ຍອດເພງ
1ບົດເພງອັນໜ້າອອນຊອນຂອງກະສັດໂຊໂລໂມນ.
ຍິງສາວ:
2ປາກຂອງອ້າຍໄດ້ຈູບນ້ອງ
ຄວາມຮັກຂອງອ້າຍຫວານກວ່ານ້ຳອະງຸ່ນ.
3ຕົວອ້າຍມີກິ່ນຫອມຫວນ
ຊື່ຂອງອ້າຍພາໃຫ້ນ້ອງຄິດເຖິງກິ່ນຫອມນັ້ນ
ແລະບໍ່ມີຍິງໃດທີ່ຈະບໍ່ຮັກອ້າຍ.
4ຂໍໃຫ້ນ້ອງໄປກັບອ້າຍ ແລະພວກເຮົາພາກັນໜີ
ຈົ່ງເປັນພະລາຊາຂອງນ້ອງ ແລະພານ້ອງເຂົ້າໄປໃນຫ້ອງນອນຂອງອ້າຍ
ຖ້າວ່າອ້າຍຢູ່ທີ່ນີ້ ພວກເຮົາທັງສອງກໍຈະມີຄວາມສຸກ
ພວກເຮົາດື່ມນ້ຳອະງຸ່ນ ແລະຊື່ນຊົມໃນຄວາມຮັກ
ນ້ອງພໍໃຈທີ່ສຸດທີ່ໄດ້ຮັກກັບອ້າຍ.
5ຍິງນະຄອນເຢຣູຊາເລັມເອີຍ ແສງຕາເວັນເຮັດໃຫ້ຂ້ອຍແຫລ້ ແຕ່ຍັງງາມຢູ່
ຕົວຂອງອ້າຍເປັນສີນ້ຳຕານ ເໝືອນດັ່ງຜ້າເຕັນກາງໄວ້ໃນຖິ່ນແຫ້ງແລ້ງກັນດານ
ແລະມີສີເໝືອນດັ່ງຜ້າກັ້ງໃນພະລາຊະວັງກະສັດໂຊໂລໂມນ.
6ຢ່າຫລຽວເບິ່ງຢ່າງດູໝິ່ນໃນສີຜິວພັນຂອງຂ້ອຍ
ເພາະຕາເວັນໄດ້ແຜດເຜົາຂ້ອຍ
ອ້າຍນ້ອງຂອງຂ້ອຍ ໃຈຮ້າຍຂ້ອຍ
ແລະໃຊ້ຂ້ອຍເຮັດວຽກຢູ່ໃນສວນອະງຸ່ນ
ຂ້ອຍຈຶ່ງບໍ່ມີເວລາຮັກສາຕົວຂ້ອຍເອງ.
7ທີ່ຮັກຂອງນ້ອງເອີຍ ກະລຸນາບອກນ້ອງແດ່ວ່າ
ອ້າຍຈະພາຝູງສັດຂອງອ້າຍໄປກິນຫຍ້າຢູ່ບ່ອນໃດ?
ເວລາຕາເວັນທ່ຽງອ້າຍພາພວກມັນຢຸດພັກຢູ່ໃສ?
ເປັນຫຍັງນ້ອງຈຶ່ງຕ້ອງຊອກຫາອ້າຍ
ຢູ່ທ່າມກາງຝູງສັດຂອງພວກຜູ້ລ້ຽງແກະຄົນອື່ນ?
ຄົນຮັກຂອງນາງ:
8ຍິງງາມເດັ່ນໃນທ່າມກາງຍິງທັງຫລາຍເອີຍ
ຖ້ານ້ອງບໍ່ຮູ້ຈັກບ່ອນ ຈົ່ງຕິດຕາມຝູງສັດນັ້ນໄປ
ແລ້ວນ້ອງຈະພົບເດີ່ນຫຍ້າສຳລັບຝູງແບ້ຂອງນ້ອງ
ຢູ່ໃກ້ຜ້າເຕັນຂອງພວກລ້ຽງແກະພຸ້ນ.
9ທີ່ຮັກຂອງອ້າຍເອີຍ ນ້ອງປຽບເໝືອນມ້າແມ່ທີ່ທຽມລົດມ້າ
ຂອງຟາຣາໂອ ກະສັດແຫ່ງເອຢິບ.
10ນ້ອງເປຍຜົມງາມ ແລະຢ່ອນລົງຕາມຄໍດັ່ງເພັດພອຍ.
11ແຕ່ວ່າອ້າຍຈະເອົາສາຍສ້ອຍຄຳກັບເຄື່ອງເອ້ທີ່ເຮັດດ້ວຍເງິນໃຫ້ນ້ອງ.
ຍິງສາວ:
12ໃນຂະນະທີ່ເຈົ້າຊີວິດຢູ່ເທິງຕຽງນອນ
ກິ່ນນ້ຳຫອມຂອງຂ້ອຍໄດ້ສົ່ງກິ່ນຫອມໄປ.
13ຄົນຮັກຂອງຂ້ອຍເໝືອນດັ່ງຢາງໄມ້ຫອມ
ທີ່ວາງໄວ້ຢູ່ເທິງເອິກຂອງຂ້ອຍ.
14ຄົນຮັກຂອງຂ້ອຍເປັນເໝືອນດອກໄມ້ປ່າ
ຊຶ່ງບານຢູ່ໃນສວນອະງຸ່ນທີ່ເມືອງເອັນ-ເກດີ.
ຄົນຮັກຂອງນາງ:
15ທີ່ຮັກຂອງອ້າຍເອີຍ ນ້ອງເປັນຍິງທີ່ງົດງາມທີ່ສຸດ
ຕາຂອງນ້ອງສ່ອງແສງດ້ວຍຄວາມຮັກ.
ຍິງສາວ:
16ສຸດທີ່ຮັກຂອງນ້ອງເອີຍ ອ້າຍເປັນຊາຍສະຫງ່າງາມ
ແລະເຕັມໄປດ້ວຍຄວາມສຳລານ
ຫຍ້າຂຽວສົດຈະເປັນຕຽງນອນຂອງພວກເຮົາ.
17ຕົ້ນສົນຈະເປັນເສົາເຮືອນຂອງພວກເຮົາ
ແລະໄມ້ສົນຈະເປັນເພດານຂອງມັນ.