1ພຣະເຈົ້າຊົງກ່າວຕໍ່ຢາໂຄບວ່າ, “ຮີບຕຽມຕົວແລ້ວອອກໄປອາໄສຢູ່ເບັດເອນ ໃນທີ່ນັ້ນ ຈົ່ງສ້າງແທ່ນບູຊາພຣະເຈົ້າຜູ້ປະກົດຕໍ່ເຈົ້າ ເມື່ອເຈົ້າກຳລັງປົບໜີຈາກເອຊາວອ້າຍຂອງເຈົ້າ.”2ດັ່ງນັ້ນ ຢາໂຄບຈຶ່ງບອກກັບຄອບຄົວຂອງຕົນ ແລະທຸກຄົນທີ່ອາໄສຢູ່ນຳວ່າ, “ຈົ່ງປະຖິ້ມຮູບພະທັງຫລາຍທີ່ມີຢູ່ ພ້ອມທັງຊຳລະກາຍໃຈໃຫ້ສະອາດຜ່ອງໃສ ແລະນຸ່ງເຄື່ອງອັນຈົບງາມ.3ພວກເຮົາຈະໜີໄປຢູ່ເບັດເອນ ໃນບ່ອນນັ້ນຂ້ອຍຈະສ້າງແທ່ນສຳລັບຖວາຍບູຊາພຣະເຈົ້າອົງໄດ້ຊົງສະຖິດຢູ່ນຳຂ້ອຍ ໃນທຸກໆບ່ອນທີ່ຂ້ອຍໄປ ແລະໄດ້ຊົງຊົດຊ່ອຍຂ້ອຍເວລາທຸກຍາກລຳບາກ.”
4ດັ່ງນັ້ນ ພວກເຂົາຈຶ່ງເອົາຮູບພະທີ່ມີຢູ່ ແລະຕຸ້ມຫູທີ່ພວກເຂົາໃສ່ມອບໃຫ້ຢາໂຄບ ເພິ່ນຈຶ່ງເອົາເຄື່ອງເຫລົ່ານີ້ໄປຝັງໄວ້ກ້ອງຕົ້ນໝາກກໍ່ໃກ້ໆ ເມືອງເຊເຄມ.5ເມື່ອຢາໂຄບພ້ອມທັງລູກຊາຍຂອງຕົນກຳລັງອອກເດີນທາງ ຄົນທີ່ຢູ່ໃນເມືອງໃກ້ຄຽງກໍເກີດມີຄວາມຢ້ານຢ່າງໃຫຍ່ ຈົນບໍ່ສາມາດໄລ່ຕິດຕາມພວກເຂົາໄປ.
6ຢາໂຄບພ້ອມປະຊາຊົນທຸກຄົນໄດ້ມາຮອດເມືອງລູເຊ (ຫລືເບັດເອນ) ທີ່ປະເທດການາອານ.7ໃນທີ່ນັ້ນ ເພິ່ນໄດ້ສ້າງແທ່ນສຳລັບຖວາຍບູຊາແລ້ວໃສ່ຊື່ບ່ອນນັ້ນວ່າ ເບັດເອນ ກໍເພາະວ່າພຣະເຈົ້າໄດ້ຊົງປາກົດແກ່ເພິ່ນ ຄາວເພິ່ນປົບໜີຈາກອ້າຍຂອງເພິ່ນ.8ຄັນຕໍ່ມາ ນາງເດໂບຣາ ແມ່ນົມຂອງເຣເບກາກໍເຖິງແກ່ກຳ ລາວໄດ້ເອົາສົບຂອງນາງຝັງໄວ້ກ້ອງຕົ້ນໝາກກໍ່ທາງທິດໃຕ້ຂອງເມືອງເບັດເອນ ລາວຈຶ່ງໃສ່ຊື່ຕົ້ນໄມ້ນັ້ນວ່າ, “ຕົ້ນໝາກກໍ່ແຫ່ງການຮ້ອງໄຫ້.”
9ເມື່ອຢາໂຄບກັບຈາກປະເທດເມໂຊໂປຕາເມຍ ພຣະເຈົ້າໄດ້ຊົງປະກົດຕໍ່ເພິ່ນອີກ ແລະຊົງອວຍພອນໃຫ້ເພິ່ນວ່າ,10“ຕໍ່ໄປນີ້ ຊື່ຂອງເຈົ້າຈະບໍ່ແມ່ນຢາໂຄບອີກ ຊື່ຂອງເຈົ້າຈະແມ່ນອິດສະຣາເອນ” ດັ່ງນັ້ນເພິ່ນຈຶ່ງມີຊື່ວ່າອິດສະຣາເອນ.11ແລ້ວພຣະເຈົ້າຊົງກ່າວຕໍ່ໄປວ່າ, “ເຮົາແມ່ນພຣະຜູ້ເປັນເຈົ້າຜູ້ມີອຳນາດຍິ່ງໃຫຍ່ ເຈົ້າຈະມີເຊື້ອສາຍຢ່າງຫລວງຫລາຍຈົນເປັນຫລາຍຊົນຊາດ ແລະຍັງມີບາງຄົນອີກໃນເຊື້ອສາຍຂອງເຈົ້າ ຈະເປັນກະສັດ.12ເຮົາຈະເອົາດິນຊຶ່ງເຮົາໄດ້ໃຫ້ອັບຣາຮາມແລະອີຊາກນັ້ນໃຫ້ເຈົ້າ ແລະເຊື້ອສາຍຂອງເຈົ້າສືບຕໍ່ໄປ.”13ຄັນແລ້ວ ພຣະເຈົ້າກໍສະເດັດຈາກບ່ອນທີ່ພຣະອົງຊົງກ່າວຕໍ່ເພິ່ນຄືນສູ່ສະຫວັນ.14ຢາໂຄບຈຶ່ງຝັງເສົາຫີນເປັນອະນຸສອນໄວ້ທີ່ນັ້ນ ເພິ່ນໄດ້ຖອກເຄື່ອງດື່ມຖວາຍບູຊາໃສ່ເທິງເສົາຫີນ ແລະແລ້ວກໍເອົານ້ຳມັນທີ່ມີກິ່ນຫອມຖອກໃສ່ອີກ.15ຢາໂຄບໃສ່ຊື່ບ່ອນນັ້ນວ່າ ເບັດເອນ.
16ພວກເຂົາພາກັນອອກຈາກເບັດເອນໄປ ເມື່ອເດີນທາງໄປໃກ້ຈະຮອດເອຟຣາທາແລ້ວ ນາງຣາເຊັນກໍເຈັບທ້ອງຈະອອກລູກ ເທື່ອນີ້ນາງອອກລູກລຳບາກຫລາຍ.17ເມື່ອນາງເບັ່ງລູກເມື່ອໃດ ນາງຜະດຸງຄັນກໍເວົ້າກັບນາງວ່າ, “ບໍ່ຕ້ອງຢ້ານ ເຈົ້າຈະໄດ້ລູກຜູ້ຊາຍອີກ.”18ນາງສິ້ນໃຈຕາຍຫລັງຈາກອອກລູກແລ້ວ ແຕ່ກ່ອນສິ້ນໃຈຕາຍນາງໃສ່ຊື່ລູກວ່າເບັນໂອນີ ແຕ່ຢາໂຄບໃສ່ຊື່ໃຫ້ໃໝ່ວ່າ ເບັນຢາມິນ.19ຢາໂຄບໄດ້ເອົາສົບນາງຣາເຊັນໄປຝັງໄວ້ກັບແຄມທາງໄປເມືອງເອຟຣາທາ (ປັດຈຸບັນແມ່ນເມືອງເບັດເລເຮັມ).20ຄັນແລ້ວ ເພິ່ນໄດ້ຝັງເສົາຫີນເທິງຫລຸມຝັງສົບເປັນອະນຸສອນ ແລະເສົານັ້ນໄດ້ເອີ້ນວ່າ, “ເສົານາງຣາເຊັນ” ມາເທົ່າທຸກວັນນີ້.
21ຕໍ່ມາອິດສະຣາເອນໄດ້ຍ້າຍໄປຕັ້ງຄ້າຍພັກອາໄສຢູ່ທາງຟາກຫໍຄອຍ ເອເດເບື້ອງນັ້ນ.
22ເມື່ອອິດສະຣາເອນໄດ້ອາໄສຢູ່ໃນປະເທດນັ້ນ ຣູເບັນໄດ້ລັກນອນນຳນາງບິນຮາເມຍນ້ອຍຂອງພໍ່ເມື່ອອິດສະຣາເອນຜູ້ເປັນພໍ່ຮູ້ເລື່ອງນີ້ກໍມີຄວາມຢາກຮ້າຍຫລາຍ.
23ລູກຊາຍສິບສອງຄົນທີ່ຢູ່ນຳຢາໂຄບມີດັ່ງນີ້: ລູກຊາຍທີ່ເກີດຈາກນາງເລອາ ຄືຣູເບັນລູກຊາຍກົກ ຊີເມໂອນ ເລວີ ຢູດາ ອິດຊາຄາ ແລະເຊບູລູນ.
24ລູກຊາຍທີ່ເກີດຈາກນາງຣາເຊັນ ຄືໂຢເຊັບແລະເບັນຢາມິນ.
25ລູກຊາຍທີ່ເກີດຈາກນາງບິນຮາສາວໃຊ້ນາງຣາເຊັນ ຄືດານແລະນັບທາລີ.
26ລູກຊາຍທີ່ເກີດຈາກນາງຊີລະປາສາວໃຊ້ນາງເລອາ ຄືຄາດ ແລະອາເຊ. ຄົນເຫລົ່ານີ້ແມ່ນລູກຊາຍຂອງຢາໂຄບ ທີ່ເກີດຢູ່ເມໂຊໂປຕາເມຍ.
27ຢາໂຄບໄດ້ກັບຄືນມາຫາອີຊາກພໍ່ຂອງຕົນທີ່ມຳເຣ (ມີຊື່ອີກວ່າກີຣີອາດ-ອາຣະບາ ຫລືເຮັບໂຣນ) ບ່ອນທີ່ອັບຣາຮາມແລະອີຊາກໄດ້ເຄີຍອາໄສຢູ່.28 29ອີຊາກໄດ້ເຖິງແກ່ກຳໄປຢູ່ນຳພີ່ນ້ອງຂອງເພິ່ນ ເມື່ອອາຍຸໄດ້ຮ້ອຍແປດສິບປີ ຢາໂຄບແລະເອຊາວລູກຊາຍຂອງເພິ່ນເອງເປັນຜູ້ຝັງສົບ.