1ຍາມກາງຄືນ ເທິງຕຽງຂອງຂ້ອຍໄດ້ຊອກຫາຜູ້ທີ່ດວງໃຈຂອງຂ້ອຍຮັກ
ຂ້ອຍຊອກຫາລາວ ແຕ່ຫາບໍ່ພົບ
2“ບັດນີ້ຂ້ອຍຈະລຸກຂຶ້ນ ແລ້ວຈະທ່ຽວໄປອ້ອມຮອບເມືອງໄປຕາມຖະໜົນ
ແລະໃນທີ່ສາທາລະນະ ຂ້ອຍຈະຊອກຫາຜູ້ນັ້ນທີ່ດວງໃຈຂອງຂ້ອຍຮັກ”
ຂ້ອຍໄດ້ຊອກຫາລາວ ແຕ່ຫາບໍ່ພົບ
3ພວກທີ່ເຝົ້າຍາມໃນເມືອງນັ້ນໄດ້ພົບຂ້ອຍ ແລ້ວຂ້ອຍຖາມພວກເຂົາວ່າ
“ໝູ່ເຈົ້າເຫັນຜູ້ນັ້ນທີ່ດວງໃຈຂອງຂ້ອຍຮັກບໍ?”
4ເມື່ອຂ້ອຍຜ່ານຜູ້ເຝົ້າຍາມມາໜ້ອຍໜຶ່ງ
ຂ້ອຍກໍໄດ້ພົບຜູ້ນັ້ນທີ່ດວງໃຈຂອງຂ້ອຍຮັກ
ຂ້ອຍໄດ້ຈັບຕົວລາວໄວ້ແໜ້ນ ແລະບໍ່ຍອມປ່ອຍໃຫ້ລາວຫລຸດໄປເລີຍ
ຈົນຂ້ອຍພາລາວເຂົ້າມາໃນເຮືອນຂອງແມ່ຂ້ອຍ
ແລະໃຫ້ເຂົ້າມາໃນຫ້ອງ ຊຶ່ງແມ່ຂອງຂ້ອຍໄດ້ເກີດຂ້ອຍ
5ໂອ ລູກສາວທັງຫລາຍຂອງເມືອງເຢຣູຊາເລັມເອີຍ
ຂ້ອຍຂໍໃຫ້ນາງທັງຫລາຍປະຕິຍານຕໍ່ໂຕເຍືອງ
ຫລືກວາງໂຕແມ່ໃນທົ່ງວ່າ ຢ່າຊູ່ປຸກ ຢ່າຊູ່ປຸກ
ຄວາມຮັກໃຫ້ຕື່ນຈົນກວ່າມັນຈະມີຈິດໃຈພ້ອມແລ້ວ
6“ຜູ້ໃດໜໍທີ່ກຳລັງຂຶ້ນມາຈາກຖິ່ນແຫ້ງແລ້ງກັນດານເບິ່ງຄືເສົາຄວັນໄຟ
ຫອມໄປດ້ວຍຢາງໄມ້ຫອມ ແລະກຳຍານ ແລະບັນດາເຄື່ອງຫອມຂອງພວກພໍ່ຄ້າ?
7ເບິ່ງແມ ເປັນຕຽງນອນຂອງກະສັດໂຊໂລໂມນ
ມີຄົນທີ່ແຂງແຮງ 60 ຄົນ ໃນທ່າມກາງຊາວອິດສະຣາເອນອ້ອມຮອບຕຽງນອນນັ້ນ.
8ພວກເຂົາຖືດາບ ແລະເປັນຜູ້ຊຳນານໃນການເຮັດເສິກ
ພວກເຂົາທຸກຄົນເໜັບດາບໄວ້ຢູ່ກົກຂາຂອງຕົນ
ເພາະຢ້ານໄພອັນຕະລາຍໃນກາງຄືນ
9ກະສັດໂຊໂລໂມນໄດ້ເອົາໄມ້ມາຈາກພູເລບານອນ
ສ້າງຕຽງນອນດ້ວຍຕົວພະອົງເອງ
10ພະອົງຊົງເຮັດເສົາຕຽງນັ້ນດ້ວຍເງິນ ແລະບ່ອນອີງເຮັດດ້ວຍທອງຄຳ
ແລະບ່ອນນັ່ງທາດ້ວຍສີມ່ວງ ຂ້າງໃນນັ້ນໂອບໄວ້ດ້ວຍຄວາມຮັກ
ໂດຍບຸດສາວຂອງເມືອງເຢຣູຊາເລັມ
11ໂອ ບຸດສາວແຫ່ງຊີໂອນເອີຍ ຈົ່ງອອກມາສາ ໄປເບິ່ງກະສັດໂຊໂລໂມນ
ຖືມົງກຸດ ຊຶ່ງແມ່ຂອງພະອົງໄດ້ສວມໃຫ້
ໃນມື້ທີ່ພະອົງໄດ້ຊົງອະພິເສກມະເຫສີນັ້ນ
ໃນມື້ທີ່ພະໄທຂອງພະອົງຊົງເບີກບານ”