1ລູກຊາຍທີ່ສະຫລາດຟັງຄຳສັ່ງສອນພໍ່ຂອງຕົນ
ແຕ່ຄົນມັກເຍາະເຍີ້ຍ ບໍ່ຟັງຄຳຕຳໜິ
2ຄົນຈະກິນຂອງດີຈາກຜົນປາກຂອງຕົນ
ແຕ່ຈິດໃຈຂອງຄົນລະເມີດຈະກິນຄວາມທາລຸນ
3ບຸກຄົນທີ່ຄຸ້ມຄອງປາກຂອງຕົນຈະຮັກສາຊີວິດໄວ້ໄດ້
ແຕ່ບຸກຄົນທີ່ເປີດຮີມປາກກວ້າງ ກໍຈະມາເຖິງຄວາມຈິບຫາຍ
4ວິນຍານຂອງຄົນຂີ້ຄ້ານຍັງຢາກຢູ່ ແຕ່ບໍ່ໄດ້ຫຍັງເລີຍ
ຝ່າຍວິນຍານຂອງຄົນຂະຫຍັນໝັ່ນພຽນຈະອ້ວນພີ
5ຄົນຊອບທຳກຽດຊັງຄວາມບໍ່ຈິງ
ແຕ່ຄົນຊົ່ວຮ້າຍປະພຶດໜ້າລັງກຽດ ແລະອັບອາຍຂາຍໜ້າ
6ຄວາມຊອບທຳຄຸ້ມຄອງຜູ້ທີ່ທາງຂອງຕົນທ່ຽງທຳ
ແຕ່ຄວາມຊົ່ວຮ້າຍລົ້ມຄົນບາບ
7ຄົນທີ່ວ່າຕົນຮັ່ງມີ ແຕ່ບໍ່ມີຫຍັງເລີຍກໍມີ
ຄົນທີ່ວ່າຕົນເປັນຄົນຈົນ ແຕ່ມີຊັບສົມບັດເປັນຈຳນວນຫລາຍກໍມີຢູ່
8ຄ່າໄຖ່ຊີວິດຂອງຄົນຄືຊັບສົມບັດຂອງລາວ
ແຕ່ຄົນຍາກຈົນບໍ່ຟັງຄຳຕຳໜິ
9ແສງສະຫວ່າງຂອງຄົນຊອບທຳກໍສ່ອງແສງ
ແຕ່ຕະກຽງຂອງຄົນຊົ່ວຮ້າຍຈະຖືກດັບ
10ເພາະຄວາມອວດຕົວເທົ່ານັ້ນ ການຜິດກັນຈຶ່ງເກີດຂຶ້ນ
ແຕ່ປັນຍາຢູ່ກັບບັນດາຜູ້ທີ່ຮັບຄຳແນະນຳ
11ຊັບສົມບັດທີ່ໄດ້ມາ ໂດຍວິທີງ່າຍໆ ຈະສູນເສຍລົງ
ແຕ່ບຸກຄົນທີ່ຮວບຮວມ ໂດຍການງານຈະໄດ້ເພີ່ມພູນຂຶ້ນ
12ຄວາມຫວັງທີ່ຖືກຖ່ວງໄວ້ເຮັດໃຫ້ໃຈເຈັບຊ້ຳ
ແຕ່ຄວາມປາດຖະໜາທີ່ສຳເລັດແລ້ວກໍເປັນຕົ້ນໄມ້ແຫ່ງຊີວິດ
13ບຸກຄົນຜູ້ໝິ່ນປະໝາດພຣະທຳຈະຖືກທຳລາຍ
ແຕ່ບຸກຄົນຜູ້ຢຳເກງພຣະບັນຍັດຈະໄດ້ຮັບບຳເໜັດ
14ຄຳສອນຂອງນັກປາດເປັນນ້ຳພຸແຫ່ງຊີວິດ
ເພື່ອໃຫ້ຫລີກຈາກບ້ວງແຮ້ວຂອງຄວາມຕາຍ
15ຄວາມເຂົ້າໃຈທີ່ດີກໍໄດ້ຮັບຄວາມຍິນດີ
ແຕ່ຫົນທາງຂອງຄົນລະເມີດກໍຍາກລຳບາກຫລາຍ
16ບັນດາຄົນທີ່ຮອບຄອບເຮັດທຸກຢ່າງດ້ວຍຄວາມຮູ້
ແຕ່ຄົນໂງ່ກໍອວດຄວາມໂງ່ຂອງຕົນ
17ຜູ້ສົ່ງຂ່າວທີ່ຊົ່ວຮ້າຍຫລົງໄປໃນຄວາມຮ້າຍ
ແຕ່ຜູ້ສົ່ງຂ່າວທີ່ສັດຊື່ນຳການຮັກສາມາໃຫ້
18ຄວາມຍາກຈົນ ແລະຄວາມອັບອາຍມາເຖິງບຸກຄົນທີ່ເມີນເສີຍຕໍ່ຄຳສັ່ງສອນ
ແຕ່ບຸກຄົນທີ່ສົນໃຈຄຳຕັກເຕືອນກໍໄດ້ຮັບກຽດ
19ຄວາມປາດຖະໜາທີ່ສຳເລັດເປັນຂອງຫວານສຳລັບຈິດວິນຍານ
ແຕ່ການຫລີກໜີຈາກຄວາມຊົ່ວຮ້າຍກໍເປັນສິ່ງໜ້າກຽດຊັງແກ່ຄົນໂງ່
20ບຸກຄົນທີ່ຍ່າງກັບນັກປາດຈະກາຍເປັນຄົນສະຫລາດ
ແຕ່ເພື່ອນຝູງຂອງຄົນໂງ່ຈະຖືກທຳລາຍ
21ຄວາມຊົ່ວຮ້າຍຕິດຕາມຄົນບາບ
ແຕ່ຄົນຊອບທຳຈະໄດ້ຮັບຄວາມດີເປັນບຳເໜັດ
22ຄົນດີກໍປະມໍລະດົກໄວ້ໃຫ້ແກ່ລູກຫລານ
ແຕ່ຊັບສົມບັດຂອງຄົນບາບນັ້ນຮວບຮວມໄວ້ໃຫ້ຄົນຊອບທຳ
23ດິນທີ່ຄົນຍາກຈົນໄຖໄວ້ກໍເກີດຜົນອຸດົມ
ແຕ່ສິ່ງຂອງຖືກທຳລາຍໄດ້ ເພາະຂາດຄວາມຍຸດຕິທຳ
24ບຸກຄົນທີ່ສະຫງວນໄມ້ແສ້ ກໍກຽດຊັງລູກຊາຍຂອງຕົນ
ແຕ່ຜູ້ທີ່ຮັກລາວ ພະຍາຍາມຕີສອນລາວທັນທີ
25ຄົນຊອບທຳຮັບປະທານໄດ້ຈົນພໍໃຈ
ແຕ່ທ້ອງຂອງຄົນຊົ່ວຮ້າຍຈະຫິວ