1ຕໍ່ໄປນີ້ເປັນພົງພັນຂອງອາໂຣນແລະໂມເຊ ເມື່ອພຣະຜູ້ເປັນເຈົ້າກ່າວກັບໂມເຊເທິງພູເຂົາ ຊີນາຍ2ຊື່ລູກຊາຍຂອງອາໂຣນມີດັ່ງນີ້ ນາດາບບຸດຫົວປີ ອາບີຮູ ເອເລອາຊາແລະອີທາມາ3ນີ້ແຫລະ ເປັນຊື່ລູກຊາຍຂອງອາໂຣນທີ່ໄດ້ເຈີມໄວ້ເປັນປະໂລຫິດ ເປັນຜູ້ທີ່ເພິ່ນສະຖາປະນາໄວ້ໃຫ້ປະຕິບັດໃນຕຳແໜ່ງປະໂລຫິດ
4ແຕ່ນາດາບແລະອາບີຮູຕາຍຕໍ່ພຣະພັກພຣະຜູ້ເປັນເຈົ້າ ເມື່ອພວກເຂົາເອົາໄຟທີ່ຕ້ອງຫ້າມມາຖວາຍບູຊາຕໍ່ພຣະພັກພຣະຜູ້ເປັນເຈົ້າຢູ່ຖິ່ນແຫ້ງແລ້ງຊີນາຍ ແລະຕ່າງກໍບໍ່ມີບຸດ ດັ່ງນັ້ນເອເລອາຊາ ແລະ ອີທາມາຈຶ່ງໄດ້ປະຕິບັດໃນຕຳແໜ່ງປະໂລຫິດຕໍ່ອາໂຣນ ພໍ່ຂອງພວກເຂົາ
5ພຣະຜູ້ເປັນເຈົ້າກ່າວກັບໂມເຊວ່າ6“ຈົ່ງນຳເອົາຕະກູນເລວີເຂົ້າມາໃກ້ ແລະຕັ້ງພວກເຂົາໄວ້ຕໍ່ໜ້າອາໂຣນ ໃຫ້ພວກເຂົາບົວລະບັດ ອາໂຣນ7ພວກເຂົາຈະປະຕິບັດໜ້າທີ່ແທນອາໂຣນແລະແທນຊຸມນຸມຊົນທັງໝົດຕໍ່ໜ້າຫໍເຕັນສັກສິດແຫ່ງຊຸມນຸມໃນຂະນະທີ່ພວກເຂົາປະຕິບັດງານທີ່ຫໍເຕັນສັກສິດ8ພວກເຂົາຈະເບິ່ງແຍງບັນດາເຄື່ອງໃຊ້ຂອງຫໍເຕັນສັກສິດແຫ່ງຊຸມນຸມ ແລະປະຕິບັດໜ້າທີ່ແທນລູກຫລານອິດສະຣາເອນ ເມື່ອພວກເຂົາເຮັດວຽກໃນຫໍເຕັນສັກສິດ9ຈົ່ງມອບພວກເລວີໄວ້ກັບອາໂຣນແລະພວກລູກຊາຍຂອງອາໂຣນ ພວກເຂົາໄດ້ຮັບເລືອກຈາກລູກຫລານອິດສະຣາເອນໃຫ້ມອບໄວ້ກັບອາໂຣນແລ້ວ10ເຈົ້າຈົ່ງແຕ່ງຕັ້ງອາໂຣນແລະພວກລູກຊາຍຂອງອາໂຣນໃຫ້ປະຕິບັດງານຕາມຕຳແໜ່ງ ປະໂລຫິດ ແຕ່ຄົນອື່ນທີ່ເຂົ້າມາໃກ້ຈະຕ້ອງຖືກລົງໂທດເຖິງຕາຍ”
11ແລະພຣະຜູ້ເປັນເຈົ້າຊົງກ່າວກັບໂມເຊວ່າ12“ເບິ່ງແມ ເຮົາເອງໄດ້ເລືອກຄົນເລວີຈາກລູກຫລານອິດສະຣາເອນແທນບັນດາບຸດຫົວປີທ່າມກາງລູກຫລານອິດສະຣາເອນທີ່ເກີດຈາກມົດລູກຂອງແມ່ ກ່ອນທີ່ຄົນເລວີຈະເປັນຂອງເຮົາ13ເພາະບັນດາບຸດຫົວປີເປັນຂອງເຮົາ ໃນມື້ທີ່ເຮົາໄດ້ປະຫານຊີວິດບຸດຫົວປີທັງຫລາຍໃນປະ ເທດເອຢິບນັ້ນ ເຮົາໄດ້ເລືອກບັນດາບຸດຫົວປີໃນອິດສະຣາເອນ ທັງມະນຸດ ແລະສັດເດຍລະສານໄວ້ ເປັນຂອງພວກເຂົາ ເຫລົ່ານີ້ຕ້ອງເປັນຂອງເຮົາ ເຮົາຄືພຣະຜູ້ເປັນເຈົ້າ”
14ພຣະຜູ້ເປັນເຈົ້າຊົງກ່າວກັບໂມເຊໃນຖິ່ນແຫ້ງແລ້ງກັນດານຊີນາຍວ່າ15“ຈົ່ງນັບລູກຫລານເລວີຕາມບັນພະບູລຸດຂອງພວກເຂົາ ແລະຕາມຄອບຄົວ ຄືເຈົ້າຈົ່ງນັບຜູ້ຊາຍທຸກຄົນທີ່ມີອາຍຸຕັ້ງແຕ່ເດືອນໜຶ່ງຂຶ້ນໄປ”16ໂມເຊຈຶ່ງໄດ້ນັບພວກເຂົາຕາມທີ່ພຣະຜູ້ເປັນເຈົ້າໄດ້ສັ່ງໄວ້
17ຕໍ່ໄປນີ້ເປັນຊື່ລູກຊາຍຂອງເລວີ ຄືເກໂຊນ ໂກຮາດ ແລະເມຣາຣີ
18ຊື່ລູກຊາຍຂອງເກໂຊນຕາມຄອບຄົວ ຄືລິບນີແລະຊິເມອີ19ລູກຊາຍຂອງໂກຮາດຕາມຄອບຄົວ ຄືອຳຣາມ ອິດຊະຮາ ເຮັບໂຣນ ແລະອຸດຊີເອນ20ແລະລູກຊາຍຂອງເມຣາຣີຕາມຄອບຄົວ ຄືມາລີ ແລະມູຊີ ນີ້ເປັນຄອບຄົວຄົນເລວີຕາມ ບັນພະບູລຸດຂອງພວກເຂົາ
21ຕະກູນເກໂຊນມີຄອບຄົວລິບນີແລະຄອບຄົວຊິເມອີ ເຫລົ່ານີ້ເປັນຄອບຄົວເກໂຊນ22ຈຳນວນຄົນທັງຫລາຍ ຄືຈຳນວນຜູ້ຊາຍທັງໝົດທີ່ມີອາຍຸຕັ້ງແຕ່ເດືອນໜຶ່ງຂຶ້ນໄປແມ່ນເຈັດພັນຫ້າຮ້ອຍຄົນ23ຄອບຄົວເກໂຊນນັ້ນຈະຕ້ອງຕັ້ງຄ້າຍຢູ່ທາງຫລັງຫໍເຕັນສັກສິດດ້ານຕາເວັນຕົກ24ມີເອລີຢາສັບລູກຊາຍລາເອນເປັນຫົວໜ້າຍາດຕິພີ່ນ້ອງຂອງ ເກໂຊນ
25ງານທີ່ຕະກູນເກໂຊນປະຕິບັດໃນຫໍເຕັນສັກສິດແຫ່ງຊຸມນຸມມີງານຫໍເຕັນສັກສິດ ງານເຕັນພ້ອມ ກັບເຄື່ອງຄຸມເຕັນ ແລະຜ້າກັ້ງປະຕູຫໍເຕັນສັກສິດແຫ່ງຊຸມນຸມ26ຜ້າກັ້ງບັງລານ ແລະຜ້າກັ້ງປະຕູລານ ຊຶ່ງຢູ່ຮອບຫໍເຕັນສັກສິດ ແລະແທ່ນບູຊາລວມທັງເຊືອກ ທັງງານສາລະພັດທີ່ກ່ຽວກັບສິ່ງເຫລົ່ານີ້
27ຕະກູນໂກຮາດ ມີຄອບຄົວອຳຣາມ ຄອບຄົວອິດຊະຮາ ຄອບຄົວເຮັບໂຣນຄອບຄົວ ອຸດຊີເອນ ເຫລົ່ານີ້ເປັນຄອບຄົວໂກຮາດ28ຕາມຈຳນວນຜູ້ຊາຍທັງໝົດທີ່ມີອາຍຸຕັ້ງແຕ່ເດືອນໜຶ່ງຂຶ້ນໄປແມ່ນແປດພັນຫົກຮ້ອຍຄົນ ເປັນຄົນປະຕິບັດໜ້າທີ່ໃນສະຖານທີ່ບໍລິສຸດ29ບັນດາຄອບຄົວລູກຫລານຂອງໂກຮາດຈະຕັ້ງຄ້າຍຢູ່ທາງທິດໃຕ້ຂອງຫໍເຕັນສັກສິດ30ມີເອລີຊາຟັນລູກຊາຍອຸດຊີເອນເປັນຫົວໜ້າຍາດຕິພີ່ນ້ອງຂອງຄອບຄົວໂກຮາດ
31ຄົນເຫລົ່ານີ້ມີໜ້າທີ່ເບິ່ງແຍງຫີບພຣະສັນຍາ ໂຕະ ຄັນຕະກຽງ ແທ່ນບູຊາທັງສອງ ແລະເຄື່ອງໃຊ້ຕ່າງໆຂອງສະຖານທີ່ບໍລິສຸດ ຊຶ່ງປະໂລຫິດໃຊ້ປະຕິບັດງານ ແລະຜ້າກັ້ງ ທັງງານສາລະພັດທີ່ກ່ຽວກັບສິ່ງເຫລົ່ານີ້32ເອເລອາຊາລູກຊາຍຂອງອາໂຣນເປັນນາຍໃຫຍ່ເໜືອຫົວໜ້າຂອງພວກເລວີແລະ ກວດກາຜູ້ທີ່ມີໜ້າທີ່ປະຕິບັດງານໃນສະຖານທີ່ບໍລິສຸດ
33ຕະກູນເມຣາຣີມີຄອບຄົວມາລີ ແລະຄອບຄົວມູຊີ ເຫລົ່ານີ້ເປັນຄອບຄົວເມຣາຣີ34ຈຳນວນຄົນທັງຫລາຍຄືຈຳນວນຜູ້ຊາຍທັງໝົດທີ່ມີອາຍຸຕັ້ງແຕ່ໜຶ່ງເດືອນຂຶ້ນໄປແມ່ນຫົກພັນສອງຮ້ອຍຄົນ35ແລະຊູຣີເອນລູກຊາຍອາບີຮາຍເປັນຫົວໜ້າຍາດຕິພີ່ນ້ອງຂອງຄອບຄົວເມຣາຣີ ຄົນເຫລົ່ານີ້ຈະຕັ້ງຄ້າຍຢູ່ທິດເໜືອຂອງຫໍເຕັນສັກສິດ
36ວຽກທີ່ກຳນົດໃຫ້ແກ່ລູກຫລານເມຣາຣີຄືການເບິ່ງແຍງໄມ້ຂອບຫໍເຕັນສັກສິດ ໄມ້ກອນ ໄມ້ເສົາ ຖານຮອງ ແລະເຄື່ອງປະກອບສິ່ງເຫລົ່ານີ້ທັງໝົດ ທັງງານສາລະພັດທີ່ກ່ຽວກັບສິ່ງເຫລົ່ານີ້37ແລະເສົາຮອບລານ ພ້ອມກັບຖານຮອງ ຫລັກໝຸດ ແລະເຊືອກ
38ບຸກຄົນທີ່ຈະຕັ້ງຄ້າຍຢູ່ໜ້າຫໍເຕັນສັກສິດທາງທິດຕາເວັນອອກມີໂມເຊແລະອາໂຣນກັບລູກຫລານຂອງລາວ ມີໜ້າທີ່ເບິ່ງແຍງການບົວລະບັດພາຍໃນສະຖານທີ່ບໍລິສຸດ ແລະບັນດາກິດຈະການທີ່ຫາກໍເຮັດເພື່ອລູກຫລານອິດສະຣາເອນແລະຜູ້ອື່ນທີ່ເຂົ້າມາໃກ້ຈະຕ້ອງຖືກລົງໂທດເຖິງຕາຍ39ບັນດາຄົນທີ່ນັບເຂົ້າໃນຄົນເລວີ ຊຶ່ງໂມເຊແລະອາໂຣນໄດ້ນັບຕາມພຣະບັນຊາຂອງພຣະຜູ້ເປັນເຈົ້າແມ່ນບັນດາຜູ້ຊາຍທັງໝົດຕາມຄອບຄົວທີ່ມີອາຍຸຕັ້ງແຕ່ໜຶ່ງເດືອນຂຶ້ນໄປເປັນສອງໝື່ນສອງພັນ ຄົນ
40ແລະພຣະຜູ້ເປັນເຈົ້າກ່າວກັບໂມເຊວ່າ “ຈົ່ງນັບລູກຊາຍຫົວປີທັງຫລາຍຂອງລູກຫລານອິດສະຣາເອນທີ່ມີອາຍຸຕັ້ງແຕ່ໜຶ່ງເດືອນຂຶ້ນໄປ ຈົ່ງຈົດຈຳນວນລາຍຊື່ໄວ້41ເຈົ້າຈົ່ງເອົາພວກເລວີໄວ້ໃຫ້ເຮົາ (ເຮົາຄືພຣະຜູ້ເປັນເຈົ້າ) ທັງນີ້ເພື່ອແທນບັນດາບຸດຫົວປີ ທ່າມກາງລູກຫລານອິດສະຣາເອນ ແລະໃຫ້ສັດທັງປວງຂອງຄົນເລວີແທນສັດຫົວປີທັງຫລາຍຂອງລູກຫລານອິດສະຣາເອນ”42ດັ່ງນັ້ນໂມເຊຈຶ່ງໄດ້ນັບບັນດາບຸດຫົວປີທ່າມກາງລູກຫລານອິດສະຣາເອນ ຕາມທີ່ພຣະຜູ້ເປັນເຈົ້າ ໄດ້ສັ່ງເພິ່ນໄວ້43ລູກຊາຍຫົວປີທັງຫລາຍຕາມຈຳນວນຊື່ທີ່ນັບໄດ້ ຊຶ່ງມີອາຍຸຕັ້ງແຕ່ໜຶ່ງເດືອນຂຶ້ນໄປມີສອງໝື່ນສອງພັນສອງຮ້ອຍເຈັດສິບສາມຄົນ
44ແລະພຣະຜູ້ເປັນເຈົ້າກ່າວກັບໂມເຊວ່າ45“ຈົ່ງເອົາພວກເລວີແທນບຸດຫົວປີທັງໝົດຂອງລູກຫລານອິດສະຣາເອນ ແລະເອົາສັດທັງຫລາຍ ຂອງຄົນເລວີແທນສັດຂອງລູກຫລານອິດສະຣາເອນ ຄົນເລວີຈະເປັນຂອງເຮົາ ເຮົາຄືພຣະຜູ້ເປັນເຈົ້າ46ສຳລັບເປັນຄ່າໄຖ່ບຸດຫົວປີຂອງລູກຫລານອິດສະຣາເອນຈຳນວນສອງຮ້ອຍເຈັດສິບສາມ ຄົນທີ່ເກີນຈຳນວນຜູ້ຊາຍຄົນເລວີ ນັ້ນ47ເຈົ້າຈົ່ງເກັບຄົນລະຫ້າເຊເຂ ຄືຈົ່ງເກັບຕາມເຊເຂຂອງສະຖານທີ່ບໍລິສຸດ (ເຊເຂໜຶ່ງມີຊາວເກຣະ)48ແລະມອບເງິນ ຊຶ່ງຕ້ອງເສຍເປັນຄ່າໄຖ່ຂອງຄົນທີ່ເກີນເຫລົ່ານັ້ນໃຫ້ໄວ້ແກ່ອາໂຣນແລະລູກຫລານຂອງລາວ”
49ໂມເຊຈຶ່ງເກັບເງິນຄ່າໄຖ່ຈາກຄົນເຫລົ່ານັ້ນທີ່ເກີນກວ່າຈຳນວນຄົນທີ່ຄົນເລວີ ໄຖ່ໄວ້50ຄືລາວເກັບເງິນຈາກບຸດຫົວປີຂອງລູກຫລານອິດສະຣາເອນ ເປັນເງິນຈຳນວນໜຶ່ງພັນສາມຮ້ອຍຫົກສິບຫ້າເຊເຂ ນັບຕາມເຊເຂຂອງສະຖານທີ່ບໍລິສຸດ51ແລະໂມເຊໄດ້ນຳເອົາເງິນຄ່າໄຖ່ໃຫ້ແກ່ອາໂຣນແລະລູກຫລານຂອງອາໂຣນ ຕາມພຣະບັນຊາຂອງພຣະຜູ້ເປັນເຈົ້າ ດັ່ງທີ່ພຣະຜູ້ເປັນເຈົ້າຊົງສັ່ງໂມເຊໄວ້