1“ເບິ່ງແມ ຕາຂອງຂ້ອຍໄດ້ເຫັນສິ່ງທັງໝົດນີ້ແລ້ວ
ຫູຂອງຂ້ອຍໄດ້ຍິນ ແລະເຂົ້າໃຈເລື່ອງນີ້ແລ້ວ
2ສິ່ງໃດທີ່ເຈົ້າທັງຫລາຍຮູ້ ຂ້ອຍກໍຮູ້ດ້ວຍ
ຂ້ອຍບໍ່ດີກວ່າເຈົ້າ
3ແຕ່ຂ້ອຍຈະຂໍທູນຕໍ່ອົງຜູ້ມີລິດອຳນາດ
ແລະປາດຖະໜາຈະສູ້ຄະດີຂອງຂ້ອຍກັບພຣະເຈົ້າ
4ສ່ວນເຈົ້າ ເຈົ້າຖືກສາບດ້ວຍການຂີ້ຕົວະ
ເຈົ້າທັງປວງເປັນແພດທີ່ໃຊ້ບໍ່ໄດ້
5ໂອ ເຈົ້າໜ້າຈະມິດງຽບຢູ່
ແລະຄວາມມິດງຽບນັ້ນຈະເປັນສະຕິປັນຍາຂອງເຈົ້າ
6ບັດນີ້ ຂໍຟັງການຫາເຫດຜົນຂອງຂ້ອຍ
ແລະຂໍຟັງຄຳອ້ອນວອນຂອງຮີມປາກຂອງຂ້ອຍ
7ເຈົ້າທັງຫລາຍຈະເວົ້າຊົ່ວຮ້າຍເພື່ອພຣະເຈົ້າບໍ
ແລະເວົ້າຄວາມບໍ່ຈິງເພື່ອພຣະອົງບໍ
8ເຈົ້າທັງຫລາຍຈະສະແດງຄວາມເຂົ້າຂ້າງພຣະອົງບໍ
ເຈົ້າຈະວ່າຄວາມຝ່າຍພຣະເຈົ້າບໍ
9ເມື່ອພຣະອົງໄດ້ຄົ້ນພົບເຈົ້າ ຈະດີແກ່ເຈົ້າບໍ
ຫລືເຈົ້າຈະເຍາະເຍີ້ຍພຣະອົງໄດ້ເໝືອນຜູ້ໜຶ່ງຜູ້ໃດເຍາະເຍີ້ຍມະນຸດບໍ
10ພຣະອົງຈະໄດ້ລົງໂທດເຈົ້າທັງຫລາຍແທ້
ຖ້າເຈົ້າສະແດງຄວາມລຳອຽງຢ່າງລັບໆ
11ລິດອຳນາດຂອງພຣະອົງຈະບໍ່ເຮັດໃຫ້ເຈົ້າຢ້ານກົວ
ແລະຄວາມໂກດຮ້າຍຕໍ່ພຣະອົງຈະບໍ່ຕົກເໜືອເຈົ້າຫລື
12ຄວາມລະນຶກເຖິງທັງຫລາຍຂອງເຈົ້າເປັນເໝືອນຂີ້ເທົ່າ
ຮ່າງກາຍຂອງເຈົ້າເປັນແຕ່ກາຍດິນ
13ຂໍຈົ່ງມິດສາ ແລະຂ້ອຍຈະເວົ້າ
ແລະແມ່ນຫຍັງຈະເກີດຂຶ້ນແກ່ຂ້ອຍ ກໍຂໍໃຫ້ເກີດທ້ອນ
14ເຫດສັນໃດ ຂ້ອຍຈະຄາບເນື້ອໜັງຂອງຂ້ອຍໄວ້
ແລະສ່ຽງຊີວິດຂອງຂ້ອຍ
15ເຖິງແມ່ນພຣະອົງໄດ້ປະຫານຂ້ອຍເສຍ ຂ້ອຍກໍຈະຍັງວາງໃຈໃນພຣະອົງ
ແຕ່ຂ້ອຍຈະຍັງຢືນຢັນທາງທັງຫລາຍຂອງຂ້ອຍຕໍ່ໜ້າພຣະພັກພຣະອົງ
16ພຣະອົງຈະໄດ້ເປັນຄວາມພົ້ນຂອງຂ້ອຍດ້ວຍ
ເພາະຄົນໜ້າຊື່ໃຈຄົດຈະບໍ່ໄດ້ເຂົ້າມາຕໍ່ໜ້າເບື້ອງພຣະພັກພຣະອົງ
17ຂໍຟັງຖ້ອຍຄຳຂອງຂ້ອຍຢ່າງລະມັດລະວັງ
ແລະໃຫ້ຄຳກ່າວຂອງຂ້ອຍຢູ່ໃນຫູຂອງເຈົ້າ
18ເບິ່ງແມ ຂ້ອຍຕຽມຄະດີຂອງຂ້ອຍແລ້ວ
ຂ້ອຍຮູ້ວ່າ ຈະປາກົດວ່າຂ້ອຍບໍລິສຸດ
19ໃຜນໍ ຈະສູ້ຄະດີກັບຂ້ອຍ ເພາະບັດນີ້
ຖ້າຂ້ອຍມິດງຽບຢູ່ ຂ້ອຍກໍຈະຕາຍ
20‘ຂໍໄດ້ປະທານສອງສິ່ງແກ່ຂ້ານ້ອຍ
ແລະຂ້ານ້ອຍຈະບໍ່ເຊື່ອງຕົວຈາກພຣະພັກພຣະອົງ
21ຂໍໄດ້ຫົດພຣະຫັດໃຫ້ໄກຈາກຂ້ານ້ອຍ
ແລະຂໍຢ່າໃຫ້ຄວາມໂກດຮ້າຍຂອງພຣະອົງເຮັດໃຫ້ຂ້ານ້ອຍຢ້ານກົວ
22ຂໍພຣະອົງເອີ້ນສາ ແລ້ວຂ້ານ້ອຍຈະທູນຕອບ
ຫລືຂໍໃຫ້ຂ້ານ້ອຍທູນ ແລະຂໍພຣະອົງໄດ້ຕອບແກ່ຂ້ານ້ອຍ
23ບັນດາຄວາມຊົ່ວຊ້າ ແລະຄວາມຜິດບາບຂອງຂ້ານ້ອຍມີເທົ່າໃດ
ຂໍໄດ້ໂຜດໃຫ້ຂ້ານ້ອຍຮູ້ເຖິງການລະເມີດ ແລະບາບຂອງຂ້ານ້ອຍ
24ເປັນຫຍັງພຣະອົງຈິ່ງຫັນພຣະພັກໜີ
ແລະໄດ້ນັບວ່າຂ້ານ້ອຍເປັນສັດຕູຂອງພຣະອົງ
25ພຣະອົງຈະໃຫ້ໃບໄມ້ທີ່ຖືກລົມພັດຫັກບໍ
ແລະຈະໄດ້ໄລ່ຕິດຕາມເຟືອງແຫ້ງບໍ
26ເພາະພຣະອົງໄດ້ຈາລຶກສິ່ງຂົມຂື່ນຕໍ່ສູ້ຂ້ານ້ອຍ
ແລະໄດ້ກະທຳໃຫ້ຂ້ານ້ອຍຮັບໂທດຄວາມຊົ່ວຊ້າ
ທີ່ຂ້ານ້ອຍເຮັດເມື່ອຍັງໜຸ່ມໆຢູ່
27ພຣະອົງໄດ້ເອົາໂສ້ມັດຕີນຂອງຂ້ານ້ອຍໄວ້
ແລະໄດ້ເຝົ້າເບິ່ງທາງທັງໝົດຂອງຂ້ານ້ອຍ
ພຣະອົງໄດ້ຈາລຶກເຄື່ອງໝາຍໄວ້ເທິງຝ່າຕີນຂອງຂ້ານ້ອຍ
28ມະນຸດກໍຊຸດໂຊມໄປຄືຂອງເນົ່າ
ຄືເຄື່ອງແຕ່ງກາຍທີ່ໂຕມອດກິນ’”