະກັນ
ຫລືວ່າ “ຈົ່ງຊູກຳລັງໃຈກັນແລະກັນ.”
ແລະຈົ່ງຊ່ອຍກັນໃຫ້ມີຄວາມຈະເລີນຂຶ້ນຕາມດັ່ງເຈົ້າທັງຫລາຍເຮັດຢູ່ນັ້ນ.ຄວາມເຕືອນສະຕິເທື່ອສຸດທ້າຍ
12ພີ່ນ້ອງທັງຫລາຍເອີຍ, ພວກເຮົາວອນຂໍໃຫ້ເຈົ້າທັງຫລາຍຮັບຮູ້ຄົນທີ່ເຮັດການໜັກໜ່ວງຢູ່ຖ້າມກາງພວກເຈົ້າ ຄືຜູ້ຄຸ້ມຄອງແລະເຕືອນສະຕິພວກເຈົ້າໃນພຣະນາມຂອງອົງພຣະຜູ້ເປັນເຈົ້າ.13ຈົ່ງນັບຖືແລະຮັກເຂົາຢ່າງຫລາຍທີ່ສຸດ ເພາະເນື່ອງດ້ວຍການງານຂອງເຂົານັ້ນ ຈົ່ງຢູ່ຮ່ວມກັນດ້ວຍຄວາມສະຫງົບສຸກ.14ພີ່ນ້ອງທັງຫລາຍເອີຍ, ພວກເຮົາວອນຂໍພວກເຈົ້າໃຫ້ເຕືອນສະຕິຄົນທີ່ບໍ່ຢູ່ໃນລະບຽບ ຈົ່ງຊູໃຈຜູ້ທີ່ນ້ອຍໃຈ, ຈົ່ງຊ່ອຍເຫລືອຜູ້ທີ່ອ່ອນກຳລັງ, ຈົ່ງອົດທົນຕໍ່ຄົນທັງປວງ.15ຈົ່ງລະວັງໃຫ້ດີ ຢ່າໃຫ້ຜູ້ໃດເຮັດຊົ່ວຕອບແທນການຊົ່ວ ແຕ່ວ່າຈົ່ງສະແຫວງຫາທາງເຮັດດີຕໍ່ກັນແລະກັນຢູ່ສະເໝີ ແລະຕໍ່ຄົນທັງປວງດ້ວຍ.16ຈົ່ງຊົມຊື່ນຍິນດີຢູ່ສະເໝີ.17ຈົ່ງອ້ອນວອນຢູ່ບໍ່ຂາດ.18ຈົ່ງຂອບພຣະຄຸນໃນທຸກສິ່ງ ເພາະວ່ານີ້ແຫລະ, ເປັນນ້ຳພຣະໄທຂອງພຣະເຈົ້າ ຊຶ່ງປະກົດໃນພຣະເຢຊູຄຣິດສຳລັບເຈົ້າທັງຫລາຍ.19ຢ່າຫັກຫ້າມພຣະວິນຍານ.20ຢ່າປະໝາດຄຳທຳນວາຍ.21ແຕ່ຈົ່ງທົດລອງເບິ່ງທຸກສິ່ງ ສິ່ງໃດດີຈົ່ງຍຶດຖືໄວ້ໃຫ້ໝັ້ນ.22ຈົ່ງເວັ້ນຈາກຄວາມຊົ່ວທຸກຊະນິດ.
23ຂໍໃຫ້ພຣະເຈົ້າຜູ້ຊົງໂຜດປະທານສັນຕິສຸກນັ້ນ ຈົ່ງຊົງບັນດານໃຫ້ເຈົ້າທັງຫລາຍເປັນຄົນບໍລິສຸດຮຽບຮ້ອຍ ແລະຊົງຮັກສາວິນຍານ, ຈິດໃຈ, ແລະກາຍຂອງພວກເຈົ້າໄວ້ບໍ່ໃຫ້ມີຂໍ້ຕິຕຽນໄດ້ໃນເມື່ອອົງພຣະຜູ້ເປັນເຈົ້າຂອງເຮົາທັງຫລາຍ ຄືພຣະເຢຊູຄຣິດຈະສະເດັດມາປະກົດ.24ພຣະອົງຜູ້ຊົງເອີ້ນເອົາເຈົ້າທັງຫລາຍນັ້ນກໍທ່ຽງທຳ ພຣະອົງນັ້ນແຫລະ, ຈະຊົງດຳເນີນງານ.25ພວກພີ່ນ້ອງເອີຍ, ຈົ່ງອ້ອນວອນສຳລັບພວກເຮົາເທີນ.26ຂໍຄຳນັບພີ່ນ້ອງທັງປວງດ້ວຍທຳນຽມຈູບອັນບໍລິສຸດ.27ເຮົາບັນຊາເຈົ້າທັງຫລາຍໃນພຣະນາມຂອງອົງພຣະຜູ້ເປັນເຈົ້າວ່າ ໃຫ້ພວກເຈົ້າອ່ານຈົດໝາຍສະບັບນີ້ໃຫ້ພີ່ນ້ອງທັງປວງຟັງ.28ຂໍໃຫ້ພຣະຄຸນຂອງພຣະເຢຊູຄຣິດເຈົ້າຂອງພວກເຮົາສະຖິດຢູ່ກັບເຈົ້າທັງຫລາຍເທີນ.