ຜູ້ປະກາດພຣະທຳແຫ່ງຢູດາເຕືອນເຢໂຣໂບອາມ
1ແລະເບິ່ງແມ ຄົນຂອງພຣະເຈົ້າຄົນໜຶ່ງໄດ້ອອກມາຈາກແຂວງຢູດາໂດຍພຣະຄຳຂອງພຣະຜູ້ເປັນເຈົ້າໄປຍັງເບັດເອນ, ເຢໂຣໂບອາມກຳລັງຢືນຢູ່ໃກ້ແທ່ນບູຊາເພື່ອຈະເຜົາເຄື່ອງຫອມ2ຊາຍຄົນນັ້ນໄດ້ຮ້ອງຕໍ່ສູ້ແທ່ນບູຊານັ້ນໂດຍພຣະຄຳຂອງພຣະຜູ້ເປັນເຈົ້າວ່າ “ໂອ ແທ່ນບູຊາ ແທ່ນບູຊາ ພຣະຜູ້ເປັນເຈົ້າກ່າວດັ່ງນີ້ວ່າ ‘ຈົ່ງເບິ່ງລູກຊາຍຄົນໜຶ່ງຈະເກີດມາໃນຄອບຄົວຂອງດາວິດ ຊື່ໂຢສີຢາ ແລະລາວຈະເອົາປະໂລຫິດແຫ່ງປູຊະນີຍະສະຖານສູງຜູ້ຊຶ່ງຈະເຜົາເຄື່ອງຫອມມາຖວາຍເທິງເຈົ້າ ແລະລາວຈະເຜົາກະດູກຄົນເທິງເຈົ້າ’”3ແລະເພິ່ນກໍໃຫ້ໝາຍສຳຄັນໃນມື້ດຽວກັນນັ້ນ ກ່າວວ່າ “ນີ້ເປັນໝາຍສຳຄັນທີ່ພຣະຜູ້ເປັນເຈົ້າໄດ້ກ່າວ ‘ເບິ່ງແມ ລາວຈະມ້າງແທ່ນບູຊາລົງມາ ແລະຂີ້ເຖົ່າຊຶ່ງຢູ່ເທິງແທ່ນບູຊານັ້ນຈະປີວກະຈັດກະຈາຍໄປ.’”
ພຣະເຈົ້າເຮັດໃຫ້ມືຂອງກະສັດເຢໂຣໂບອາມລີບໄປ
4ແລະຢູ່ມາເມື່ອກະສັດເຢໂຣໂບອາມໄດ້ຮັບຟັງຄຳບອກກ່າວຈາກຄົນຂອງພຣະເຈົ້າທີ່ໄດ້ຮ້ອງກ່າວໂທດແທ່ນບູຊານັ້ນທີ່ເບັດເອນ, ພະອົງໄດ້ຖົກມືຂອງຕົນອອກຈາກແທ່ນບູຊາ ກ່າວວ່າ “ຈົ່ງຈັບຄົນນັ້ນໄວ້” ແລະມືຂອງພະອົງທີ່ໄດ້ຢຽດອອກໃສ່ຄົນນັ້ນກໍລີບໄປ, ພະອົງຈະພັບແຂນເຂົ້າຫາຕົວອີກກໍບໍ່ໄດ້5ແທ່ນບູຊາກໍເພພັງລົງດ້ວຍ ແລະຂີ້ເຖົ່າກໍໄດ້ກະຈັດກະຈາຍໄປຈາກແທ່ນ ຕາມໝາຍສຳຄັນຊຶ່ງຄົນຂອງພຣະເຈົ້າ ໄດ້ໃຫ້ໄວ້ໂດຍພຣະຄຳຂອງພຣະຜູ້ເປັນເຈົ້າ6ແລະກະສັດກ່າວກັບຄົນຂອງພຣະເຈົ້າວ່າ “ຈົ່ງອ້ອນວອນຂໍພຣະກະລຸນາຈາກພຣະຜູ້ເປັນເຈົ້າ ພຣະເຈົ້າຂອງທ່ານ ຂໍຈົ່ງອະທິຖານເພື່ອຂ້າພະເຈົ້າ ສຳລັບມືຂອງຂ້າພະເຈົ້າໃຫ້ກັບຄືນເຂົ້າຫາຕົວໄດ້ອີກ” ແລະຄົນຂອງພຣະເຈົ້າກໍອ້ອນວອນຕໍ່ພຣະຜູ້ເປັນເຈົ້າ ແລະມືຂອງກະສັດກໍໄດ້ພັບກັບເຂົ້າຄືນຫາພະອົງໄດ້ອີກ ແລະເປັນຄືເກົ່າ7ແລະກະສັດກ່າວກັບຄົນຂອງພຣະເຈົ້າວ່າ “ເຊີນມາເຮືອນກັບຂ້າພະເຈົ້າເຖີດ ແລະຮັບປະທານອາຫານນຳກັນ ຂ້າພະເຈົ້າຈະໃຫ້ລາງວັນແກ່ທ່ານ”8ແລະຄົນຂອງພຣະເຈົ້າທູນກະສັດວ່າ “ຖ້າພະອົງຈະໃຫ້ເຄິ່ງລາຊະສົມບັດຂອງພະອົງ ຂ້າພະເຈົ້າກໍຈະບໍ່ໄປກັບພະອົງ ແລະຂ້າພະເຈົ້າຈະບໍ່ຮັບປະທານເຂົ້າຈີ່ ຫລືດື່ມນ້ຳໃນບ່ອນນີ້9ເພາະວ່າພຣະຄຳຂອງພຣະຜູ້ເປັນເຈົ້າໄດ້ສັ່ງແກ່ຂ້າພະເຈົ້າໄວ້ຢ່າງນີ້ວ່າ ‘ເຈົ້າຢ່າກິນເຂົ້າຈີ່ ຫລືດື່ມນ້ຳ ຫລືກັບໄປຕາມທາງທີ່ເຈົ້າມານັ້ນ’”10ດັ່ງນັ້ນ ເພິ່ນຈຶ່ງອອກໄປອີກທາງໜຶ່ງ ແລະບໍ່ກັບໄປຕາມທາງທີ່ເພິ່ນມາຍັງເບັດເອນ.
11ມີຜູ້ທຳນວາຍເຖົ້າແກ່ຄົນໜຶ່ງທີ່ອາໄສຢູ່ໃນເບັດເອນ ແລະພວກລູກຊາຍຂອງເພິ່ນໄດ້ມາບອກເພິ່ນເຖິງເລື່ອງ ລາວທັງໝົດຊຶ່ງຄົນຂອງພຣະເຈົ້າໄດ້ເຮັດໃນເບັດເອນໃນມື້ນັ້ນ ແລະຖ້ອຍຄຳຊຶ່ງເພິ່ນໄດ້ກ່າວແກ່ກະສັດພວກເຂົາ ກໍໄດ້ບອກໃຫ້ພໍ່ຂອງພວກເຂົາຟັງເໝືອນກັນ12ແລະພໍ່ຂອງພວກເຂົາໄດ້ຖາມພວກເຂົາວ່າ “ເພິ່ນໄປທາງໃດ?” ພວກລູກຊາຍທັງຫລາຍຂອງເພິ່ນໄດ້ເຫັນທາງຊຶ່ງຄົນຂອງພຣະເຈົ້າຜູ້ມາຈາກຢູດາໄດ້ຍ່າງໄປນັ້ນ.
ຜູ້ທຳນວາຍຂອງພຣະເຈົ້າບໍ່ເຊື່ອຟັງຈຶ່ງເສຍຊີວິດ
13ເພິ່ນໄດ້ເວົ້າກັບພວກລູກຊາຍຂອງເພິ່ນວ່າ “ຈົ່ງຜູກອານລາໃຫ້ພໍ່” ພວກເຂົາຈຶ່ງຜູກອານລາໃຫ້ ແລ້ວເພິ່ນກໍຂຶ້ນຂີ່ລາໄປ
14ແລະໄດ້ຕິດຕາມຄົນຂອງພຣະເຈົ້າ ແລະໄດ້ພົບເພິ່ນນັ່ງຢູ່ກ້ອງຕົ້ນໂອກ
ໄມ້ສົນ
ຕົ້ນໜຶ່ງ ແລະໄດ້ຖາມເພິ່ນວ່າ “ທ່ານເປັນຄົນຂອງພຣະເຈົ້າທີ່ໄດ້ມາຈາກແຂວງຢູດາບໍ?” ເພິ່ນກໍຕອບວ່າ “ແມ່ນແລ້ວ”15ແລະເພິ່ນໄດ້ບອກຄົນຂອງພຣະເຈົ້າວ່າ “ເຊີນມາໃນເຮືອນກັບຂ້າພະເຈົ້າເຖີດ ແລະມາຮັບປະທານອາຫານນຳກັນ”16ເພິ່ນເວົ້າວ່າ “ຂ້າພະເຈົ້າຈະກັບໄປກັບທ່ານ ຫລືເຂົ້າໄປພັກກັບທ່ານກໍບໍ່ໄດ້ ຂ້າພະເຈົ້າຈະບໍ່ຮັບປະທານ ອາຫານ ຫລືດື່ມນ້ຳກັບທ່ານໃນບ່ອນນີ້17ເພາະພຣະຄຳຂອງພຣະຜູ້ເປັນເຈົ້າກ່າວກັບຂ້າພະເຈົ້າວ່າ ‘ເຈົ້າຢ່າຮັບປະທານອາຫານ ຫລືດື່ມນ້ຳໃນບ່ອນນັ້ນ ຫລືກັບຄືນໂດຍທາງທີ່ເຈົ້າໄດ້ມາ’”18ແລະເພິ່ນຈຶ່ງເວົ້າກັບຄົນຂອງພຣະເຈົ້າວ່າ “ຂ້າພະເຈົ້າກໍເປັນຜູ້ທຳນວາຍຢ່າງທີ່ທ່ານເປັນນັ້ນ ມີທູດສະຫວັນອົງໜຶ່ງມາບອກ ຂ້າພະເຈົ້າໂດຍພຣະຄຳຂອງພຣະຜູ້ເປັນເຈົ້າວ່າ ‘ຈົ່ງໃຫ້ລາວກັບມານຳເຈົ້າໃນເຮືອນຂອງເຈົ້າ ເພື່ອລາວຈະໄດ້ຮັບປະທານອາຫານ ແລະດື່ມນ້ຳ’” ແຕ່ເພິ່ນໄດ້ເວົ້າຂີ້ຕົວະຕໍ່ຄົນຂອງພຣະເຈົ້າ19ດັ່ງນັ້ນ ລາວຈຶ່ງໄປກັບເພິ່ນ ແລະໄດ້ຮັບປະທານອາຫານໃນເຮືອນຂອງຜູ້ທຳນວາຍເຖົ້າຄົນນັ້ນ ແລະໄດ້ດື່ມນ້ຳ.20ແລະຕໍ່ມາຂະນະທີ່ພວກເພິ່ນກຳລັງນັ່ງຢູ່ທີ່ໂຕະ ພຣະຄຳຂອງພຣະຜູ້ເປັນເຈົ້າໄດ້ມາເຖິງຜູ້ທຳນວາຍທີ່ໄດ້ນຳ ເພິ່ນກັບມາອີກ21ແລະຜູ້ນັ້ນໄດ້ຮ້ອງຕໍ່ຄົນຂອງພຣະເຈົ້າຜູ້ມາຈາກຢູດາວ່າ “ພຣະຜູ້ເປັນເຈົ້າໄດ້ກ່າວດັ່ງນີ້ວ່າ ‘ເພາະເຈົ້າບໍ່ເຊື່ອຟັງ ພຣະຄຳຂອງພຣະຜູ້ເປັນເຈົ້າ ແລະບໍ່ໄດ້ຮັກສາພຣະບັນຍັດຊຶ່ງພຣະຜູ້ເປັນເຈົ້າພຣະເຈົ້າຂອງເຈົ້າໄດ້ສັ່ງແກ່ເຈົ້າ22ແຕ່ເຈົ້າໄດ້ກັບມາ ແລະຮັບປະທານອາຫານ ແລະດື່ມນ້ຳໃນບ່ອນທີ່ພຣະຜູ້ເປັນເຈົ້າກ່າວກັບເຈົ້າວ່າ “ຢ່າຮັບປະທານອາຫານ ຫລືດື່ມນ້ຳ” ເພາະສະນັ້ນຊາກສົບຂອງເຈົ້າຈະບໍ່ໄດ້ເຂົ້າໄປເຖິງອຸບໂມງຂອງບັນພະບູລຸດຂອງເຈົ້າ.’”
23ແລະຫລັງຈາກທີ່ເພິ່ນໄດ້ຮັບປະທານອາຫານ ແລະດື່ມນ້ຳແລ້ວ ຕໍ່ມາເພິ່ນໄດ້ຜູກອານລາໃຫ້ຜູ້ທຳນວາຍ ຜູ້ທີ່ເພິ່ນໄດ້ພາກັບມານັ້ນ24ແລະໃນເວລາທີ່ເພິ່ນໄດ້ກັບເມືອ ສິງໃຫຍ່ກໍອອກມາພົບເພິ່ນໃນຖະໜົນ ແລະຂ້າເພິ່ນ ແລະຊາກສົບຂອງເພິ່ນ ກໍຖືກຖິ້ມໄວ້ໃນຖະໜົນ ແລະລາໂຕນັ້ນກໍຢືນຢູ່ຂ້າງໆໃກ້ສົບນັ້ນ, ສິງໃຫຍ່ກໍຢືນຢູ່ໃກ້ຊາກສົບຄືກັນ25ແລະເບິ່ງແມ ມີຄົນຜ່ານໄປ ແລະໄດ້ເຫັນຊາກສົບຖິ້ມຢູ່ກາງທາງ ແລະສິງໃຫຍ່ກໍຢືນຢູ່ໃກ້ຊາກສົບນັ້ນ ພວກເຂົາກໍມາບອກກັນຢູ່ໃນເມືອງບ່ອນທີ່ຜູ້ທຳນວາຍເຖົ້າຢູ່ນັ້ນ26ແລະເມື່ອຜູ້ທຳນວາຍຜູ້ທີ່ນຳເພິ່ນກັບມາ ເມືອໄດ້ຍິນເລື່ອງນັ້ນ ເພິ່ນກໍເວົ້າວ່າ “ນັ້ນເປັນຄົນຂອງພຣະເຈົ້າ ຜູ້ບໍ່ເຊື່ອຟັງພຣະຄຳຂອງພຣະຜູ້ເປັນເຈົ້າ ເພາະສະນັ້ນພຣະຜູ້ເປັນເຈົ້າໄດ້ມອບລາວໄວ້ກັບສິງໃຫຍ່ ຊຶ່ງໄດ້ຈີກລາວ ແລະຂ້າລາວຕາມພຣະຄຳທີ່ພຣະຜູ້ເປັນເຈົ້າກ່າວກັບລາວໄວ້ແລ້ວ”27ແລະເພິ່ນໄດ້ເວົ້າກັບພວກລູກຊາຍວ່າ “ຈົ່ງຜູກອານລາໃຫ້ພໍ່” ແລ້ວພວກເຂົາກໍຜູກອານລາໃຫ້28ແລະເພິ່ນໄດ້ໄປ ແລະພົບຊາກສົບນັ້ນຖິ້ມຢູ່ກາງທາງກັບສິງໃຫຍ່ກໍຢືນຢູ່ໃກ້ຊາກສົບນັ້ນ ສິງໃຫຍ່ບໍ່ໄດ້ກິນ ຊາກສົບນັ້ນ ຫລືກັດຈີກໂຕລາ29ແລະຜູ້ທຳນວາຍກໍຍົກຊາກສົບຄົນຂອງພຣະເຈົ້າ ແລະວາງໄວ້ເທິງຫລັງລາ ນຳຊາກສົບກັບມາຍັງເມືອງຂອງຜູ້ທຳນວາຍ ເພື່ອໄວ້ທຸກໃຫ້ ແລະຝັງສົບຂອງລາວ30ແລະເພິ່ນໄດ້ວາງສົບນັ້ນໃນອຸບໂມງຝັງສົບຂອງເພິ່ນເອງແລະພວກເຂົາກໍໄວ້ທຸກໃຫ້ ແລະກ່າວວ່າ “ອະນິດຈາ ພີ່ນ້ອງເອີຍ”31ຕໍ່ມາເມື່ອໄດ້ຝັງສົບຄົນຂອງພຣະເຈົ້າໄວ້ແລ້ວ ເພິ່ນຈຶ່ງເວົ້າກັບພວກລູກຊາຍຂອງຕົນວ່າ “ເມື່ອຂ້ອຍຕາຍຈົ່ງຝັງສົບຂ້ອຍໄວ້ໃນອຸບໂມງຝັງສົບຊຶ່ງຝັງຄົນຂອງພຣະເຈົ້າໄວ້ນັ້ນ ຈົ່ງວາງກະດູກຂອງຂ້ອຍໄວ້ກັບຂ້າງກະດູກຂອງເພິ່ນ32ເພາະວ່າຄຳເວົ້າທີ່ເພິ່ນໄດ້ຮ້ອງອອກໂດຍພຣະຄຳຂອງພຣະຜູ້ເປັນເຈົ້າຊຶ່ງກ່າວໂທດແທ່ນບູຊາໃນເບັດເອນ ແລະຕໍ່ສູ້ບັນດາວິຫານແຫ່ງປູຊະນີຍະສະຖານສູງທີ່ຢູ່ໃນຫົວເມືອງຊາມາເຣຍຈະສຳເລັດຢ່າງແນ່ນອນ.”
ເຢໂຣໂບອາມໄດ້ຮັບຄຳຕັກເຕືອນແລ້ວ ແຕ່ບໍ່ກັບຈາກຄວາມບາບຂອງຕົນ
33ຫລັງຈາກສິ່ງເຫລົ່ານີ້ ເຢໂຣໂບອາມບໍ່ໄດ້ຖອຍຫລັງກັບຈາກທາງຊົ່ວຂອງຕົນ ໃນທ່າມກາງປະຊາຊົນ ໄດ້ສະຖາປະນາບາງຄົນໃຫ້ເປັນປະໂລຫິດປະຈຳປູຊະນີຍະສະຖານສູງອີກ ຜູ້ໃດທີ່ພໍໃຈເປັນ ພະອົງກໍແຕ່ງຕັ້ງພວກເຂົາໃຫ້ເປັນປະໂລຫິດປະຈຳບັນດາປູຊະນີຍະສະຖານສູງ34ແລະສິ່ງນີ້ກາຍເປັນຄວາມບາບແກ່ຄອບຄົວເຢໂຣໂບອາມ ເພື່ອຈະຕັດ ແລະທຳລາຍເຊື້ອສາຍຂອງພວກເຂົາອອກຈາກແຜ່ນດິນໂລກ.