1ຂ້າແດ່ພຣະເຈົ້າ ຂໍຫງ່ຽງພຣະກັນຮັບຟັງຄຳອະທິຖານຂອງຂ້ານ້ອຍ
ຂໍຢ່າເຊື່ອງພຣະອົງຈາກຄຳອ້ອນວອນຂອງຂ້ານ້ອຍ
2ຂໍໂຜດຮັບຟັງ ແລະຂໍຟັງຂ້ານ້ອຍ ຂ້ານ້ອຍໂສກເສົ້າ
ໃນເລື່ອງຮ້ອງທຸກຂອງຂ້ານ້ອຍ ຂ້ານ້ອຍຈຶ່ງສົ່ງສຽງຄວນຄາງ
3ເພາະສຽງຂອງສັດຕູ ເພາະການບີບບັງຄັບຂອງຄົນຊົ່ວ
ເຫດວ່າພວກເຂົາຟ້ອງວ່າຂ້ານ້ອຍໄດ້ເຮັດຄວາມຊົ່ວຊ້າ
ແລະບົ່ມຄວາມກຽດຊັງຂ້ານ້ອຍໂດຍຄວາມຮ້າຍ
4ຈິດໃຈຂອງຂ້ານ້ອຍທົນທຸກ ຢູ່ໃນຂ້ານ້ອຍ
ຄວາມຢ້ານກົວຂອງມັດຈຸລາດຕົກເໜືອຂ້ານ້ອຍ
5ຄວາມຢ້ານ ແລະຄວາມສະທ້ານຫວັ່ນໄຫວມາເໜືອຂ້ານ້ອຍ
ຄວາມຄິດຢ້ານສັ່ນເຊັນ ຖ້ວມຂ້ານ້ອຍ
6ແລະຂ້ານ້ອຍກ່າວວ່າ “ໂອ ຂ້ານ້ອຍຢາກມີປີກເໝືອນນົກເຂົາ
ຈະໄດ້ບິນໜີໄປ ແລະຈະຢູ່ຢ່າງສະຫງົບ
7ເບິ່ງແມ ຂ້ານ້ອຍຈະໄດ້ພະເນຈອນໄປໄກ
ຂ້ານ້ອຍຈະໄດ້ພັກຢູ່ໃນຖິ່ນແຫ້ງແລ້ງກັນດານເຊລາ
8ຂ້ານ້ອຍຈະຮີບໜີໄປຈາກລົມແດງ ແລະພາຍຸ”
9ຂ້າແດ່ອົງພຣະຜູ້ເປັນເຈົ້າ ຂໍທຳລາຍ ແລະໃຫ້ພາສາຂອງພວກເຂົາຫຍຸ້ງໄປ
ເພາະຂ້ານ້ອຍເຫັນການຮຸນແຮງ ແລະການວຸ້ນວາຍທີ່ຢູ່ໃນນະຄອນ
10ພວກເຂົາຍ່າງເທິງກຳແພງຮອບນະຄອນຢູ່ທັງກາງເວັນແລະກາງຄືນ
ແລະຄວາມຜິດບາບກັບຄວາມເສົ້າໂສກຢູ່ພາຍໃນນະຄອນ
11ຄວາມຊົ່ວຊ້າມີຢູ່ທ່າມກາງນາງ ການຫລອກລວງ
ແລະການສໍ້ໂກງບໍ່ໜີໄປຈາກຖະໜົນຂອງນາງ
12ເຫດວ່າຜູ້ທີ່ໄດ້ປະຈານຂ້ານ້ອຍ ບໍ່ແມ່ນຜູ້ທີ່ເປັນສັດຕູ
ຖ້າແມ່ນສັດຕູ ຂ້ານ້ອຍຈະອົດທົນໄດ້
ຜູ້ທີ່ຍົກຕົວຂຶ້ນດ້ວຍຈອງຫອງເພື່ອຕໍ່ສູ້ຂ້ອຍ
ບໍ່ແມ່ນຜູ້ທີ່ກຽດຊັງຂ້ານ້ອຍ
ຖ້າແມ່ນຜູ້ນັ້ນຂ້ານ້ອຍຈະໄດ້ໜີຈາກມັນໄດ້
13ແຕ່ແມ່ນທ່ານ ທີ່ເປັນເພື່ອນກັບຂ້ານ້ອຍ
ເປັນຜູ້ຮ່ວມງານຂອງຂ້ານ້ອຍ ເປັນມິດຜູ້ຮູ້ຈັກມັກຄຸ້ນກັບຂ້ານ້ອຍ
14ເຮົາເຄີຍສົນທະນາປາໄສກັນຢ່າງຊື່ນໃຈ
ເຮົາດຳເນີນໃນພຣະວິຫານຂອງພຣະເຈົ້າແບບເພື່ອນສະນິດ
15ຂໍມັດຈຸລາດມາຫາພວກເຂົາເຫລົ່ານັ້ນ ໃຫ້ລົງໄປຍັງນະຮົກທັງເປັນ
ເພາະຄວາມຊົ່ວຊ້າຢູ່ໃນທີ່ຢູ່ອາໄສຂອງພວກເຂົາ ແລະຢູ່ທ່າມກາງພວກເຂົາ
16ສຳລັບຂ້ານ້ອຍ ຂ້ານ້ອຍຈະຮ້ອງທູນຕໍ່ພຣະເຈົ້າ
ແລະພຣະຜູ້ເປັນເຈົ້າຈະຊ່ວຍຂ້ານ້ອຍໃຫ້ລອດພົ້ນ
17ທັງຕອນເຊົ້າ ຕອນຄ່ຳ ແລະຕອນທ່ຽງ
ຂ້ານ້ອຍຈະອະທິຖານ ແລະຮ້ອງທຸກ
ແລະພຣະອົງຈະຮັບຟັງສຽງຂອງຂ້ານ້ອຍ
18ພຣະອົງໄດ້ຊ່ວຍຈິດວິນຍານຂອງຂ້ານ້ອຍ
ໃຫ້ປອດໄພຈາກສົງຄາມທີ່ຂ້ານ້ອຍຕໍ່ສູ້ຢູ່
ເພາະຄົນເປັນຈຳນວນຫລາຍຢູ່ຝ່າຍຂ້ານ້ອຍ
19ພຣະເຈົ້າຈະຮັບຟັງ ແລະລົ້ມພວກເຂົາລົງ ຄືພຣະອົງຜູ້ດຳລົງຢູ່ຕັ້ງແຕ່ບູຮານ
ເຊລາເພາະພວກເຂົາບໍ່ປ່ຽນ ພວກເຂົາຈຶ່ງບໍ່ຢຳເກງພຣະເຈົ້າ
20ລາວຍື່ນມືອອກຕໍ່ສູ້ຜູ້ທີ່ຢູ່ຢ່າງສັນຕິກັບລາວ
ລາວຝ່າຝືນຄຳໝັ້ນສັນຍາຂອງລາວ
21ຄຳເວົ້າຈາກປາກຂອງລາວມື່ນກວ່ານ້ຳນົມຂຸ່ນ
ແຕ່ສົງຄາມຢູ່ພາຍໃນໃຈຂອງລາວ
ຖ້ອຍຄຳຂອງລາວອ່ອນນຸ່ມຫລາຍກວ່ານ້ຳມັນ
ແຕ່ຖ້າວ່າເປັນດາບທີ່ຖອດອອກມາແລ້ວ
22ຈົ່ງມອບພາລະຂອງທ່ານໄວ້ກັບພຣະຜູ້ເປັນເຈົ້າ
ແລະພຣະອົງຈະຄ້ຳຊູທ່ານ
ພຣະອົງຈະບໍ່ຍອມໃຫ້ຄົນຊອບທຳສັ່ນຄອນເລີຍ
23ຂ້າແດ່ພຣະເຈົ້າ ແຕ່ພຣະອົງຈະຖິ້ມພວກເຂົາລົງສູ່ປາກແດນຄົນຕາຍ
ຄົນທີ່ເຮັດໃຫ້ຄົນເລືອດຕົກ ແລະຄົນຫລອກລວງຈະມີຊີວິດຢູ່
ບໍ່ເຖິງເຄິ່ງຈຳນວນເວລາຂອງພວກເຂົາ ແຕ່ຂ້ານ້ອຍຈະວາງໃຈໃນພຣະອົງ