1ໂມເຊໄດ້ກ່າວຕໍ່ປະຊາຊົນວ່າ, “ພຣະທຳທັງໝົດທີ່ຂ້າພະເຈົ້າບອກສອນນັ້ນ ພວກທ່ານຈົ່ງປະຕິບັດຕາມເພື່ອວ່າຈະໄດ້ມີຊີວິດຢູ່ ແລະເພື່ອຈະໄດ້ເຂົ້າຍຶດຄອງເອົາແຜ່ນດິນທີ່ພຣະຜູ້ເປັນເຈົ້າ ຂອງບັນພະບູລຸດຂອງພວກທ່ານກຳລັງຈະປະທານໃຫ້.2ຢ່າເພີ່ມເຕີມ ຫລືຕັດຖ້ອຍຄຳໃດໆ ທີ່ຂ້າພະເຈົ້າສັ່ງນັ້ນອອກ ໃຫ້ເຊື່ອຟັງທັງໝົດ ເພາະວ່າເປັນຄຳສັ່ງແຫ່ງພຣະຜູ້ເປັນເຈົ້າຂອງພວກທ່ານ.3ພວກທ່ານເອງກໍເຫັນແລ້ວສິ່ງທີ່ພຣະຜູ້ເປັນເຈົ້າໄດ້ຊົງກະທຳໃນພູເປໂອນັ້ນ ຄືຊົງທຳລາຍທຸກຄົນທີ່ຂາບໄຫວ້ພະບາອານ.4ແຕ່ຄົນທັງຫລາຍທີ່ຍຶດຖືພຣະຜູ້ເປັນເຈົ້າຂອງພວກເຈົ້າກໍຍັງມີຊີວິດຢູ່ທຸກວັນນີ້.5 6ຂ້າພະເຈົ້າໄດ້ສອນພຣະທຳທັງໝົດນີ້ແກ່ພວກເຈົ້າ ເໝືອນດັ່ງພຣະຜູ້ເປັນເຈົ້າຂອງຂ້າພະເຈົ້າໄດ້ບອກສອນຂ້າພະເຈົ້າ ສະນັ້ນຢູ່ໃນດິນແດນທີ່ພວກເຈົ້າກຳລັງຈະບຸກເຂົ້າໄປຍຶດຄອງນັ້ນ ຈົ່ງປະຕິບັດຕາມພຣະຄຳເຫລົ່ານີ້ດ້ວຍຄວາມສັດຊື່ ເພາະວ່າການເຮັດເຊັ່ນນີ້ຈະເປັນເຄື່ອງສະແດງໃຫ້ຊົນຊາດອື່ນໆ ເຫັນເຖິງສະຕິປັນຍາແລະຄວາມຮອບຮູ້ຂອງພວກທ່ານ ເມື່ອຊົນຊາດເຫລົ່ານັ້ນໄດ້ຟັງພຣະທຳນີ້ທັງໝົດ ພວກເຂົາກໍຈະພາກັນເວົ້າວ່າ ຊົນຊາດໃຫຍ່ນີ້ມີສະຕິປັນຍາ ແລະຄວາມຮອບຮູ້ແທ້.7ບໍ່ມີຊົນຊາດໃຫຍ່ອື່ນໃດມີພະຢູ່ໃກ້ເໝືອນກັບພວກເຮົາມີພຣະຜູ້ເປັນເຈົ້າຢູ່ໃກ້ ຄືເມື່ອໃດພວກເຮົາຮ້ອງຂໍໃຫ້ຊົງຊ່ອຍເຫລືອ ພຣະອົງກໍຊົງຕອບ.8ບໍ່ມີປະເທດໃຫຍ່ອື່ນໃດທີ່ມີພຣະທຳທີ່ຍຸດຕິທຳຄືດັ່ງທີ່ຂ້າພະເຈົ້າໄດ້ສອນພວກທ່ານມື້ນີ້.
9ຈົ່ງເຝົ້າລະວັງຢູ່ ແລະລະມັດລະວັງໃຫ້ດີຕະຫລອດຊົ່ວຊີວິດຂອງພວກທ່ານນັ້ນ ຢ່າໄດ້ຫລົງລືມສິ່ງທີ່ພວກທ່ານໄດ້ເຫັນກັບຕາມາແລ້ວ ຈົ່ງບອກໃຫ້ພວກລູກຫລານຂອງພວກທ່ານຮູ້.10ເຖິງເລື່ອງເຫດການໃນມື້ທີ່ພວກເຈົ້າໄດ້ເຂົ້າເຝົ້າພຣະຜູ້ເປັນເຈົ້າຂອງເຈົ້າທີ່ພູຊີນາຍ ໃນມື້ນັ້ນ ພຣະອົງຊົງບອກຂ້າພະເຈົ້າວ່າ, “ຈົ່ງບອກໃຫ້ປະຊາຊົນມາໂຮມກັນ ເພາະວ່າເຮົາຢາກເວົ້າໃຫ້ພວກເຂົາຟັງ ເພື່ອພວກເຂົາທັງຫລາຍ ຈະໄດ້ຮູ້ຈັກການເຄົາລົບຢຳເກງເຮົາຈົນຕະຫລອດຊີວິດ ແລະເພື່ອຈະໄດ້ບອກສອນລູກຫລານຂອງພວກເຂົາໃຫ້ຢຳເກງເຮົາ.”11ໃນມື້ນັ້ນເອງ ພວກເຈົ້າໄດ້ຫຍັບເຂົ້າມາຢືນຢູ່ໃນຕີນພູ ຊຶ່ງມີເມກເປັນຄວັນໜາຕຶບປົກຄຸມຢູ່ ແລະມີໄຟລຸກພຸ່ງຂຶ້ນສູງເຖິງທ້ອງຟ້າ.12ແລະພຣະຜູ້ເປັນເຈົ້າໄດ້ໃຫ້ພວກທ່ານຮູ້ວ່າ ພຣະອົງໄດ້ຊົງເວົ້າແນວໃດແດ່ກັບພວກທ່ານອອກມາຈາກໄຟນັ້ນ ທັງໆ ທີ່ພວກທ່ານບໍ່ເຫັນຮູບຮ່າງໃດໆຂອງພຣະອົງເລີຍ.13ພຣະອົງຊົງບອກໃຫ້ທ່ານທັງຫລາຍເຮັດຕາມຄຳໝັ້ນສັນຍາທີ່ຊົງໃຫ້ໄວ້ ແລະຊົງໃຫ້ເຊື່ອຟັງພຣະບັນຍັດສິບປະການ ທີ່ຊົງຈາລຶກໄວ້ໃນຫີນສອງແຜ່ນ.14ພຣະຜູ້ເປັນເຈົ້າຊົງບອກໃຫ້ຂ້າພະເຈົ້າ ສອນພຣະທຳທັງໝົດນີ້ແກ່ພວກທ່ານ ເພື່ອຈະໄດ້ນຳໄປປະພຶດປະຕິບັດຢູ່ໃນແຜ່ນດິນທີ່ກຳລັງຈະເຂົ້າຍຶດຄອງນັ້ນ.
15ເມື່ອພຣະຜູ້ເປັນເຈົ້າຊົງກ່າວຕໍ່ພວກທ່ານອອກມາຈາກໄຟຢູ່ເທິງພູຊີນາຍນັ້ນ ພວກທ່ານບໍ່ໄດ້ເຫັນຮູບຮ່າງໃດໆ ມັນຈຶ່ງເປັນການດີສຳລັບພວກທ່ານ.16ສະນັ້ນ ຈົ່ງລະວັງໃຫ້ດີ ຢ່າໄດ້ເຮັດບາບດ້ວຍການສ້າງຮູບເຄົາລົບໃດໆ ຂຶ້ນມາເລີຍ.17 19ບໍ່ວ່າຮູບຜູ້ຊາຍ ຫລືຜູ້ຍິງ ບໍ່ວ່າຮູບສັດເດຍລະສານ ຮູບນົກ ຮູບສັດເລືອຄານ ຫລືຮູບປາກໍດີ ຢ່າຫລົງຂາບໄຫວ້ຫລືບົວລະບັດສິ່ງທີ່ເຫັນໃນທ້ອງຟ້າ ຄືຕາເວັນ ເດືອນແລະດວງດາວທັງຫລາຍ ສິ່ງເຫລົ່ານີ້ພຣະຜູ້ເປັນເຈົ້າຂອງພວກເຮົາຊົງປະທານໃຫ້ຊົນຊາດອື່ນທັງໝົດຂາບໄຫວ້.20ແຕ່ທ່ານບໍ່ຕ້ອງຂາບໄຫວ້ ເພາະວ່າພວກທ່ານເປັນປະຊາຊົນທີ່ພຣະອົງຊົງນຳອອກມາຈາກເຕົາໄຟໃນປະເທດເອຢິບ ເພື່ອໃຫ້ເປັນໄພ່ພົນຂອງພຣະອົງ ຢ່າງທີ່ພວກທ່ານກຳລັງເປັນຢູ່ທຸກມື້ນີ້.21ຍ້ອນພວກທ່ານນັ້ນແຫລະ ພຣະຜູ້ເປັນເຈົ້າຂອງພວກເຮົາ ຈຶ່ງຊົງພຣະພິໂລດຂ້າພະເຈົ້າ ຄືພຣະອົງຊົງປະກາດຢ່າງໜັກແໜ້ນວ່າຈະບໍ່ໃຫ້ຂ້າພະເຈົ້າຂ້າມແມ່ນ້ຳຈໍແດນໄປຍັງແຜ່ນດິນອັນອຸດົມສົມບູນ ຊຶ່ງພຣະອົງຈະຊົງປະທານໃຫ້ແກ່ພວກທ່ານນັ້ນ.22ຂ້າພະເຈົ້າຈະຕ້ອງຕາຍຢູ່ໃນແຜ່ນດິນນີ້ ຈະບໍ່ໄດ້ຂ້າມແມ່ນ້ຳຈໍແດນໄປ ແຕ່ພວກທ່ານນັ້ນຈະໄດ້ຂ້າມໄປຍຶດເອົາແຜ່ນດິນ ອັນອຸດົມສົມບູນນັ້ນເປັນກຳມະສິດ.23ຈົ່ງລະວັງໃຫ້ດີ ຢ່າໄດ້ລືມຄຳໝັ້ນສັນຍາທີ່ພຣະຜູ້ເປັນເຈົ້າຂອງພວກທ່ານໄດ້ຊົງໃຫ້ໄວ້ ໃຫ້ເຊື່ອຟັງຄຳສັ່ງຂອງພຣະອົງ ຊົງສັ່ງຫ້າມບໍ່ໃຫ້ເຮັດຮູບເຄົາລົບໃດໆ ຂາບໄຫວ້.24ເພາະວ່າ ພຣະຜູ້ເປັນເຈົ້າຂອງທ່ານທັງຫລາຍເປັນພຣະເຈົ້າຜູ້ຊົງຫວງແຫນພວກທ່ານ ແລະຊົງເປັນເໝືອນໄຟທີ່ລຸກໄໝ້ເຜົາຜານ.
25ເມື່ອພວກທ່ານມີລູກຫລານ ແລະໄດ້ເຂົ້າໄປຢູ່ໃນແຜ່ນດິນນັ້ນເຫິງນານແລ້ວ ຢ່າໄດ້ເຮັດບາບດ້ວຍການສ້າງຮູບເຄົາລົບໃດໆ ຂຶ້ນມາເລີຍ ເພາະໃນສາຍພຣະເນດຂອງພຣະຜູ້ເປັນເຈົ້ານັ້ນ ຊົງຖືວ່າການກະທຳຢ່າງນີ້ຊົ່ວຮ້າຍຫລາຍ ແລະເປັນການກະທຳທີ່ພຣະອົງຊົງພຣະພິໂລດ.26ຖ້າພວກທ່ານເຮັດຢ່າງນີ້ ຂ້າພະເຈົ້າຈະເຊີນເອົາຟ້າດິນມາເປັນພະຍານກ່າວໂທດທ່ານໃນມື້ນີ້ ວ່າພວກທ່ານຈະຈິບຫາຍຈາກແຜ່ນດິນນີ້ໃນບໍ່ຊ້າ ຈະບໍ່ໄດ້ຢູ່ເຫິງນານໃນແຜ່ນດິນທີ່ທ່ານກຳລັງຈະຂ້າມແມ່ນ້ຳຈໍແດນໄປຍຶດຄອງນັ້ນ ແຕ່ຈະຖືກທຳລາຍຈົນໝົດສິ້ນ.27ພຣະຜູ້ເປັນເຈົ້າຈະເຮັດໃຫ້ພວກທ່ານແຕກກະຈັດກະຈາຍໄປຢູ່ໃນປະເທດຕ່າງໆ ແລ້ວຈະໃຫ້ເຫລືອຢູ່ທີ່ນັ້ນພຽງແຕ່ຈຳນວນໜ້ອຍດຽວ.28ພວກທ່ານຈະຮັບໃຊ້ພະໄມ້ ແລະພະຫີນທີ່ມະນຸດເຮັດຂຶ້ນ ພະເຫລົ່ານີ້ເບິ່ງ ຟັງ ກິນ ແລະດົມກິ່ນບໍ່ໄດ້.29ຖ້າວ່າຢູ່ທີ່ນັ້ນພວກທ່ານສະແຫວງຫາພຣະຜູ້ເປັນເຈົ້າຂອງພວກທ່ານດ້ວຍຄວາມເຕັມໃຈ ພວກທ່ານກໍຈະພົບພຣະອົງ.30ແຕ່ເມື່ອໃດຫາກພວກທ່ານມີຄວາມລຳບາກໃຈໃນພາຍໜ້າ ຍ້ອນສິ່ງເຫລົ່ານີ້ທັງໝົດໄດ້ມາຖືກທ່ານ ພວກທ່ານກໍຈະກັບຄືນມາຫາພຣະຜູ້ເປັນເຈົ້າ ແລະເຊື່ອຟັງພຣະອົງ.31ເພາະວ່າ ພຣະອົງຊົງເປັນພຣະເຈົ້າທີ່ເຕັມໄປດ້ວຍພຣະເມດຕາ ຈະບໍ່ຊົງປະຖິ້ມ ຫລືທຳລາຍພວກທ່ານ ແລະຈະບໍ່ຊົງຫລົງລືມຄຳໝັ້ນສັນຍາທີ່ພຣະອົງຊົງໃຫ້ໄວ້ກັບບັນພະບູລຸດຂອງພວກທ່ານ.
32ໃຫ້ຖາມທົ່ວໂລກນີ້ເບິ່ງດູວ່າ ໃນອະດີດຕະການກ່ອນພວກທ່ານເກີດ ຕັ້ງແຕ່ຄາວພຣະເຈົ້າຊົງສ້າງມະນຸດໃນໂລກ ເຄີຍມີເລື່ອງໃຫຍ່ໂຕເໝືອນຢ່າງນີ້ເກີດຂຶ້ນມາແລ້ວຫລືບໍ? ມີໃຜເຄີຍໄດ້ຍິນເລື່ອງຢ່າງນີ້ຫລືບໍ?33ມີຊົນຊາດໃດແດ່ ເມື່ອໄດ້ຍິນພຣະເຈົ້າເວົ້າອອກມາຈາກໄຟແລ້ວກໍຍັງບໍ່ຕາຍເໝືອນຢ່າງພວກທ່ານ?34ມີພະໃດອີກ ທີ່ກ້າໄປເອົາຄົນອອກມາຈາກຊາດໜຶ່ງມາຕັ້ງເປັນຊາດຂອງພະເອງ ເໝືອນຢ່າງພຣະຜູ້ເປັນເຈົ້າຂອງພວກທ່ານໄດ້ເຮັດເພື່ອທ່ານໃນປະເທດເອຢິບນັ້ນ? ພຣະອົງໄດ້ຊົງໃຊ້ອຳນາດ ແລະອຳນາດອັນຍິ່ງໃຫຍ່ຂອງພຣະອົງເຮັດໃຫ້ເກີດມີໂລກແລະສົງຄາມ ເຮັດການອັດສະຈັນ ແລະໝາຍສຳຄັນຕ່າງໆ ພ້ອມທັງເຮັດສິ່ງອັນໜ້າຢ້ານໃຫ້ພວກທ່ານເຫັນຕໍ່ໜ້າຕໍ່ຕາ.35ພຣະຜູ້ເປັນເຈົ້າຊົງສຳແດງສິ່ງເຫລົ່ານີ້ໃຫ້ພວກທ່ານເຫັນ ກໍເພື່ອໃຫ້ພວກທ່ານຮູ້ວ່າ ພຣະອົງໆດຽວເທົ່ານັ້ນທີ່ຊົງເປັນພຣະເຈົ້າ ບໍ່ມີອົງອື່ນອີກ.36ທີ່ຊົງໂຜດໃຫ້ພວກທ່ານໄດ້ຍິນສຽງຂອງພຣະອົງຈາກສະຫວັນໄດ້ ກໍເພື່ອສັ່ງສອນທ່ານ ແລະຍັງຊົງໂຜດໃຫ້ພວກທ່ານໄດ້ເຫັນໄຟອັນສັກສິດຂອງພຣະອົງຢູ່ໃນໂລກ ພ້ອມທັງຊົງກ່າວອອກມາຈາກໄຟນັ້ນ.37ເພາະວ່າພຣະອົງຊົງຮັກບັນພະບູລຸດຂອງພວກທ່ານ ຊົງເລືອກເອົາເຊື້ອສາຍຂອງພວກເຂົາທັງຫລາຍ ແລະຊົງນຳພາພວກທ່ານອອກຈາກປະເທດເອຢິບ ດ້ວຍລິດທານຸພາບອັນຍິ່ງໃຫຍ່ຂອງພຣະອົງເອງ.38ໃນເວລາທີ່ພວກທ່ານຍ່າງກ້າວໄປຂ້າງໜ້ານັ້ນ ພຣະອົງໄດ້ຊົງຂັບໄລ່ຊົນຊາດໃຫຍ່ ແລະມີກຳລັງເໜືອກວ່າພວກທ່ານອອກໜີໄປ ເພື່ອນຳທ່ານເຂົ້າມາຢູ່ໃນແຜ່ນດິນນັ້ນ ຊຶ່ງຍັງເປັນຂອງພວກທ່ານຢູ່ຈົນເທົ່າທຸກມື້ນີ້.39ດັ່ງນີ້ແຫລະ ໃຫ້ຈື່ໄວ້ ແລະຢ່າລືມວ່າ ພຣະຜູ້ເປັນເຈົ້າແມ່ນພຣະເຈົ້າເທິງສະຫວັນຊັ້ນຟ້າ ແລະເທິງແຜ່ນດິນ ບໍ່ມີພະອື່ນອີກນອກຈາກພຣະອົງ.40ຈົ່ງເຮັດຕາມພຣະທຳ ແລະກົດບັນຍັດທັງໝົດຂອງພຣະອົງ ຊຶ່ງຂ້າພະເຈົ້າໄດ້ບອກພວກທ່ານແລ້ວໃນມື້ນີ້ ເພື່ອທຸກສິ່ງທຸກຢ່າງຈະເປັນໄປໂດຍດີສຳລັບພວກທ່ານ ແລະລູກຫລານຂອງທ່ານ ຊົງປະທານໃຫ້ເປັນເຈົ້າຂອງຕະຫລອດໄປເປັນນິດ.”
41ແລ້ວໂມເຊໄດ້ຕັ້ງຫົວເມືອງສາມຫົວເມືອງໄວ້ຢູ່ຕ່າງຫາກທີ່ ແມ່ນ້ຳຈໍແດນຟາກນີ້ ທາງທິດຕາເວັນອອກ42ເພື່ອຜູ້ໃດທີ່ຂ້າຄົນຈະໄດ້ຫລົບໜີໄປຢູ່ບ່ອນນັ້ນ ຄືຜູ້ທີ່ຂ້າເພື່ອນບ້ານໂດຍບໍ່ໄດ້ເຈດຕະນາ ໂດຍບໍ່ໄດ້ກຽດຊັງລາວມາກ່ອນ ແລະເມື່ອໜີໄປຢູ່ໃນເມືອງນີ້ບ່ອນໃດບ່ອນໜຶ່ງກໍຈະລອດຊີວິດ43ຫົວເມືອງເຫລົ່ານີ້ຄືເມືອງເບເຊຢູ່ໃນຖິ່ນແຫ້ງແລ້ງກັນດານທີ່ທົ່ງພຽງສູງສຳລັບຄົນຣູເບັນ ແລະເມືອງຣາໂມດທີ່ກີເລອາດສຳລັບຄົນຄາດ ແລະເມືອງໂກລານໃນບາຊານສຳລັບມານາເຊ
44ຕໍ່ໄປນີ້ເປັນພຣະບັນຍັດທີ່ໂມເຊໄດ້ຕັ້ງໄວ້ຕໍ່ໜ້າພວກລູກຫລານອິດສະຣາເອນ45ພຣະບັນຍັດເຫລົ່ານີ້ເປັນພຣະໂອວາດ ເປັນກົດເກນແລະກົດໝາຍຊຶ່ງໂມເຊກ່າວແກ່ພວກລູກຫລານອິດສະຣາເອນເມື່ອພວກເຂົາອອກຈາກເອຢິບແລ້ວ46ເມື່ອຢູ່ຟາກແມ່ນ້ຳຈໍແດນຟາກນີ້ທີ່ຮ່ອມພູກົງກັນຂ້າມກັບເບັດ-ເປໂອ ໃນແຜ່ນດິນຂອງສີໂຮນກະສັດຄົນອາໂມຣິດຜູ້ທີ່ຢູ່ເຮັດຊະໂບນຊຶ່ງໂມເຊແລະພວກລູກຫລານອິດສະຣາເອນໄດ້ຕີພ່າຍແພ້ໄປເມື່ອອອກມາຈາກເອຢິບແລ້ວ47ຄົນອິດສະຣາເອນໄດ້ເຂົ້າຍຶດແຜ່ນດິນຂອງເພິ່ນ ແລະແຜ່ນດິນຂອງໂອກກະສັດເມືອງບາຊານເປັນກະສັດສອງອົງຂອງຄົນອາໂມຣິດ ຜູ້ທີ່ຢູ່ທາງຕາເວັນອອກຟາກແມ່ນ້ຳຈໍແດນຟາກນີ້48ຕັ້ງແຕ່ເມືອງອາໂຣເອທີ່ຢູ່ແຄມແມ່ນ້ຳອາໂນນ ໄປຈົນເຖິງພູເຂົາສີໂອນ ຄືເຮີໂມນ49ລວມກັບທົ່ງພຽງທັງໝົດ ຊຶ່ງຢູ່ຟາກຕາເວັນອອກຂອງແມ່ນ້ຳຈໍແດນຟາກນີ້ ຈົນເຖິງທະເລແຫ່ງທົ່ງພຽງທີ່ນ້ຳພຸພູປິຊະກາ