ການທີ່ພຣະເຈົ້າຊົງຄືນພຣະຊົນ
1ພີ່ນ້ອງທັງຫລາຍເອີຍ, ເຮົາຂໍແຈ້ງໃຫ້ເຈົ້າທັງຫລາຍຄຳນຶງເຖິງຂ່າວປະເສີດທີ່ເຮົາໄດ້ປະກາດແກ່ພວກເຈົ້າແລ້ວ ຊຶ່ງພວກເຈົ້າໄດ້ຍອມຮັບເອົາໄວ້ແລະຕັ້ງຢູ່ໃນຂ່າວປະເສີດນັ້ນ.2ແລະຊຶ່ງເປັນເຫດທີ່ກຳລັງໃຫ້ເຈົ້າທັງຫລາຍໄດ້ພົ້ນ ຖ້າພວກເຈົ້າຍັງຍຶດຖືຂໍ້ຄວາມທີ່ເຮົາໄດ້ປະກາດເປັນຂ່າວປະເສີດແກ່ພວກເຈົ້ານັ້ນ ເວັ້ນເສຍແຕ່ພວກເຈົ້າຫາກເຊື່ອຢ່າງບໍ່ຈິງໃຈ.3ເລື່ອງທີ່ເຮົາໄດ້ຮັບໄວ້ແລ້ວນັ້ນ ເຮົາໄດ້ມອບໄວ້ແກ່ເຈົ້າທັງຫລາຍເປັນເລື່ອງສຳຄັນທີ່ສຸດຄືວ່າ ພຣະຄຣິດຊົງວາຍພຣະຊົນແທນຄວາມຜິດບາບຂອງເຮົາທັງຫລາຍຕາມທີ່ຂຽນໄວ້ໃນພຣະຄຳພີ.4ແລະຊົງຖືກວາງໄວ້ ແລ້ວວັນຖ້ວນສາມໄດ້ຖືກຊົງບັນດານໃຫ້ຄືນຂຶ້ນມາ ຕາມທີ່ຂຽນໄວ້ໃນພຣະຄຳພີນັ້ນ.5ພຣະອົງຊົງປະກົດ ແກ່ເກຟາ ແລ້ວແກ່ພວກສິບສອງຄົນນັ້ນ.6ຕໍ່ມາພຣະອົງໄດ້ຊົງປະກົດແກ່ພວກພີ່ນ້ອງກວ່າຫ້າຮ້ອຍຄົນໃນຄາວດຽວ ຊຶ່ງສ່ວນຫລາຍຍັງເປັນຢູ່ຈົນເຖິງທຸກວັນນີ້ ແຕ່ບາງຄົນກໍລ່ວງລັບໄປແລ້ວ.7ຕໍ່ນັ້ນອີກພຣະອົງໄດ້ຊົງປະກົດແກ່ຢາໂກໂບ ແລ້ວແກ່ອັກຄະສາວົກທັງໝົດ.8ພາຍຫລັງທີ່ສຸດພຣະອົງໄດ້ຊົງປະກົດແກ່ເຮົາ ຜູ້ເປັນເໝືອນລູກທີ່ເກີດຜິດຍາມ.9ເພາະວ່າເຮົາເປັນຜູ້ນ້ອຍທີ່ສຸດໃນພວກອັກຄະສາວົກແລະບໍ່ສົມຄວນຈະໄດ້ຊື່ວ່າອັກຄະສາວົກ ເພາະເຮົາໄດ້ກົດຂີ່ຂົ່ມເຫງຄຣິສຕະຈັກຂອງພຣະເຈົ້າ.10ແຕ່ວ່າທີ່ເຮົາເປັນຢູ່ຢ່າງນີ້ກໍເນື່ອງດ້ວຍພຣະຄຸນຂອງພຣະເຈົ້າ ແລະພຣະຄຸນຂອງພຣະອົງທີ່ໄດ້ຊົງປະທານແກ່ເຮົານັ້ນກໍບໍ່ໄດ້ໄຮ້ປະໂຫຍດ ແຕ່ແທນທີ່ຈະເປັນດັ່ງນັ້ນ ເຮົາໄດ້ເຮັດການໜັກໜ່ວງລື່ນກວ່າເຂົາທັງໝົດອີກ ບໍ່ໃຊ່ເຮົາເອງທີ່ເຮັດ ແຕ່ແມ່ນພຣະຄຸນຂອງພຣະເຈົ້າຊຶ່ງສະຖິດຢູ່ໃນນຳເຮົາທີ່ເຮັດ.11ເຫດສັນນັ້ນເຖິງແມ່ນວ່າເຮົາຫລືເຂົາກໍດີ ເຮົາທັງຫລາຍກໍໄດ້ປະກາດຢ່າງທີ່ກ່າວມານັ້ນແລະເຈົ້າທັງຫລາຍກໍໄດ້ເຊື່ອຢ່າງນັ້ນ.
ການທີ່ຄົນຕາຍເປັນຄືນມາ
12ປະການໜຶ່ງ, ຖ້າເຮົາປະກາດວ່າພຣະເຈົ້າໄດ້ຊົງບັນດານໃຫ້ພຣະຄຣິດຄືນຂຶ້ນມາແລ້ວ ເປັນແນວໃດບາງຄົນໃນພວກເຈົ້າຈິ່ງກ່າວວ່າບໍ່ມີການເປັນຄືນມາຈາກຕາຍ.13ຖ້າບໍ່ມີການເປັນຄືນມາຈາກຕາຍ ພຣະຄຣິດກໍບໍ່ໄດ້ຊົງບັນດານໃຫ້ຄືນຂຶ້ນມາ14ຖ້າພຣະຄຣິດບໍ່ໄດ້ຊົງຄືນພຣະຊົນແລ້ວ ການປະກາດຂອງເຮົາກໍບໍ່ມີປະໂຫຍດ ແລະຄວາມເຊື່ອຂອງພວກເຈົ້າກໍບໍ່ມີປະໂຫຍດເໝືອນກັນ.15ແລ້ວກໍຈະປະກົດວ່າພວກເຮົາເປັນພະຍານບໍ່ຈິງໃນເລື່ອງພຣະເຈົ້າ ເພາະພວກເຮົາໄດ້ກ່າວພະຍານອ້າງວ່າພຣະເຈົ້າໄດ້ຊົງບັນດານໃຫ້ພຣະຄຣິດເປັນຄືນມາແລ້ວ ແຕ່ຖ້າຄົນຕາຍບໍ່ຖືກຊົງບັນດານໃຫ້ຄືນມາ ພຣະເຈົ້າກໍບໍ່ໄດ້ຊົງບັນດານໃຫ້ພຣະຄຣິດຄືນພຣະຊົນເໝືອນກັນ.16ເພາະວ່າຖ້າຄົນຕາຍບໍ່ເປັນຄືນມາ ເຖິງແມ່ນພຣະຄຣິດກໍບໍ່ໄດ້ຖືກຊົງບັນດານໃຫ້ຄືນພຣະຊົນ.17ແລະຖ້າວ່າພຣະຄຣິດບໍ່ໄດ້ຖືກຊົງບັນດານໃຫ້ຄືນພຣະຊົນແລ້ວ ຄວາມເຊື່ອຂອງເຈົ້າທັງຫລາຍກໍໄຮ້ປະໂຫຍດ ເຈົ້າທັງຫລາຍກໍຍັງຄົງຢູ່ໃນຜິດບາບຂອງຕົນ.18ຊ້ຳກວ່ານັ້ນ, ພວກຄົນທີ່ເຊື່ອໃນພຣະຄຣິດທີ່ຕາຍໄປແລ້ວນັ້ນກໍຈິບຫາຍໄປດ້ວຍ.
19ຖ້າແມ່ນເຮົາທັງຫລາຍໄດ້ວາງໃຈໃນພຣະຄຣິດຝ່າຍຊີວິດນີ້ເທົ່ານັ້ນ
ຫລືວ່າ “ຖ້າວ່ານອກຈາກຄວາມຫວັງໃນພຣະຄຣິດສຳລັບຊີວິດນີ້ ເຮົາທັງຫລາຍບໍ່ມີອັນໃດອື່ນອີກ.”
ພວກເຮົາກໍເປັນຄົນໜ້າສັງເວດທີ່ສຸດໃນໝູ່ຄົນທັງປວງ.20ແຕ່ທີ່ຈິງພຣະຄຣິດໄດ້ຖືກຊົງບັນດານໃຫ້ຄືນພຣະຊົນແລ້ວ ແລະຊົງເປັນຜົນແຮກໃນພວກຄົນທີ່ລ່ວງລັບໄປແລ້ວນັ້ນ.21ເພາະວ່າຄວາມຕາຍໄດ້ມີມາທາງມະນຸດສັນໃດ ການຄືນມາຈາກຕາຍກໍມີມາທາງມະນຸດສັນນັ້ນ.22ດ້ວຍວ່າຄົນທັງປວງໄດ້ຕາຍເພາະກ່ຽວເນືອງກັບອາດາມສັນໃດ ຄົນທັງປວງກໍຈະຖືກຊົງບັນດານໃຫ້ມີຊີວິດເພາະກ່ຽວເນື່ອງກັບພຣະຄຣິດສັນນັ້ນ.23ແຕ່ຈະເປັນໄປຕາມລຳດັບຂອງແຕ່ລະຄົນ ຄືພຣະຄຣິດຊົງເປັນຜົນແຮກ ຕໍ່ມາກໍແມ່ນຄົນທັງປວງທີ່ເປັນຢູ່ຝ່າຍພຣະຄຣິດໃນເວລາພຣະອົງສະເດັດມາປະກົດ.24ຕໍ່ຈາກນັ້ນຈະເປັນຄາວສຸດທ້າຍ ຄືເມື່ອພຣະອົງຈະຊົງຍົກເລີກການປົກຄອງ ກັບທັງອານຸພາບແລະອຳນາດທຸກໆຢ່າງເສຍ ແລ້ວຈະຊົງມອບລາຊະອານາຈັກໄວ້ແກ່ພຣະເຈົ້າຄືພຣະບິດາ.25ເພາະວ່າຈຳເປັນພຣະອົງຈະຊົງສະເຫວີຍລາດຢູ່ກ່ອນ ຈົນກວ່າພຣະເຈົ້າຈະຊົງປາບສັດຕູທັງປວງໃຫ້ຢູ່ໃຕ້ພຣະບາດຂອງພຣະອົງ.26ສັດຕູຕົວສຸດທ້າຍທີ່ຈະຖືກຊົງຍົກເລີກເສຍນັ້ນແມ່ນຄວາມຕາຍ.27ເຫດວ່າ “ພຣະເຈົ້າໄດ້ຊົງປາບສິ່ງສາລະພັດລົງໃຕ້ພຣະບາດຂອງພຣະອົງແລ້ວ” ແຕ່ເມື່ອພຣະຄຳພີກ່າວວ່າ, “ຊົງປາບສິງສາລະພັດລົງນັ້ນ” ກໍປະກົດຄັກແນ່ວ່າ ເວັ້ນເສຍແຕ່ພຣະຜູ້ຊົງປາບສິ່ງສາລະພັດລົງຢູ່ໃຕ້ພຣະອົງ.28ແລະເມື່ອສິ່ງສາລະພັດໄດ້ຖືກຊົງປາບລົງຢູ່ໃຕ້ພຣະອົງແລ້ວ ເມື່ອນັ້ນອົງພຣະບຸດຈະຊົງຍອມລົງຢູ່ໃຕ້ພຣະເຈົ້າ ຜູ້ຊົງປາບສິ່ງສາລະພັດລົງຢູ່ໃຕ້ພຣະອົງນັ້ນ ເພື່ອພຣະເຈົ້າຈະໄດ້ຊົງເປັນເອກເປັນໃຫຍ່ໃນສິ່ງສາລະພັດທັງປວງ.
29ຖ້າບໍ່ເປັນຢ່າງນັ້ນ ຄົນທັງຫລາຍທີ່ຮັບບັບຕິສະມາເພື່ອຄົນຕາຍນັ້ນເພື່ອຄົນຕາຍນັ້ນຈະໝາຍຄວາມວ່າຢ່າງໃດ ຖ້າພຣະເຈົ້າບໍ່ຊົງບັນດານໃຫ້ຄົນຕາຍຄືນຂຶ້ນມາແທ້ ດ້ວຍເຫດໃດຈິ່ງມີຄົນຮັບບັບຕິສະມາເພື່ອຄົນຕາຍ.30ຝ່າຍພວກເຮົາເຫດສັນໃດເຮົາຈິ່ງຕ້ອງສ່ຽງໄພອັນຕະລາຍຢູ່ທຸກເວລາ.31ພີ່ນ້ອງທັງຫລາຍເອີຍ, ເຮົາຂໍຢືນຢັນວ່າເຮົາກຳລັງຕາຍຢູ່ທຸກວັນ ທີ່ເຮົາເວົ້າດັ່ງນັ້ນກໍອ້າງຄວາມພາກພູມໃຈ ຊຶ່ງເຮົາມີຢູ່ໃນເຈົ້າທັງຫລາຍ ໂດຍພຣະເຢຊູຄຣິດອົງພຣະຜູ້ເປັນເຈົ້າຂອງເຮົາທັງຫລາຍ.32ຖ້າເຮົາໄດ້ຕໍ່ສູ້ກັບສັດຮ້າຍທີ່ເມືອງເອເຟໂຊ (ຕາມຄວາມເຫັນຂອງມະນຸດ) ຈະເປັນປະໂຫຍດອັນໃດແກ່ເຮົາ ຖ້າພຣະເຈົ້າບໍ່ຊົງບັນດານໃຫ້ຄົນຕາຍເປັນຄືນມາອີກ “ກໍໃຫ້ເຮົາພາກັນກິນແລະດື່ມເທີນ ເພາະວ່າມື້ອື່ນເຮົາກໍຈະຕາຍ.”33ຢ່າຊູ່ຫລົງຜິດໄປ “ການຄົບກັບຄົນຊົ່ວຍ່ອມເສຍນິໄສ”.34ເຈົ້າທັງຫລາຍຈົ່ງກັບຄືນມາສູ່ນິໄສອັນເໝາະສົມແລະຢ່າເຮັດຜິດອີກ ເພາະວ່າບາງຄົນຍັງບໍ່ຮູ້ເລື່ອງພຣະເຈົ້າ ທີ່ເຮົາເວົ້າດັ່ງນີ້ກໍເພື່ອພວກເຈົ້າຈະມີຄວາມລະອາຍ.
ຮ່າງກາຍທີ່ເປັນຄືນມາ
35ແຕ່ບາງຄົນຈະຖາມວ່າ, “ຄົນຕາຍຈະຄືນມາໄດ້ຢ່າງໃດ ເມື່ອເຂົາຄືນມາຈະມີຮ່າງກາຍເປັນຢ່າງໃດ.”36ໂອ ຄົນຜູ້ໄຮ້ຄວາມຄຶດເອີຍ, ເມັດທີ່ເຈົ້າຫວ່ານລົງດິນນັ້ນ ຖ້າມັນບໍ່ຕາຍເສຍກ່ອນຈະງອກຂຶ້ນໃໝ່ບໍ່ໄດ້.37ເມັດທີ່ເຈົ້າຫວ່ານລົງນັ້ນ ຈະແມ່ນເຂົ້າບາເລຫລືແນວອື່ນໆ ກໍດີ ເຈົ້າບໍ່ໄດ້ຫວ່ານສິ່ງທີ່ເປັນຮູບຮ່າງຂອງຕົ້ນທີ່ຈະງອກຂຶ້ນມານັ້ນ ແຕ່ໄດ້ຫວ່ານເມັດເທົ່ານັ້ນ.38ພຣະເຈົ້າຊົງປະທານຕົ້ນໃຫ້ແກ່ເມັດນັ້ນຕາມທີ່ພຣະອົງຊົງເຫັນຊອບ ແລະຊົງປະທານແກ່ຜັກທຸກຊະນິດໃຫ້ມີກົກມີຕົ້ນຂອງມັນເອງ.39(ເນື້ອນັ້ນບໍ່ເໝືອນກັນໝົດທຸກຢ່າງ ເນື້ອມະນຸດກໍຢ່າງໜຶ່ງ, ເນື້ອສັດສີ່ຕີນກໍຢ່າງໜຶ່ງ, ເນື້ອນົກກໍຢ່າງໜຶ່ງ, ເນື້ອປາກໍຢ່າງໜຶ່ງ.40ຮ່າງກາຍສຳລັບສະຫວັນກໍມີແລະຮ່າງກາຍສຳລັບແຜ່ນດິນໂລກກໍມີ ແຕ່ວ່າສະຫງ່າລາສີຂອງຮ່າງກາຍສຳລັບສະຫວັນກໍຢ່າງໜຶ່ງ ແລະສະຫງ່າລາສີຂອງຮ່າງກາຍສຳລັບໂລກກໍຢ່າງໜຶ່ງ.41ສະຫງ່າລາສີຂອງດວງອາທິດກໍຢ່າງໜຶ່ງ, ສະຫງ່າລາສີຂອງດວງຈັນກໍຢ່າງໜຶ່ງ, ສະຫງ່າລາສີຂອງດວງດາວກໍຢ່າງໜຶ່ງ, ແຕ່ທີ່ຈິງສະຫງ່າລາສີຂອງດວງດາວດວງໜຶ່ງ ກໍຕ່າງກັນກັບສະຫງ່າລາສີຂອງດວງດາວດວງອື່ນໆ).
42ສ່ວນການເປັນຄືນມາຂອງຄົນຕາຍກໍເໝືອນດັ່ງນັ້ນແຫລະ ຄື ສິ່ງທີ່ຫວ່ານລົງກໍເປື່ອຍເນົ່າໄປ ແຕ່ສິ່ງທີ່ເປັນຄືນມາກໍບໍ່ຮູ້ເປື່ອຍເນົ່າ.43ເມື່ອຫວ່ານລົງນັ້ນບໍ່ມີຍົດ ເມື່ອຄືນຂຶ້ນມາກໍມີສະງ່າລາສີ ເມື່ອຫວ່ານລົງກໍອ່ອນກຳລັງ ເມື່ອຄືນຂຶ້ນມາກໍມີລິດອຳນາດ.44ເມື່ອຫວ່ານລົງກໍເປັນກາຍທຳມະດາ ເມື່ອຄືນຂຶ້ນມາກໍເປັນກາຍຝ່າຍວິນຍານ ຖ້າມີກາຍທຳມະດາກໍຄົງມີກາຍຝ່າຍວິນຍານດ້ວຍ.45ມີຄຳຂຽນໄວ້ໃນພຣະຄຳພີວ່າ, “ມະນຸດຄົນເດີມຄືອາດາມນັ້ນໄດ້ບັງເກີດເປັນຜູ້ມີຊີວິດຢູ່” ອາດາມຜູ້ສຸດທ້າຍຄືພຣະວິນຍານຜູ້ປະທານຊີວິດ.46ແຕ່ກາຍທີ່ເກີດມາກ່ອນນັ້ນບໍ່ໃຊ່ເປັນກາຍຝ່າຍວິນຍານ ແຕ່ເປັນກາຍທຳມະດາແລະຕໍ່ມາຈິ່ງມີກາຍຝ່າຍວິນຍານ.47ມະນຸດເດີມນັ້ນເກີດມາຈາກດິນຈິ່ງເປັນຂີ້ຝຸ່ນດິນ ມະນຸດຖ້ວນສອງສະເດັດມາຈາກສະຫວັນ.48ຜູ້ທີ່ເກີດມາຈາກດິນເປັນຢ່າງໃດ ຄົນທັງຫລາຍທີ່ເກີດມາຈາກດິນກໍເປັນຢ່າງນັ້ນ ແລະຜູ້ທີ່ສະເດັດມາຈາກສະຫວັນເປັນຢ່າງໃດ ຄົນທັງຫລາຍທີ່ເປັນຝ່າຍສະຫວັນກໍເປັນຢ່າງນັ້ນ.49ເຮົາທັງຫລາຍມີລັກສະນະສົມກັບມະນຸດທີ່ເກີດມາຈາກດິນສັນໃດ ພວກເຮົາກໍຄົງຈະມີລັກສະນະສົມກັບຜູ້ສະເດັດມາຈາກສະຫວັນສັນນັ້ນ.
50ພີ່ນ້ອງທັງຫລາຍເອີຍ, ເຮົາກ່າວດັ່ງນີ້ໝາຍຄວາມວ່າ ມະນຸດທຳມະດາຈະມີສ່ວນໃນລາຊະອານາຈັກຂອງພຣະເຈົ້າບໍ່ໄດ້ ແລະສິ່ງທີ່ເປື່ອຍເນົ່າຈະມີສ່ວນໃນສິ່ງທີ່ບໍ່ເປື່ອຍເນົ່າກໍບໍ່ໄດ້.51ນີ້ແຫລະ, ເຮົາມີຂໍ້ລັບເລິກບອກພວກເຈົ້າວ່າ ເຮົາທັງຫລາຍຈະບໍ່ລ່ວງລັບໄປໝົດທຸກຄົນ ແຕ່ເຮົາທັງຫລາຍຈະຖືກຊົງປ່ຽນແປງໃໝ່ໝົດທຸກຄົນ.52ໃນຊົ່ວຂະນະດຽວ, ໃນພັບຕາດຽວ, ເມື່ອເປົ່າແກຄັ້ງສຸດທ້າຍນັ້ນ ດ້ວຍວ່າຈະມີສຽງແກ ແລະຄົນທີ່ຕາຍແລ້ວຈະຖືກຊົງບັນດານໃຫ້ເປັນຄືນຂຶ້ນມາໂດຍບໍ່ເປື່ອຍເນົ່າ ແລະຝ່າຍພວກເຮົາກໍຈະຖືກຊົງປ່ຽນແປງໃໝ່.53ເພາະວ່າກາຍທີ່ເປື່ອຍເນົ່ານີ້ຕ້ອງສວມກາຍທີ່ບໍ່ຮູ້ຈັກເປື່ອຍເນົ່າ ແລະກາຍທີ່ຕາຍເປັນນີ້ຕ້ອງສວມກາຍທີ່ຕາຍບໍ່ເປັນ.54ແລະເມື່ອໃດກາຍທີ່ຮູ້ຈັກເປື່ອຍເນົ່ານີ້ຈະໄດ້ສວມກາຍທີ່ບໍ່ຮູ້ຈັກເປື່ອຍເນົ່າ ແລະກາຍທີ່ຕາຍເປັນນີ້ຈະໄດ້ສວມກາຍທີ່ຕາຍບໍ່ເປັນ ເມື່ອນັ້ນແຫລະ, ຄວາມທີ່ຂຽນໄວ້ໃນພຣະຄຳພີນັ້ນຈະສຳເລັດ ຄືວ່າ,
“ຄວາມຕາຍໄດ້ຕົກເຖິງປະລາໄຊແລ້ວ.
55ໂອ ຄວາມຕາຍເອີຍ, ໄຊຊະນະຂອງມຶງຢູ່ໃສ
ໂອ ຄວາມຕາຍເຮີຍ, ໄລພິດຂອງມຶງຢູ່ໃສ.”
56ໄລພິດຂອງຄວາມຕາຍຄືຄວາມບາບ ແລະລິດອຳນາດຂອງຄວາມບາບຄືພຣະບັນຍັດ.57ແຕ່ວ່າຈົ່ງຂອບພຣະຄຸນພຣະເຈົ້າຜູ້ຊົງປະທານໄຊຊະນະແກ່ເຮົາທັງຫລາຍ ດ້ວຍພຣະເຢຊູຄຣິດເຈົ້າຂອງພວກເຮົາ.58ດັ່ງນີ້ແຫລະ, ພີ່ນ້ອງທີ່ຮັກຂອງເຮົາເອີຍ, ເຈົ້າທັງຫລາຍຈົ່ງຕັ້ງໝັ້ນຢູ່ ຢ່າຫວັ່ນໄຫວ ຈົ່ງປະຕິບັດງານຂອງອົງພຣະຜູ້ເປັນເຈົ້າໃຫ້ບໍລິບູນທຸກເວລາ ດ້ວຍຮູ້ວ່າໃນອົງພຣະຜູ້ເປັນເຈົ້າ ການຂອງພວກເຈົ້ານັ້ນຈະບໍ່ໄຮ້ປະໂຫຍດ.